make you mine (KH)

18

#វែមផាយ៍ទន្ទ្រានបេះដូង
ភាគទី១៨

ទ្វារអាផាតមិនចាប់បើកឡើង ទាក់ទាញចំណាប់អារម្មណ៍របស់អ្នកទាំងពីរដែលអង្គុយរង់ចាំនៅខាងក្នុង។ ស៊ុងមីនិងថេយ៉ុងចោលភ្នែកសម្លឹងមើលជីនដែលកំពុងតែឈានជើងដើរចូលមកក្នុងផ្ទះ ដោយដៃម្ខាងដែលគេប្រើមករុញទ្វារនោះមានកាន់នូវកាបូបយួរដៃរបស់គេ ឯម្ខាងទៀតក៏ឃើញមានទ្រកូនសត្វចិញ្ចឹមដែលគេទើបតែយកមកធ្វើជាកម្មសិទ្ធកាលពីព្រឹកមិញនេះឯង។
ស៊ុងមីកាលបើបានឃើញពីវត្តមានរបស់កូនឆ្កែសម្បុរពីរពណ៌នោះហើយ នាងក៏ស្រាប់តែចុះចេញពីលើសាឡុងរត់មករកជីនយ៉ាងលឿន។ អរគុណដល់សមត្ថភាពពិសេសរបស់នាង ទើបប្រើពេលត្រឹមតែមួយប៉ប្រិចភ្នែក ស៊ុងមីក៏អាចមកឈរនៅពីមុខអ្នកកម្លោះបានយ៉ាងរហ័សទាន់ចិត្ត។

"កូនឆ្កែ! លោកបានវាមកពីណា? គួរឲ្យស្រឡាញ់ដល់ហើយ~" ជីនឮហើយភ្ញាក់ស្ទើរតែលស់ព្រលឹងក្លាយទៅខ្មោចទីបីនៅក្នុងផ្ទះនេះ។ ស៊ុងមី តិចរត់ទៅនេះ តិចរត់ទៅនោះ នៅជុំវិញខ្លួនគេ មិនខុសពីកូនឆ្កែដែលកំពុងតែបក់កន្ទុយនៅលើបាតដៃក្រាស់របស់ស៊ុកជីននោះទេ។
ជីនឃើញនាងរំភើបដូច្នេះ ភាពស្ដាយក្រោយមួយចុងក្រចកដែលគេមានកាលពីព្រឹកក៏ហាក់រលាយរលត់បាត់ទៅត្រឹមមួយរំពេច។ ទឹកមុខអ្នកកម្លោះប្រែទៅជាទន់ភ្លន់ជាងមុន បេះដូងលួចរីកមាឌនៅពេលឃើញស្នាមញញឹមសប្បាយចិត្តរបស់វែមផាយ៍ស្រីនៅចំពោះមុខនោះ។
ថេយ៉ុងដែលនៅខាងនេះវិញក៏អង្គុយនៅកន្លែងដើមយ៉ាងស្ងាត់ស្ងៀម គេយកបាតដៃច្រត់មុខ ដោយមានកែងដៃផ្អែកនឹងក្បាលសាឡុង ភ្នែកមុតមាំចាប់យកអ្វីៗគ្រប់យ៉ាងដែលកើតឡើងនៅនឹងមុខ ដូចកំពុងតែមើលរឿងភាគ។
ស៊ុកជីនហៀបនឹងហុចកូនឆ្កែឲ្យទៅស៊ុងមីកាន់ជំនួសទៅហើយ ប៉ុន្តែនៅមុនពេលដែលវាអាចបានទៅដល់ដៃនាងនោះ សំឡេងព្រុសយ៉ាងកាចរបស់កូនសត្វនេះក៏ស្រាប់តែបន្លឺឡើងមកខ្លាំងៗ ធ្វើឲ្យស៊ុងមីរហ័សដកដៃចេញវិញយ៉ាងលឿន។
ស្រីតូចធ្វើមុខភ្លឹសៗសម្លឹងមើលរបស់តូចតាចនោះទាំងគិតមិនយល់។ មានរឿងអ្វីកើតឡើង? ហេតុអីកូនសុនខមួយក្បាលនេះបញ្ចេញប្រតិកម្មខ្លាំងដូច្នេះ?
ស៊ុងមីមិនខ្លាចភ្លើង បន្ទាប់ពីប្រសព្វភ្នែកអស់មួយសន្ទុះធំជាមួយសត្វឆ្កែនោះហើយ នាងរកឈោងដៃទៅទទួលវាពីជីនម្ដងទៀត។
តែចុងក្រោយក៏ទទួលបានសំឡេងព្រុសមកវិញកាន់តែកាច កាន់តែខ្លាំងជាងមុនទៀត ធ្វើឲ្យស្រស់ស្រីអត់មិនបាននឹងគេចចេញទៅម្ខាង លាក់ពួនពីកូនសត្វដែលមិនដឹងអីនោះ។