المقدمة :-
عائلة الحاج محمود :
الحاج حالته المادية ممتازة وتاجر معروف في مجال الذهب والتجارة وعنده رزق واجد متزوج وعنده 5 اعيال ؛ 3شباب و2بنات والحاج طبعه واعر وحنون مايحبش الغلط وكلمته هي الي تمشي علي الكل ومتزوج من الحاجة مبروكه وهيا حنونه بكل في كل العائلة والحاج كبير خوته وحوشهم ديما مليان اقاربهم واحبابهم ونتعرفوا علي ابناء الحاج محمود :
احمد : متزوج وعنده بنوته وزوجته نسرين تقعد قريبته واحمد يشتغل مع باته في التجارة وهو ماسك الشغل بعد باته واحمد شخصيته حنون واجد وطيب وقريب من الكل
وداد : متزوجه وعندها بنتين وعيل وزوجها يكون ابن ولد عم الحاج اغلب الوقت مسافر شغل وهيا تقعد عند اهلها طبعها هادية وفي حالها ومتخرجه من كلية الاداب بس ماتشتغلش
صلاح : عازب وماسك فرع من محلات باته بحكم انه متخرج من كلية الاقتصاد قسم محاسبة طبعه يحب الضحك والبصارة بس وقت يعصب معش يحق شي قدامه وهو مرتبط بواحدة ويحبها وناوي يخطبها
خالد : خاطب ويشتغل في مصرف في قسم المالية وبعيد عن شغل باته وخاطب اخت رفيقه برانيه عنهم وكلهم استغربوا موافقة الحاج عليها عشان الحاج يفضل ياخذ لعياله من اقاربه واهله عشان المشاكل
صفاء : اخر عنقود الحاج ودلوعت الكل وجوها كله ضحك ولعب وحنونه علي الجميع وتقرا كلية العلوم اول سنة لها
احمد : تي ياخالد هيا وقت وانت ديما معطلنا
الحاجة : بسرعة يافرخ كان يجي الحاج يوريك
خالد : تي طلعنا هااا كنكم طايرين
احمد : تي وقت بنعدو شور عمك الحاج يستنا فينا اطلع يابارد
خالد : هيااا هاااا
نتعرفوا علي اخوة الحاج محمود :
** محمد : اصغر من الحاج محمود حالته المادية متوسطه وشغله مع الحاج محمود ومحمد متزوج من هند وقعد سنيين وهو بدون اعيال ورغم هضا كله رفض يتزوج علي هند ويزعلها ويقهرها رغم ان هيا بروحها قالتله تزوج بس رفض وبعد فترة طويله ربي جبر خاطرهم ورزقهم ببنت واحدة وبعدها هند تعبت وحولولها رحم وهك قعد عنده بنت نتعرفوا عليها :
ايه : وحيدة محمد عمرها 17 سنة تقرا في شهادة ثانوية شطورة وطيبه وحنونه ومشاغبه وتحب الضحك ودلوعة اهلها ومافش اوضح منها ماتحبش تجامل ولا تجرح حد وعلاقتها كويسه بالجميع
** صابرين : اصغر من محمد ارملة ربة بيت توفي راجلها بسبب جلطة وساعدوها خوتها توقف علي رجليها عندها من المرحوم :
علي : يشتغل في شركة محاسب وطبعه طيب وحشومي ومايحب يزعل حد
ايناس : تقرا تمريض وطيبه وحنونه وتحب الضحك
** زكية : اصغر من صابرين ولسانها واعر متزوجه وراجلها منصور ماعندش خلطه بالعائلة واجد ديما يشتغل برا المدينة عنده من زكية :
حسام : عازب يشتغل في معرض سيارات وطبعه في حالة قاعد
سحر : تقرا في اقتصاد اخر سمستر وطبعها مزاجية ولسانها جارح زي امها
الاء : تقرا في تانية ثانوي وتحب الضحك والبصارة
** نوال : اصغر خوات الحاج ومتزوجه تاجر وتسكن برا ليبيا لها فترة عندها عيلين هما
محمد : يقرا في تقنية المعلومات وعاجبه الجو برا دهورة وصياعه
محمود : يقرا في الصيدالة ومنطوي بروحه عنده قرايته اهم شي
هذي اول الشخصيات في الرواية وباقي الشخصيات نتعرفوا عليهم مع السرد الاحداث في الحلقات وتحياتي #سنيورينآ آآ
