_______
وقفت السيارة عند قصر ضخم وجذاب
نزل السائق وفتح الباب لأبوها نزل ووقف وطل عليها وهي تتأمل ومصدومة وببالها تسأل وخاطرها مكسور: ( بيت شكبره عجز يضفني عنده قصر وراميني بخرابه وعذاب وعياله عايشين حياتهم مدلعين معززين مكرمين كرامتهم ما تنداس بلعت ريقها بغصة وسمعت صوته وهو يناديها : ريم يلا
نزلت من السيارة وايديها يرجفون والتوتر واصل عندها الف مشت ورا ابوها ووصلوا للمدخل وقفت مترددة كيف ردة فعلهم كيف راح يعاملونها امها كيف بتستقبلها وزاد احساسها بالضياع
ابوها بحنية ناداها: ريم
رفعت عيونها له وما تكلمت لانها مو قادرة تنطق من التوتر
مسك ايدها وشد عليهم : ريم اهدي اللي بتدخلين عليهم هم اهلك اخوانك وخواتك هدي نفسك علشان ما يزيد الالتهاب اللي بظهرك الله يرضى عليك
هزت راسها له وهدت شوي وخفت رجفتها
دخل ودخلت وراه ورفعت راسها ونقزت من صوت الانفجار اللي صار وثم بعدها جاء صوت تصفيق وصراخ ابتسمت بدون شعور وبداخلها ( خبلان ، انا من شفت المراجيح برا وانا غاسلة يدي )
مشعل ابتسم لابتسامتها لان ومع ابتسامتها على طول حمرت خدودها ومع قذلتها اللي نازله على جبينها وطوقها الوردي مخليها كيوت وبيبي فيس
قرب منها ومسك ايدها وباس جبهتها وابتعد ان يحضنها لانه عارف بمشكلتها وبحنية : نور البيت بوجودك يا قلبي
اختفت الابتسامة العفوية وحلت مكانها ابتسامة بارده رسمية : منور باهله
بعدها مشى مشعل وباس راس ابوه وسمعته وهو يقول له : قرت عينك يبه
رد ابوه بابتسامة : قرت عينك بشوفة نبيك .. ريم هذا اخوك مشعل الكبير هو اكبر اخوانك
ريم بطفش : تشرفنا
الاب ناظرها بنظره تحذيرية : رييم
رفعت عيونها له وشافت نظراته وعلى طول شتتها بخوف
مشعل ابتسم : طيب يا قطوة بعرفك على الباقي
ناظرته ريم وكشرت بوجهه بمعنى انه ما عجبها اسم القطوة
كتم ضحكته والتفت على : عبدالعزيز رجل اعمال ويساعد ابوي بالشركة
قرب منها عبدالعزيز للحظه حست بخوف منه هادي وساكت ولا ابتسم اول ما قرب منها ومد ايده تخيلته لوهلة انه سيف جاي لها ومعصب وناوي يضربها رجعت خطوتين على ورا ورفعت ايدها كحماية لوجهها خايفة يضربها
الكل انصدم من ردة فعلها حتى ابوها اول مرة يشوف خوفها بهالشكل هي حتى منه ما خافت ماكانت تخاف الا اذا صرخ عليها وعصب بجدية
اما عبدالعزيز مسالم لأبعد حد ناظر لملامح عبدالعزيز المصدومه ويده معلقة لا زالت
ابوها بتدارك للموقف وعلشان ما تصير لها ردة فعل مسك كفوفها وحضنها وبعدهم عن وجهها وبحنية : ريم اهدي بس بيسلم عليك عبدالعزيز
عقدت حواجبها وبهمس ما سمعه الا ابوها: عبدالعزيز ؟
ابوها بخوف: ايه عبدالعزيز يا بابا بسم الله عليك هذا اخوك ومستحيل يضربك او يأذيك
عبدالعزيز ابتسم : معليه شكلها كانت مفهية وما انتبهت وشافت شيء طويل يقرب منها وخافت ( مد يده مرة ثانية ) انا عبدالعزيز نور البيت بوجودك ياروحي
مدت يدها المرتجفه وسلمت عليه
سحبت يدها منه ومسكت ايدها وصارت تفركهم وحاولت تهدي نفسها لانه بدا ظهرها يقرصها من الخوف والتوتر والنفسية اللي بالحضيض
