Love Zone (Completed)

Final EP

Uni

မျက်တောင်တိုနက်နက်ကလေးတွေက ဖျတ်ခနဲလှုပ်ရှားလာသည်။ ငြိမ်က ဆတ်ခနဲထထိုင်လိုက်ကာ ဘေးဘီဝဲယာကိုကြည့်လိုက်သည်။ သူက ဖြူဖျော့ဖျော့အခန်းထဲကိုရောက်နေတာဖြစ်ပြီး ကုတင်တစ်လုံးပေါ်တွင်ရှိနေသည်။ သူ့ကိုယ်ပေါ်မှာ ရှုပ်ထွေးများပြားလှသော ဆေးပိုက်တွေရှိနေကာ သူ့တစ်ကိုယ်လုံးကလည်း ဆိုးရွားစုတ်ပြတ်နေလောက်အောင် နာကျင်နေတာကို သူသိလိုက်ရသည်။ အခန်းငယ်လေးထဲမှာ ဘယ်သူမှမရှိ။ တစ်ယောက်ဆို တစ်ယောက်မှမရှိ။ ညဖြစ်နေသည်ဆိုဦးတော့ လူနာစောင့်ကတော့ရှိရမည်မဟုတ်လား။ သူ မျက်နှာသေနဲ့ပဲ ကိုယ့် လက်တွေကိုယ် ပြန်ဖြန့်ကြည့်မိသည်။ ဒီလက်တွေက တည်ငြိမ်ယင်းရဲ့လက်တွေမဟုတ်။ ဒါသူ့လက်တွေ... သူ့ကိုယ်ပိုင်လက်တွေပဲ။ ဘေးဘီဝဲယာကိုကြည့်လိုက်တော့ မှန်မတွေ့ရသည်မို့ ဒီတိုင်းလေးပဲ ငြိမ်ငြိမ်ထိုင်နေလိုက်သည်။ ခေါင်းက တစ်ချက်လှုပ်ရှားတာနဲ့ သေလောက်အောင် မူးဝေနေသည်။ သူ့မျက်ဝန်းမှ မျက်ရည်စီးကြောင်း နှစ်ခုက ပေါက်ခနဲစီးကျလာသည်။ ဆိုတော့... သူ ပြန်ရောက်လာပြီပေါ့။

အံကိုကြိတ်ကာ ပြုံးနိုင်ဖို့ ကြိုးစားမိသည်။ သူ့ရင်ဘတ်တစ်ခုလုံးက နာကျင်နေပြီး ကွဲအက်နေသလို ခံစားရသည်။ အောက်ဆီဂျင်ပိုက်ကို ဖယ်လိုက်တော့ ရုတ်တရက် အသက်ရှူလို့တောင် မဝချင်တော့။ ငြိမ်က ရင်ဘတ်ကို ဖိထားရင်း တွေတွေကြီး ထိုင်နေမိသည်။ အခုဆို ဖေဖေမေမေတို့နဲ့ရော ညီမလေးနဲ့ရော သူ ပြန်တွေ့ရတော့မှာပဲလေ။ သူ ပျော်ရမှာပေါ့။ မဟုတ်ဘူးလား။ သူ ပျော်နေသင့်တာပါ။ စက္ကန့်တံတစ်ချက်သွားတိုင်း တစ်ချက်နာလာတဲ့ နှလုံးကို လျစ်လျှူရှုမိပေမဲ့ မျက်ဝန်းကကျလာသည့် မျက်ရည်တွေကတော့ လျစ်လျှူရှုမရအောင်ကိုဖြစ်နေသည်။ အစ်ကိုရော? အဆင်ပြေပါ့မလား။ အစ်ကို့အကြောင်းတွေးမိတာနဲ့ သူ မထိန်းချုပ်နိုင်စွာ မျက်နှာကိုအုပ်ရင်း ငိုနေမိသည်။ အစ်ကို မသေရင်တောင် ဒဏ်ရာပြင်းပြင်းထန်ထန်တော့ရမှာသေချာသည်။ ဘယ်လိုလုပ်မလဲ။ အစ်ကိုက သူ့ကို အသက်နဲ့ရင်းပြီး ကယ်ခဲ့တာ။ ဒီအစ်ကိုငတုံးဟာလေ သေသွားနိုင်တဲ့အန္တရာယ်ရှိတာကို ဘယ်လိုလုပ်ပြီး ဝင်ကာပေးလိုက်ရတာတဲ့လဲ။