لكل بداية نهاية
واجوي بس سياره الزفه ويمكن وياها سياره بيها النسوان مثل كُل الاعراس اجه خطيبي لزم ايدي حيل واني..........
البارت 1
بقلمي الكاتبه بنين .....
ملاحظه : الاسماء غير حقيقيه لئن اصحاب القصه محبو يعرفون ع اسمائهم
السلام عليكم ماحبيت اذكرلكم اسمي بس انتو سموني حياة طولي حلو وملامحي كُلش نازكه وتجذب شفاف صغار ومتروسه خشم صغير عيون كبار جسمي حلو تارس لون بشرتي حنطاوي
ح أحجيلكم قصتي
حياتي كملتها كُلها تعب بتعب بس مو تعب من شغل أو شي لا تعب بتفكير تعبت واني ماعرف شي على الدنيا وخصوصاً اني مدارسه ولا شايفه شي عن الحياة خارج البيت خلصت عمري كله كاعده بلبيت وباوع على الناس شلون عايشه واني التفكير كاتلني لا عندي شهاده ولا شي بس اني كلشي أعرف حجاياتي حلوه بس من اشوف واحد يحجي على الدراسه اموت انقهر بس ما بيدي شي جنت عايشه يم اهلي عائله كبيره تتكون من خمس اخوان وسبع بنات وأم وأب ماراح اسولفلكم على اهلي اضن هذا شي خاص بيهم كبرت وصار عمري ١٦ سنه خطبتني خالتي ابنها أجذب عليكم اذا كولتلكم اعرف شي شنو الخطوبه وشنو العرس كل الأعرفه البس بدله وأروح للصالون المهم صارت السالفه ابسرعه وأجت خالتي حاجت اهلي واني مادري ثاني يوم جابو الوالد يشوفني وأمه وأخواته وأخوته وأجو المهم مرت اخويه نطتني فستان لبسته وحطتلي مكياج خفيف واني ماعرف شي كوه خلوني اطب جوه المهم طبيت سلمت وكعدت بس ابد ماباوعت عليه مادري هوه شافني لا راحو وره يومين اجت خالتي كالت الخطوبه ونيشان بعد يومين هاذا الحجي صادف يوم سبت يعني الخطوبه راح تصير يوم الاثنين واني فرحانه ماعرف شي وصدك صار الاثنين ورحت للصالون اول مره احط مكياج بوجهي وفرحانه على البدله لبستها وكملت ورجعنه للبيت صارت الساعه بلخمسه اجو بيت خالتي كُلهم والمعازيم واني فرحانه على هاي الهوسه بس ما أعرف شي لا على الخطوبه ولا على العرس كالو خل تلبس عباه وتجي حته نعقد مهم اني صرت وره الباب والسيد حاجاني وسئلني انتي موافقه كلت ااي موافقه هلهلت خالتي وراحو الزلم وصارت حفله مال نسوان وناس تركص وأخواتي فرحانات ويركصن حته اني ركصت وفرحانه شنو هااي الحفله كلها علمودي واهلي جابو الكيك والبيبسي و اجه خطيبي......................................
كعد بصفي هم ماكدرت اباوعله ولا حجيت وياه حته من لبسنه الحلقات ما باوعت عليه اخاف اذا اباوع عليه عبالي ميصير واكلني كيك واني هم وكلته كيك ومدنكه صارت الحفله وكملت وأخواتي بقن يمنه والبيت هوسه من الناس حسيت كلبي دك اول مره احس هاذا الأحساس رجال يكعُد بصفي واني لا طالعه ولا شايفه ااي احد لا ولد عم ولا ولد خال بس خطيبي طب بكلبي وبنيت وياه احلام من اول يوم اجه ثاني يوم وأخواتي وفرحاناتلي نسيت اكلكم قبل النيشان بيوم اجت خالتي وكلت لمي امشي ناخذ البنيه نشتريلها حلقه ومحبس على كد فلوسنا اهلي أنطوني وكالو لعيالي منريد شي رحت ويه خالتي طبينه محل الذهب ما اعرف الذهب وليش الوحده تلبس ذهب وشيريد تسوي المهم خالتي جابتلي حلقه ومحبس حلوات بس كلش خفيفات وجابتلي وياهن جان بوكتها نازل الذهب البرازيلي جابت اكلاده ومحبس بس اني جنت يم اهلي كُلشي عندي يعني امي جانت مدللتني لان اني أصغر وحده وخلص النيشان ثاني يوم النيشان نكسرت الحلقه بيدي جانت حيل خفيفه كمت ارجف شكول الخالتي ورحت لامي وأمي كالت الخالتي وخذت خالتي الحلقه وبدلتها ابحلقه اثكل اشوي ويوم عيد الحب كالن أخواتي وراحن هنه يجيبن هدايه لأزواجهن وامي اجت جايبه وياها الي هم هديه وكالت تنطيها لخطيبج واني ماعرف أصلان يعني شنو عيد الحب خلصت حياتي كلها العب لعاب لو ويه اخواني واحد أكبر مني بسنه وثاني ازغر مني بسنه فرحت واخذت الهديه وضميتها خابرت خالتي كالت راح اجي واني طايره بالسمه بس ماعرف اذا اجه شحجي وياه وشكوله كمت سبحت وبدالت ومكيجت واجت خالتي طب هوه وياها واني الفرحه ماشايلتني بقن امي وخالتي يحجن شوي وكامن كالت خالتيكالت خالتي لامي خل نعوفهم وحدهم كعد هو وجايب وياه حافضه مال اكسسوارات على شكل معرض بس حيل عجبتني بس هذا خالتي جايبته وياه عروسه وعريس تحفيه بس هوه جايبلي ورده حمره وكاتب على الكارت. تقبلي تواضعي...