مشعل كمل بضيق من الموقف متأكد انها كانت تنضرب من قبل والا ما كانت ردة فعلها كيذا : وهذا
رعد يشتغل مهندس ديكور
تقدم رعد مبتسم وباس خدها : نور البيت بوجودك .. ( وباس راس ابوه ونفس ما سوى عبدالعزيز ومشعل من قبل)
رفعت عيونها لها بقهر ومسحت خدها بقرف
رعد عقد حواجبه مصدوم: افااااا
ريم بعصبية : لاتبوس وجع
مشعل وابوهم ماقدروا يمسكون ضحكتهم : ههههههههههههههههههههههههههههه
رعد بصدمة: ليه ؟
ريم : اوووففف
مشعل : احم احم ءءء وهذا فهد
قرب فهد وسلم عليها
مشعل : وهذا وليد .... وهذه سارة وهذه نور ... وهذه رغد
قربت منها رغد وهي تلعب بشعرها وبغيرة دفتها عن ابوها : بعدي عن بابا ( ومدت يدها باستخفاف )
ابوها بحدة: رغد شهالتصرفات ؟
ريم كشرت ومدت يدها وبعدت يد رغد بقوة : خلي ابوك لك انقلعي
ناظرها ابوها بصدمة من ردها وجاء بيتكلم لكن
مشعل وبصدمة تكلم يتدارك الموقف وعلشان ماتصير هوشه: وهذا حمودي الصغنون واخر العنقوود
ريم كشرت: اهلين ، ما بغيت تخلص
عبدالعزيز كتم ضحكته : قولي ما شاء الله
ريم : ما شاء الله ماني ميته عليكم
مشت وتعدتهم وجلست عالكنب وصارت تلعب باصابعها مشتته ماهي عارفة وين تروح ووش تسوي
مشعل: وين رحتي باقي امي وخالتي
ريم : تشرفت بمعرفتكم مع الوقت اعرفكم تعبت من الوقفه
خالد تكلم بابتسامة : باقي حبيبتي تقطيع الكيك
ناظرته بنظرة عادية ورجعت تلعب باصابعها وبايدها
حست باحد يجلس جنبها وشافته ابوها مسك ايديها وشد عليهم وهمس باذنها وبنبرة تراني فاهم تصرفاتك : اليوم ما تنامين الا مقصصه اظافرك ياقلبي
ناظرته بتعترض وشافت نظرة تهديد بعينه وهز راسه لها عضت على شفايفها بقهر ومن الغيض صارت ترجف ايدها شد على ايديها وبهدوء : هدّي
ريم تكلم وهي تشد على اسنانه بغيض: انت تعصبني وتقول اهدي ياخي انت مو صاحي
ابتسم ولف ايده على كتفها وحضنها له وتكلم وهو مبتسم: اولا انا مو اخوك اثنين معليه بس لانك تو جايه ومو عارفه كيف تتصرفين باسكت عن قلة احترامك هذه
ريم تنهدت: ورفعت راسها تناظرهم كلهم قاعدين جنب بعض الاولاد والبنات متجمعين
ويسولفون
تكلمت نور وبنعومة: ريم تعالي اجلسي معنا
ترك ابوها كتفها بمعنى روحي
لكن رغد تكلمت وبغيرة: ليه تنادينها خليها ما صدقت على الله يكون عندها اب وصارت تتلزق فيه
ارتفع ضغط ريم وداست على الوتر الحساس عندها
وقفت بعصبية وركضت لها ومسكتها من شعرها بيد واليد الثانية الملفوفة بشاش مسكتها من رقبتها وبقوة: اذا انتي بايعة نفسك تكلمي علي مرة الثانية ( وشدت شعرها بقوة وابوها واخوانها يحاولون فيها تبعد عن رغد ورغد تبكي تتألم) فاهمتني اياني واياك تتعرضيني لا أذبحك تراني بايعتها وما عندي شيء اخسره
تركت شعرها بقوة ورفستها على جنبها بقوة تفرغ فيه ظهرها اول ما لفت الا تقابل ابوها اللي مولع من العصبية اشر لها بمعنى قدامي كشرت وعطته ظهرها وصارت تمشي وهو وراها وقفت عند الدرج مو عارفة وين تروح مسكها ابو مشعل من ذراعها وسحبها معه للمكتب حقه ودخل وقفل الباب وهي معه
