مدللتى المكافحة

الفصل الثالث.. قرار..

#مدللتى_المكافحة..
#الفصل_الثالث..
افاقت نور من ذكرياتها على صوت طرقات الباب.. لتمسح دموعها التى انهمرت ببطء على وجنتيها.. و تعتدل فى جلستها قبل أن تأذن للطارق بالدخول ظنا منها انها قد تكون يارا او إحدى زوجات خالها..

لتتفاجأ بدخول مالك إلى الغرفه..

نور بارتباك و صدمه
:مالك؟!..

حمحم مالك قليلا ليجلى صوته و استدار ليعطيها ظهره.. لتنتبه انها لم ترتدى حجابها.. فاسرعت بارتدائه قبل أن تقول له بارتباك..
:خير ؟!.. فى حاجه و الا اى؟!..

استدار مالك مجددا بارتباك هو الاخر..
:ابدا.. انا بس كنت عايز اسالك.. انتى المفروض تبدأى دروس الثانوية العامة بكره صح؟!..

لاحت ملامح الحزن على وجه نور قبل أن ترد
:المفروض اه.. بس انا مش هروح.. كفاية عليكوا مصاريف لحد كدا..

لم تشأ اخباره بسمعها حديث والديه منذ ايام.. حينما قالتها والدته و بكل صراحه..
"احنا مش ناقصين مصاريف اكتر من كدا.. اتحجج باى حاجه و قولها ماتروحيش دروس و كفاية المدرسة و مصاريف لبسها و الكتب الخارجيه.."

جلس مالك مقابلها على السرير و تحدث بحنو
:لا انتى مالكيش دعوه خالص.. عايزك بكره تجهزى عشان نروح نحجز للدروس.. انتى ناسيه انى بشتغل و الا اى.. ؟!

نور باعتراض
:لا يا مالك.. انا مش عايزة.. اذا قدرت تتحمل المصاريف شهر مش هتقدر تتحمل التانى..

مالك
:انا مش باخد رايك.. انا بقولك بس.. و بكرة الساعة 9 تكونى جاهزة عشان نروح سوا.. اتفقنا..

نظرت له نور نظرة امتنان..  اعتراض.. حزن.. مشاعر متضاربه.. قبل أن تومئ له بهدوء و ابتسامه صغيرة ظهرت على محياها..

نهض مالك عن السرير بابتسامه
:ايوا كدا.. تصبحى على خير بقا عشان تصحى بدرى..

و خرج من الغرفة مثلما دخل.. تاركا اياها تبتسم بحزن و قلق.. فبالتاكيد والدته لن ترضى ان يصرف أمواله عليها..

^^^^^^^^^^^^^^^^^^^^^
فى صباح جديد يحمل فى طياته الكثير..
نزلت نور الدرج بسرعة و هى تلمح الجميع مجتمع على طاولة الطعام..

لمحتها دلال باستغراب لارتدائها ثياب للخروج مكونة من فستان باللون الأسود أنيق و حجاب ملون.. فهى حتى الآن لم ترتدى الألوان سوى بعض الأيام فى حجابها..

لتسالها بنبرة مستغربة
:انتى لابسه كدا ليه يا نور..؟! رايحه فين.. ؟!..

صمتت نور بارتباك.. و قبل أن ترد اتاهم جواب مالك المختصر
:مفيش هاخدها و نروح نحجز دروس للثانوية..

نظرت دلال لزوجها بحنق الذى بدوره لم يغيرها اهتمام و اكمل طعامه بهدوء.. لتحاول تغيير نبرة صوتها لتظهر و كأنها تستفسر فقط.. رغم أنها متأكده من الإجابة...
:و مين اللى هيدفع مصاريف الدروس يا حبيبي..