التوأمتان

الفصل السادس عشر

دلفت نيرين بخطوات رتيبة تنظر للجميع ببرود ، بينما كان الجميع يناظرها بأفواه مفتوحة من شدة الصدمة عدا سندس التي اتكأت بظهرها على كرسيها تبتسم بخبث شديد تغمغم :

"كدة برضو يا تعبان ما تقوليش ليا إنك ناوية نعيد الأمجاد تاني سوا !!"

ابتسمت نيرين بهدوء تستقل أقرب مقعد لها وهي تغمغم ببرود :

"ومن امتى والطيف والتعبان مش بيبقوا سوا ، انتِ اللى افتكرتي إنك هتخلصي مني ، بس لا أنا قاعدة على قلبك يا سندس"

أرجعت سندس ظهرها تستند على كرسيها تبتسم بخبث لشقيقها الذي لم يخرج من صدمته بعد يتحدث بتعجب :

"انتِ كنتي عارفة صح ؟!"

اتسعت ابتسامتها تجيبه بمراوغة :

"لو قصدك على إني كنت عارفة إنها التعبان فده أكيد ، لكن لو قصدك على مجيذها هنا فلأ للأسف مكنتش أعرف"

كاد آدم أن يجيب ولكن منعه باسل الذي تحدث منهيًا هذا الحوار على الأقل في الوقت الحالي :

"طب معلش يا جماعة ممكن بس نسيبنا من التعارف ونركز في الشغل الأول"

تحدث حسين بسخرية شديدة فهم لا يفلحون في شيء قدر الخروج عن كافة المواضيع المهمة والإنشغال بأي شيء آخر :

"لا يا راجل ودي تيجي برضو كملوا كلام والشغل يولع عادي اتفضلوا كملوا ، تحبوا أخرج لحد ما تخلصوا كلام لأحسن أكون بسببلكوا إزعاج مثلًا لا سمح الله"

حاول وليد كبت ضحكته يجيب حسين :

"معلش يا فندم احنا آسفين مكانش قصدنا ، كل الحكاية إننا اتصدمنا شوية بس مش أكتر"

تنهد حسين بقلة حيلة ينظر لسندس يسألها بجدية :

"قولتيلي إنك عندك معلومات مهمة انتِ ووليد ايه هي ؟!"

اعتدلت سندس في جلستها تنظر لحاسوبها المتنقل تعبث بأزراره بينما تغمغم :

"اكتشفت شخصين كمان بيشتغلوا مع البوص بس دول شغلهم أكبر شوية من شغل أمجد ، تقريبًا كدة أمجد كان بيعمل تفاهات مقارنة بشغل الاتنين دول"

ضحك عز بسخرية يسألها مستنكرًا ما تفوهت به :

"تفاهات ، عاوزة تفهميني إن التجارة في البنات وتهريب المخدرات بالنسبة لك دول تفاهات أومال ايه ليفل الوحش عندك معلش ؟!"

ابتسمت سندس ببرود تجيبه :

"مبدأيًا أنا ما قولتش إنها تفاهات بالنسبة لي أنا قولت تفاهات مقارنة بشغل الاتنين دول ، واه على فكرة أنا بتكلم جد ما هو عمرنا ما هنجيب تجارة الأعضاء لتهريب شوية هروين وتهريب كام بنت ولا انت ايه رأيك ؟!"

كاد عز أن يجيب ولكن منعه عاصم الذي نظر لهما يحادثهما بتعجب :

"انتو بتقولوا ايه انتو الاتنين بجد ، انت بتعلوا على بعض من أسوء من التاني ما الاتنين زفت وزبالة ولازم كلهم يقعوا سواء بقى بتوع الأعضاء او بتاع المخدرات والبنات اللى وقع فعلًا !!"