__________
بالصاله
رغد بحضن امها تصيح
والبنات هاجدين ومصدومين من اللي شافوا ما تخيلوا ابداً كل هاالكياته واللطافة يطلع منها كل هذا
نور تناظر ايدها ترتجف وبنعومة: يا ماما تخوف
مشعل ابتسم : بعد قلبي والله الخوافه مع انكم كبر بعض بس شف الفرق سبحان الله
فهد بضحكة: والله انها قوية ما توقعت تسويها وهذا وابوي جنبها تجرأت
مشعل ابتسم : ما تشوف ابوي قام على طول معها وحاول يمسكها شكلها مطلعه عيونه هناك
سارة : حرام عليكم لا تظلمونها تراها ما تنلام يعني الوضع اللي هي فيه وبيت جديد عليها واشخاص جدد هذا لحاله ضغط ما هي محتاجه احد يزيد الضغط عليها ( وناظرت رغد باحتقار)
مشعل لف على رغد وهي تصيح وصد عنها مااحد معطيها وجه لانها هي بعد غلطانه
________
في المكتب
جالسة وهو قدامها جالس وحاط كوعه على رجوله وساند ذقنه على ايديه اللي شابكهم : عطيني مبرر لتصرفك هذا
ريم سكتت ووجهها احمر وعيونها تدمع بلا شعور منها وهي تمسح وتنزل غيرها وهذا اللي مخلي ابوها هادي معها وصابر عليها
فاهمها وفاهم الضغط اللي هي فيه
عضت شفايفها وشهقت بوجع وصارت تئن : هي .... هي ( وصارت تبكي وتشهق مو قادرة تكمل كلامها)
عقد حواجبه بضيق : وش تبيني اسوي علشان ترتاحين ؟
ريم ببكى : مـ مااعرف مـ ما اعرف ارتاح انا انا مابي
ابوها: وش اللي ما تبينه
ريم سكرت فمها بكفوفها: ما ابي اعيش
فتح عيونه بصدمه وطاح قلبه ببطنه وقف وجلس جنبها ومسك راسها وحضنها حاط راسها على صدره استسلمت لبكاها وشهقاتها
تكلمت بوجع: ظـ ظـهري يعورني
ابوها: انتي الله يهديك مو مريحة نفسك اهدي وانتظري دقيقة بروح احيب شنطتك اللي فيها الدواء
ريم بشهقات: مااعرف احطه
ابوها : بنادي لك سارة اختك تساعدك
ريم: مـ مـ مابي احد
ابوها: بس خلي سارة تساعدك واوعدك ماراح تقول لأحد شيء
ريم سكتت بوجع مو قادرة تتكلم وبدت تحس كأن احد قاعد يحرق ظهرها وينبض بقوة
طلع بسرعه وراح للصالة وسحب شنطتها ونادى على سارة وقال لها تجي بسرعه
_____
سارة بصدمة: يمممه والله ما سويت شيء وراحت تركض لأبوها
رعد: شكله صاير شيء ابوي ماخذ شنطة ريم وينادي سارة شكل ريم فيها شيء
وقف مشعل بسرعة ومشى بخطوات سريعه للمكتب فتح الباب وشافه مقفل تنهد بقلق ودق عالباب وظل واقف عند الباب ينتظر
_____
داخل المكتب
دخلت سارة وتفاجئت بريم حاضنه نفسها وتبكي وعاضه يدها بقوة من الالم شافت ابوها يمشي بخطوات سريعه لريم ويمسك يدها اللي عاضتها ويحاول يقنعها تفك اسنانها عن يدها
لف عليها وناداها: سارة
سارة: ءءءء هلا
ابوها مد لها المرهم : تعالي ادهني ظهر اختك بهذا
سارة مشت واخذت المرهم اما ابوها سحب يد ريم من فمها بالغصب وشد عليهم وهمس : اهدي وتنفسي من أنفك ولا تفكرين بشيء
وقف وشغل جواله على سورة البقرة وحطه جنبها وطلع من الغرفة علشان تحط سارة المرهم على ظهر ريم
____________
..
..
...
..
نهاية البارت
🟥:... تعريف الشخصيات تعرفونهم مع الاحداث
🟥:... رايكم بالبااارت ..😉😜✌🏻 ،؟!
كومنتااات باليز ..💋💋❤️
