التوأمتان

الفصل الثالث

دلف آدم ومن خلفه سندس التي كانت تنظر له بقلق فوجهه يظهر عليه الغضب الشديد مما أدى إلى استنتاجها أن يومها لن يمر بسلام نظر لها آدم بهدوء مصطنع :
- أنا عاوز اعرف حاجه واحده بس ، هو ده اللي مبعملش مهمات فيها خطر خالص ده أنا مجرد هكر وتطلعى انتِ الطيف ، لا وايه منيماني على ودني ومش محترماني حتى .

هزت سندس رأسها نافية تغمغم :
- انت عارف أنا بحترمك ازاي يا آدم بس أنا عارفه انت بتخاف علينا ازاي وأكيد كنت هتقف قصادي لو كنت عرفت حاجة زي كدة .

نظر لها آدم بقلق ظهر جلياً في مقلتيه :
- أنا خايف عليكِ خايف أخسرك انتِ كمان زي ما خسرنا بابا وماما ونور أنا مليش غيرك انتِ وندى أصلاً ، ولو واحدة فيكوا حصلها حاجه أنا مش هتحمل يا سندس .
اقتربت منه وهي تعانقه بقوة :
- أنا عارفة يا آدم بس برضو أنا كبيرة كفايا وأقدر احمي نفسي كويس جداً على فكرة .
ابتلعت لعابها ثم استرسلت حديثها مازحة :
- وبعدين حتى لو مش عارفه أحمي نفسي اديني بقيت معاك أهو يعني هتقدر تحميني كويس ولا تكونش خسعت ومش هتقدر تحميني ولا ايه ؟

ابتسم آدم بيأس فسندس ستظل هكذا ، ستحاول فعل أي شيء فقط لإنهاء هذا الحوار الغير مُجدي بالنسبة لها :
- نفسي افهم هتبطلي لماضة وطولة لسان امتى ؟

- هقعد شهر يمكن أكتر لسة بفكر .

نظر لها آدم بملل ليسألها :
- طب هتعملي أكل ايه النهاردة عشان أنا تعبت انتِ محدش يعرف ياخد منك عقاد نافع أنا عارف .

- هو لازم تاكل النهاردة ؟

نظر لها بوجه تعلوه ملامح التهكم مما أدى لانطلاق ضحكاتها تردف من بينهن :
- خلاص خلاص هعمل ملوخية وأرانب ، ده انت ربنا يكون في عونها اللى هتتجوزك لو نسيت تطبخ يوم .

نظر لها آدم بحنق :
- ليه هو انتِ فاكرة إني هعاملها زي ما بعاملكوا ولا ايه وسرعان ما ارتسمت على ثغره ابتسامة حالمة :
- هي توافق بس وأنا لو قدرت أجيب الدنيا كلها تحت رجليها هعمل ده .

نظرت له باستهجان تجيبه :
- لاحظ إنك بتتكلم عن صحبتي ، ذفياريت نلم نفسنا شوية عشان ما ازعلكش .

كاد أن يجيب ولكن منعه صوت هاتفه الذي أعلن عن اتصال أحدهم به نظر ليجده عاصم ليجيب عليه ليتحدث عاصم بهدوء :
- بقلك ايه فاضي شوية ؟

- ايه هنشرب قهوة في حتة بعيدة ولا ايه ؟

- لا يا خفة عاوزك في حوار كدة فاضي ولا ايه ؟

- اه فاضي مسافة السكة وهجيلك ابعتلي اللوكيشن بس .

- خمس دقايق والاقيك قدامي .

أنهى حديثه ليغلق الهاتف دون سماع رد الآخر مما دفع آدم أن يغمغم بحنق :
-  بنى ادم براس بخاخه
نظرت له سندس تسأله بتعجب :
- خير في ايه ؟