Uni
မျက်လုံးတွေကို အားမရစွာ အလျင်စလို ဖွင့်လှစ်လိုက်တော့ ခပ်စူးစူးနေရောင်က သူ့ကိုလာကြိုဆိုသည်။ အရာအားလုံးပြီးသွားခဲ့ပြီဆိုတာ သူ့စိတ်ထဲခံစားနေရသည်။ သို့သော် ဘာကပြီးသွားသလဲ။ ဘယ်လိုပြီးသွားသလဲ၊ ဘာကြောင့်လဲဆိုတာ သူလုံးဝမသိတော့။ သူ့စိတ်ထဲမှာ အရာအားလုံးဗလာသပ်သပ်ဖြစ်နေကာ မေးခွန်းတွေသည် ဦးနှောက်ဆီမှ ပြွတ်သိပ်တက်လာလေသည်။ အခန်းတံခါးဖွင့်သံကြားလိုက်ရ၏။ မိန်းမကြီးတစ်ယောက် တံခါးမှတဆင့် တစ်လှမ်းချင်းဝင်လာတာကိုတွေ့ရသည်။ ထို့နောက် သူ့ကိုကြည့်ပြီး အလန့်တကြားအော်သည်။ သူ့နားတွေ အူခနဲ ဖြစ်သွားသည်။ ပြီးနောက် မျက်ဝန်းများပြန်လည်ပိတ်သွားကာ အမှောင်ကမ္ဘာဆီသို့...
“သား ငြိမ်၊ သားလေး၊ မျက်လုံးဖွင့်ကြည့်ပါဦးကွယ်၊ သားလေး”
“သားလေး၊ ဒေါက်တာ့အသံကို ကြားလား၊ တစ်ခုခုတုံ့ပြန်ပေးနော်”
“သား ဖေဖေ ခေါ်နေတယ်လေ”
“သား”
“သား”
နားထဲမှာ ခေါ်သံတွေ ဆူဝေသွားသည်။ သားဆိုတာ သူ့ကိုခေါ်နေမှန်းတော့ ရိပ်မိပေမဲ့ မျက်ဝန်းတွေကို ရုတ်တရက်ဖွင့်လို့မရလိုက်။ နှုတ်ဆီမှ အားမလိုအားမရ ထုတ်ညည်းမိတော့ ခေါ်သံတွေတိတ်သွားသည်။ ထို့နောက် သူ မျက်လုံးတွေကို ဖွင့်နိုင်ခဲ့သည်။ စူးခနဲဝင်လာသော အလင်းရောင်ကို ခံနိုင်အောင်ကြိုးစားပြီးနောက် သူ့ရှေ့မှာ မိန်းမကြီးတစ်ယောက်ကို တွေ့လိုက်ရသည်။ ခပ်ရှည်ရှည်ဖြစ်ဟန်တူသော ဆံနွယ်တို့ကို မထုံးနိုင်ဘဲ အဝတ်အစားက လည်း ဖိုသီဖတ်သီရှိသည်။ မျက်ဝန်းများက မို့မောက်နေကာ မျက်ရည်စီးကြောင်း နှစ်ကြောင်းပါ စိုလျှက်ရှိနေသေးသည်။ ထိုမိန်းမကြီးဆီမှ အကြည့်မလွှဲမိခင်မှာပင် သူမက သူ့ကို ရင်ခွင်ထဲသို့ တအားထည့်၍ဖက်ထားလိုက်သည်။
“သားရယ် တော်ပါသေးရဲ့၊ ကလေးရယ်၊ တော်ပါသေးရဲ့”
ဘာကိုတော်ပါသေးရဲ့လဲ၊ သူမသိ၊ သူအခုဘာဖြစ်နေတာလဲ၊ ဒီမိန်းမကြီးကရော ဘယ်သူလဲ၊ နောက်ပြီး ဒါကရော ဘယ်နေရာလဲ။ သူဘာကိုမှမသိ။ ယုတ်စွအဆုံး သူ့ကိုယ်သူတောင် သူသိရှိခြင်းမရှိ။ သူဘယ်သူလဲ။ ဦးနှောက် ကိုစစ်မေးကြည့်တော့ အဖြေအစား ဗလာသပ်သပ်ခံစားချက်ကိုသာ လက်ခံရရှိလိုက်သည်။ ဘာကိုမှ မသိသည့် သူ့ပုံစံသည် ပြူးတိပြူးကြောင် ဖြစ်နေပေလိမ့်မည်။
ESTÁS LEYENDO
Love Zone (Completed)
RomanceUni ကောင်လေးတစ်ယောက်က စာအုပ်ထဲကို ဝိဉာဉ်ကူးပြောင်းသွားပြီးနောက် ကြောက်စရာကောင်းတဲ့ ဇာတ်လိုက်နဲ့ အမှတ်မထင် တွေ့ဆုံခဲ့တယ်။ Zawgyi ေကာင္ေလးတစ္ေယာက္က စာအုပ္ထဲကို ဝိဉာဉ္ကူးေျပာင္းသြားၿပီးေနာက္ ေၾကာက္စရာေကာင္းတဲ့ ဇာတ္လိုက္နဲ႔ အမွတ္မထင္ ေတြ့ဆံုခဲ့တယ္။ Cove...