جان خطيبي يدرس سادس أدبي بس بس بوكتها اعتبروهم غاشين ورسبوهم قبل خطوبتنا واني كاعده م حجيت ويا كلمه حاول يخليني احجي بس اني ساكته حالي حال الخرسه ومل من المحاوله من شافني م احجي رجع لخالتي وخالتي هي اتكفلت اشيل كل مصاريفنه واجه وره يومين هم ماحجيت بس اي ولا يطلعن من الساني وره اربع ايام دز بيد خالتي تليفون بوكتها جان تليفونات التؤم اسمهن اتصالنا يعني اشتراك شهري وهوه شد الشهر كام يخابرني واني اي لا طلعت روحه مني ورا 3 أشهر من الخطوبه بديتاحجي ويا طلع ضايج من البيت بس كلي والعباس احبج يمكن صدوك تعلق بيه وحبني وراح واني الفرحه ماشايلتني شنو هااي الكلمه هيج حلوه ومر على خطوبتنه 6 أشهر واني متغير شي بيه فجئه كالو العرس بعد يومين بس منسوي عرس جيرانا اتوفه بسوريا وجابوه اني ماعرف شنو العرس صدك اجت وحده من خواتي حضرتني ورحنه اجرنه بدلات وصالون جان اكو صالون جديد مفتح خالتي اتفقت وياها وهيه هم اتساهلت ويه خالتي واني كمت حضرت غراضي بجنط جان كُلشي عندي امي جهزتني احلى جهاز من كُلشي مكياج عطور ملابس يعني ماخلتني بحاجه وصارت الحنه أجه خطيبي وداني لصالون واني طايره الكاع متسعني من الفرحه خلصت واجه اخذني كالي نروح ناخذ صور واني فرحانه بس طلعت اخبل بلحنه وجنت سمينه اي واحد يشوفني يتعجب وخلصنه رجعنه بلبيت هوه هم مكيف صارت الحنه واجه واني فرحانه وسوالفنه اني وياه بس اني شايله خشمي بس فرحانه بي وخلصت الحنه وصار اليل واني منايمه وبس افكر صار ثاني يوم كلت خل اروح انام نسيت العرس وصارت الساعه ب١٢ وطبت خالتي ياا نايمه اتاخرنه على الصالون كمت بدلت ورحت وياهم كملنه من الصالون واجه خطيبي هم ياخذني بس اني غطيت وجهي ماخليته يشوفني وأخذاني وراح للبيت وكال نص ساعه ونجي ناخذج شوي خفت وكلبي كام يرجف بس فرحانه وصدك صارت نص ساعه وهمه ماكو وصارت الساعه بلتسعه واجوي بس سياره الزفه ويمكن وياها سياره بيها النسوان مثل كُل الاعراس اجه خطيبي لزم ايدي حيل واني حالي حال الميته اليسحلون بيها حته ضحكه ماكو بوجهي ابد وارجف الخوف مسيطر عليه رحنه للاستوديو اخذنه صور ورجعنه للبيت وهوه لازم ايدي حيل وكعدنه جوه شوي وكالو خل نصعدهم فوك الغرفتهم طبيت للغرفه غرفتي حلوه وزغيره كعدت والناس ملتمه علينه شوي وطلعو واني جامده بمكاني كعد زوجي حجه وياي واني كُلشي م اعرف شسوي وشراح يسوي بس عندي فضول كبير اريد اعرف شيصير وصار كُلشي وطلع بس اني كُلشي م اعرف دخلن النسوان وباركلي واخذتني حماتي للحمام جنت ماعرف ورقيقه جنت ولا جنها هااي اني هسه شغيرني صدُك مدارسه بس جنت مثقفه خلص العرس وبعد تعب نمت وبعد العرس بشهر ..................
منا ح تبدي معاناتي ......
أنتظرو البارت 2
بقلمي الكاتبة بنين ...
