"သမီး အပြင် ခဏသွားဦးမယ် မေမေ"
"မာန်လာခေါ်မှာလား သမီး"
"မဟုတ်ဘူး မေမေ သူ နောက်မှ လိုက်ခဲ့မှာထင်တယ် ပန့် အိမ်မှာပဲ ဆုံဖို့ပြောထားလို့လေ"
"ပြီးတာပဲ မကြာစေနဲ့နော် ကား ဂရုစိုက်မောင်းဦး"
"ဟုတ်ကဲ့ မေမေ သွားပြီနော်"
မေမေ့ကို နှုတ်ဆက်ပြီး သူမ ထွက်လာခဲ့လိုက်သည်။ နောက်ကြည့်မှန်ကနေ လှမ်းကြည့်တော့ မေမေက သူမကို စိတ်မချစွာ လှမ်းကြည့်နေရှာ၏။ မေမေ့ စိတ်ထဲမှာ သူမက အခုချိန်ထိ ကလေးဖြစ်နေတုန်း။ အမေတစ်ခု သမီးတစ်ခု ဘဝမို့ သူမကို အချစ်ပိုတာလဲ ပါမည်။ ဖေဖေဆုံးသွားကတည်းက ဘယ့်သူ အကူအညီမှမပါပဲ မေမေတစ်ယောက်တည်း သူမကို စောင့်ရှောက်ခဲ့ရသည်မို့ မေမေ့ကို သူမလေးစားချစ်ခင်သည်။
"ကျွီ......အမလေး"
ဘရိတ်ကို ဖိနင်းလိုက်ရင်း ထိတ်လန့်စွာ အော်မိသည်။ အတွေးလွန်နေတာကြောင့် အကွေ့ကနေ ထွက်လာတဲ့ ကားကို မမြင်မိ။ တစ်ဖက် ကားပိုင်ရှင်ကိုတောင်းပန်ရန် ကားပေါ်က ဆင်းလာခဲ့လိုက်၏။ ကားကိုကြည့်လိုက်တော့ နည်းနည်းလေး ပွန်းသွားတာလွဲလို့ ဘာမှမဖြစ်တာမို့ တော်သေးသည်။ မဟုတ်ရင် အဲ့ဒီကားအကောင်းစားကြီးကို ပြန်ပြင်ပေးရရင် မလွယ်။
ကား အတွင်းထဲကို လှမ်းကြည့်တော့ မှန်အမည်းတွေနှင့်မို့ ဘာမှမမြင်ရ..။ ဘေးကိုလျှောက်လာခဲ့ပြီး ကားမှန်ကို ခေါက်လိုက်တော့ တဖြည်းဖြည်း အောက်ကို လျှောကျလာသော မှန်နှင့်အတူ သူမ ရင်းနှီးနေသော မျက်နှာတစ်ခု ပေါ်လာ၏။
"ဟင်...ဦး"
သူမစိတ်ထဲ ခေါ်နေကျ နာမ်စားလေးကို ခေါ်လိုက်မိရင်း သူ့ကို အကြာကြီး စိုက်ကြည့်နေမိသည်။
"ဟေ့...ဒီမှာ"
"ရှင်"
"မင်း ကားကို ဖယ်မပေးတော့ဘူးလား"
"ရှင်..ဟို ဟို ကားက နည်းနည်း ပွန်းသွားလို့......"
"မင်း ကားလား"
"မဟုတ်...."
"ရော့ ဒီလိပ်စာကဒ်ထဲက ဖုန်းနံပါတ်ကို ဆက်လိုက် အခုတော့ မင်းကားကို ဖယ်ဦး ကိုယ် ဒီမှာ အရေးကြီးနေလို့"
YOU ARE READING
တိတ်တခိုး ချစ်ရသော....❤️
Romanceတစ်နိုင်ငံလုံးမှာသာမက ပြည်ပအထိ ထူးချွန်အောင်မြင်တဲ့ လူငယ်စီးပွားရေးလုပ်ငန်းရှင်တစ်ယောက်၊ အလုပ်ကလွဲပြီး ကျန်တာ စိတ်မဝင်စား၊ အမြဲအေးတိအေးစက်နေတတ်တဲ့ ရှိန်း....❤️ ဂျာနယ်ထဲကတစ်ဆင့် အမှတ်မထင်တွေ့ပြီး ရှိန်းကို စိတ်ဝင်စားသွားတဲ့ သာမန်တက္ကသိုလ်ကျောင်းသူလေး...
