Uni
“သား ဘာတွေလုပ်နေတာလဲ။ မေမေက အိပ်နေတယ်ထင်တာ”
မေမေ ဝင်လာတော့ သူ ကိုင်ထားသည့်ဖုန်းကိုဘေးမှာချလိုက်ကာ ပြုံးပြလိုက်သည်။ မေမေက အဘိုးပြန်သွားပြီးကတည်းက ဇာတ်လိုက်ရဲ့နေရာကိုလွှဲပြောင်းဆက်ခံကာ သူ့ကိုအနီးကပ်ပြုစုပေးသည်။ ကြည့်ရတာ သူ လင်ယူတော့မှာမို့များ သူ့အပေါ် ပိုပြီးကောင်းပေးနေသလားမသိ။
“သား မအိပ်ချင်သေးလို့မေမေ။ နောက်ပြီး ဒီထဲမှာချည်းနေရတာ ပျင်းတယ်”
“ပျင်းရင် မြန်မြန်နေကောင်းအောင်လုပ်လေ။ ခုတော့ ဆေးထိုးလည်းကြောက်၊ ဆေးသောက်လည်း ကြောက်၊ ဆန်ပြုတ်လည်းမသောက်ချင်နဲ့ ဘယ်လိုလုပ်ရပါ့မလဲ ကဲပြော။ မင်္ဂလာပွဲကဖြင့် ဒီတစ်ပတ်ထဲမှာ။ သတို့သားက နေမကောင်းနေရတယ်လို့”
ဒေါ်မြမွှေးကြူသက်က သားဘေးမှာချထားသည့်ဖုန်းဆီ အကြည့်ရောက်ရင်း ပြောမိသည်။ ဖုန်းမှာက မင်္ဂလာခန်းဝင်ပစ္စည်းလှလှကလေးတွေ ပေါ်နေတာ အဝေးကလှမ်းကြည့်တောင် ထင်းခနဲမြင်နေရသည်။ သားက နေမကောင်းတာတောင် မင်္ဂလာဆောင်ဖို့ အရမ်းစိတ်အားထက်သန်နေတာများလား။ မနေ့ကတော့ ဦးတော်ဝင်နဲ့ ပြောဆိုခဲ့စဥ်က တစ်ပတ်အတွင်းလက်ထပ်ဖို့ဆိုတာ သိပ်မြန်လွန်းသည်လို့တောင် သူမ ပြောခဲ့မိသေးသည်။
“မဟုတ်ဘူး မေမေရ။ ယင်းက သားကိုစိတ်မချလို့တဲ့။ အဲ့တာကြောင့်ပါ။ သားလည်း သူနဲ့တူတူနေချင်ပြီဆိုတော့ အချိန်မဆွဲချင်တော့ဘူးလေ။ အရွယ်ငယ်သေးတာ ဘာညာကိုစိတ်ပူတာဆိုရင်တော့ ဘာမှစိတ်မပူပါနဲ့ မေမေ။ ယင်းက စိတ်ကစားတာဆိုရင်တောင် ကျွန်တော်က ယင်းကိုထိန်းကျောင်းစောင့်ရှောက်နိုင်ပါတယ်”
ဘုရင်ပြောခဲ့သည့် စကားတွေက သူမ နားထဲမှာကြားယောင်လာသည်။ ကောင်လေးက အပြောညက်သလောက် ယုံလည်းယုံရသည်။ သားနဲ့သုံးနှစ်လောက်ပဲအသက်ကွာတာပေမဲ့လည်း ဘုရင်က အသက်ငယ်သလောက် အလုပ်လုပ်တာထက်သည်။ စီးပွားရေးလောကမှာဆို ဘုရင်က ဦးတော်ဝင်ရဲ့မြေးဆိုတာထက် ဘုရင်ဆိုသည့် နာမည်တစ်လုံးနဲ့ ပိုကျော်ကြားနေတာဖြစ်သည်။ ဒီလိုလူမျိုးနဲ့ သားကို စိတ်မချစရာတော့မရှိပေမဲ့ သားဖြစ်သူကို ကလေးလိုပဲ ထင်နေမိသေးတဲ့ ကိုယ့်ရင်ထဲမှာ သူများဆီ မြန်မြန်ကြီးပေးပစ်လိုက်ဖို့ကို နှမြောသလိုလို၊ လက်မခံနိုင်သလိုလို။ နောက်ပြီး ခင်ပွန်းဖြစ်သူကလည်း သားဆန္ဒကြောင့် သဘောတူလိုက်ရပေမဲ့ မျက်နှာတော့မကောင်း။
YOU ARE READING
Love Zone (Completed)
RomanceUni ကောင်လေးတစ်ယောက်က စာအုပ်ထဲကို ဝိဉာဉ်ကူးပြောင်းသွားပြီးနောက် ကြောက်စရာကောင်းတဲ့ ဇာတ်လိုက်နဲ့ အမှတ်မထင် တွေ့ဆုံခဲ့တယ်။ Zawgyi ေကာင္ေလးတစ္ေယာက္က စာအုပ္ထဲကို ဝိဉာဉ္ကူးေျပာင္းသြားၿပီးေနာက္ ေၾကာက္စရာေကာင္းတဲ့ ဇာတ္လိုက္နဲ႔ အမွတ္မထင္ ေတြ့ဆံုခဲ့တယ္။ Cove...
