التوأمتان

الفصل العشرون

الجميع يركض بهلع خلف ذلك السرير المتحرك حيث يُؤخذ نحو غرفة الطوارئ وبجواره شقيقتيه وعبرات كلتيهما تتسابق للنزول من بين عينيهما كأمطار في ليلة عاصفة ، وبالفعل كانت كذلك عليهما فهاهو حصنهما الأخير مُلقى على السرير ينازع للبقاء على قيد الحياة ، ظلتا تركضان بمحاذاة السرير حتى وصلتا إلى غرفة الطوارئ لتتوقف ندى موضعها على عكس سندس التي كادت أن تتبعه لولا كف ندى الذي أمسك برسغها لتحادثها بنبرة متحشرجة إثر بكاءها :
"ما ينفعش تدخلي أكتر من كدة يا سندس ده آخرنا"

نظرت لها سندس بهدوء لتقترب منها تعانقها بقوة ، بينما الأخرى كانت وكأنها كانت تنتظر هذا العناق كي تخرج جميع مكنونات صدرها فهي ظلت تبكي بقوة داخل أحضان توأمتها ، بينما الأولى كانت تنظر للفراغ بعينين خاويتين تجاهد لكتم عبراتها .

مر وقت لم تستطع العلم به ، كانت تجلس بحزن ومازالت تعانق شقيقتها التي غفت بين أحضانها وبجوارها نيرين التي كانت تبكي بصمت حتى خرج الطبيب ليركض الجميع نحوه لتسأله سندس بلهفة :
"ها يا دكتور حالته عاملة ايه ؟!"

نظر لهما الطبيب بأسف يجيبها :
"للأسف الخبطة كانت قوية وأدت لحدوث ضمور في الكبد وهنحتاج إننا نزرع فص كبد في أسرع وقت ممكن"

نظر له الجميع بيأس حتى صاحت سندس مسرعة :
"أنا فصيلة دمي O negative يعني مانح عام ، بس في مشكلة أنا مريضة هيموفيليا مش عارفة هينفع ولا لأ"

نظر لها الطبيب يجيبها بعملية :
"الموضوع بيعتمد على نسبة الهيموفيليا عندك قد ايه ، يعني لو مش قوية أوي وبتاخدي أدوية وبتقدري تسيطري عليها ممكن أدخلك ، بس بصراحة الموضوع مش هيكون بالسهولة اللى أنتِ متخيلاها ، لازم هيكون متواجد دكتور أوعية دموية واقف ده غير مضادات النزيف اللى هتاخديها ، والموضوع هيكون على مسؤوليتك عشان لو لا قدر الله حصل أي مضاعفات"

هزت رأسها بموافقة تجيبه :
"ما عنديش مانع أنا عندي استعداد أمضي على الإقرار اللى أنت عاوزه بس نعمله العملية في أسرع وقت ممكن ، دلوقتي لو حابب أنا معنديش مانع"

نظر لها الجميع بعدم تصديق بينما ردعها الطبيب بقوله :
"حيلك حيلك ، ما ينفعش دلوقتي حالًا طبعًا ، لازم نعمل تحاليل الأول ليكي وليه ونخلي دكتور أوعية دموية يتابع ولو كدة هندخله مستعجل ، بس أنا مش هقدر أجازف بحد فيكوا بصراحة ، خصوصًا إن المتبرع الوحيد اللى قدامي مريض هيموفيليا دي كارثة ، أكيد أنتِ فاهمة حاجة زي كدة"

أومأت له سندس بجمود بينما نظر لها الطبيب يحادثها بهدوء :
"هنحتاج بس نسحب عينة دم منك عشان نشوف التحاليل وأنا هشوف دكتور أوعية دموية يباشر معاكي من دلوقتي ، أما بالنسبة لأستاذ آدم فأنا هسحب منه عينة دم عشان أقيس السكر ولا م هنقيس الضغط وكل ده ، بس قبل أي حاجة هو عنده أي مرض مزمن ، أو حتى هيموفيليا زي حضرتك ؟!"