بعد ساعة كانوا قد انتهوا من تناول الإفطار و تضميد جراحهم و حان وقت الحديث
"اتفضل يا أستاذ فارس فهمنا " تساءل مازن
ابتلع لعابه ليبلل حلقه الذى جف ثم بدء يشرح لهم بهدوء "معرفش عنه حاجه غير أنه اسمه سالم الدويري ، بس غالبا بيشتغل في الممنوعات وأنا بحركة غير مقصودة وقفت شغله فكان بيعاقبني"
"بطريقة غير مقصودة ازاي يعني مش فاهم "
سعل عدة مرات ثم تجرع قليل من المياة قبل أن يسترسل "كان معايا على الطيارة واحد من رجالته و غالبا كان بياخد تست مخدرات كـ عينة فـ انا شوفتهم وبلغت الأمن تحت،بس غالبا بلغت بصوت عالي شوية فعرف إني أنا .. الكلام دا بقاله أسبوع اتفاجئت بيهم امبارح بيقطعوا طريقي وحصل اللى حصل"
"يعني كانوا ناويين يضربوك وبس ولا يقتلوك ولا يخطفوك ولا ي.." تساءلت ليلى
"ي إيه خلاص مفيش ي.. تاني خلصتِ كل الإحتمالات" قاطعها فارس
ليضحك مازن وهو يردف بمكر "لا يسطا لسه فى احتمالات تانية بتبدأ بالياء بردو"
"ايه الإحتمالات دي " تساءل عز ليجيبه مازن
"فكر شوية " تركه يفكر بالفعل ثم عاد إليهم ليكمل حديثه
" غالبًا كان عايز يقتلك لأن لو ضربك بس مكنوش جريوا ورانا امبارح "
عدل من موضع قطعة القطن الموضوعه بأنفه مُنذ أمس لتوقف النزيف ثم حك ذقنه قليلًا وهو يعتدل في جلسته و يوجه حديثه لـليلى:
"بمناسبة امبارح، أنا بشكرِك جدًا على اللي عملتيه معايا من غيرك معرفش كان ممكن يعملوا فيا إيه "
ابتسمت له بإمتنان ممزوج بالخجل لتضع خصلات شعرها خلف أذنها وهي تتمتم "لا شكر على واجب اى حد مكاني كان هيعمل كدا "
"لا مش أى حد أنا كنت واقف و شايف وعدى عربيات كتير محدش ساعده غيرك " تحدث عز بعد أن فشل في معرفة الإحتمالات الأخرى
''كنت إيه ياعنيا! " تساءل فارس وهو وقد ارتفع حاجبه بتلقائية
بلل عز شفتيه بعد أن أزدرد ريقه وقد أدرك ما تفوه به للتو "إيه " تساءل عز في محاولة لترويغ الحديث
"إيه قول تاني كدا ! " كرر جملته فارس ليجد الآخر يكمل
"مين ! تقصدني أنا ! "
"ايه ياست نانسي هتكمل الألبوم، بقولك أنت كنت إيه ! "
"ك..كنت واقف "
"يعني أنت كنت واقف و شايف كل حاجة من الأول و مفكرتش تدافع عنى، الله يرحمك يا رجولة " أردف فارس بأسف
ليعدل الآخر من وضع نظارته وهو يبرر بارتباك "أصل .. أصلهم كانوا كتير و ضخام أوى بصراحة خوفت "
فسر عز موقفه إلا أن تفسره لم يزيد الوضع الا سوءا حيث سخر مازن" يعني هي مخافتش وأنت خوفت يعني على الرجالة"
أنت تقرأ
Fantastic Five🦋
Romanceرواية FANTASTIC Five PDF بقلم حياة عادل ... رحلة كوميدية شبابية فى شوارع باريس مع خمس اشخاص مطاردين من قبل رجل الأعمال المعروف سالم الدويري، بعدما قام أحدهم بخطف ابنته يسر الدويري، ليتفاجئ الجميع أن يسر ليست مجرد فتاة عادية؛ بل هي فتاة تحمل شيطان بد...
