Part - 34
တောင်နန်းစံမိဖုရား အာရတီ၏ လျှို့ဝှက်နန်းဆောင်ထဲ ဆူညံနေသည့် ခေါင်းလောင်းသံများ။ အာရတီ့လက်ထဲ ကိုင်ထားသည့် ဓားက သွေးရည်များ လောင်းထားသည့် နဝဒေဝီစောကေသာ မိဖုရားခေါင်ကြီး၏ ပုံတူပန်းချီ ပေါ် တစ်ချက်ပြီးတစ်ချက် ထိုးစိုက်နေ၏။ ဘေးမှ နတ်ဆရာမ၏ ရွတ်ဖတ်သံတွေကလဲ အဆက်မပြတ်။
" သေစမ်း....သေစမ်း..."
" ရင်ဝနေရာကို ထိုးပါ မယ်မယ်။ ဒါမှ အစီအရင်က ပိုစွမ်းမှာပါ။ "
နတ်ဆရာမ၏ စကားကြောင့် အာရတီ ဓားကို ပုံတူပန်းချီ ထဲမှ စောကေသာ၏ ရင်ဝနေရာကို ထိုးစိုက်ချပစ်လိုက်သည်။
" အားးးးးးး!!! "
အိပ်ပျော်နေရာမှ နာနာကြင်ကြင် ကျူံးအော်လိုက်သည့် အစော။ မယ်ဇီ ကမန်းကတန်း ထွေးပွေ့ပေးရင်း...
" မယ်မယ်....မယ်မယ် ဘာဖြစ်လို့လဲ ။ "
" အ...အား နာတယ် ရင်ဘတ်အောင့်လိုက်တာ အ...အစော အသက်ရှူလို့မရဘူး...အားးးးး.... အ... အားးး "
" သမားတော် သမားတော် ခေါ် ကြစမ်း။ "
ကမန်းကတန်း ပြေးလွှားကာ ကသိုက်ကရိုက် ဖြစ်ကုန်ကြသည့် ရံရွေတော်များ။ သမားတော် များ ရောက်လာကာ ကုသပေးပေမယ့် မထူးခြားသလို သက်သာခြင်းမရှိပဲ တစ်ညလုံး နာနာကြင်ကြင် အော်ငိုနေရသည့် အစော ။
" အားးးး...."
နဝဧကရာဇ် နန်းဆောင်ထဲ ခပ်သွက်သွက် ဝင်လိုက်သည်နှင့် ကြားလိုက်ရသော အစော၏ နာနာကြင်ကြင် အော်သံကြောင့် လူက ဟင်ခနဲ။ ကမန်းကတန်း ဝင်လာရင်းမှ မယ်ဇီ့ လက်ထဲ ပျော့ခွေနေသည့် အစောကိုယ်လေးကို ပွေ့ယူဖက်ထားရင်း.......
" ဘယ်လိုဖြစ်တာလဲ.... သမားတော်ကြီး အစော ဘာဖြစ်တာလဲ။ "
" မိဖုရားခေါင်ကြီးက ကျန်းမာနေပါတယ် အရှင်မင်းကြီး ။ ကျွန်တော် မျိုး ရောဂါရှာလို့ မရပါဘူး။ "
" အသုံးမကျလိုက်တာ...."
" ခွမ်း!! "
ဒေါသတကြီး ထအော်လိုက်သည့် နဝဧကရာဇ် ကြောင့် သမားတော်များ ကြောက်လန့်တကြား ဖြစ်သွားရသလို လှမ်းပစ်ပေါက်လိုက်သည့် ပန်းအိုးကြောင့် ဒူးတွေပင် တုန်လာရသည်။
