فهد: حياتكم تختلف عن حياتنا واذا رايدة تعيشين هنا لازم تتعودين ع اطباعنا
فلورا: اي صح بابا كالي هذا الشي
جنت اريد احجي وسكتني الصوت الي اجه من وراي
_هلا هلا ماخذ راحتك وياها
انداريت وجان اشوف خنساء متخوصرة وواكفة مثل شمعة الفكر
فهد: شبيج انتي ما ضل بيج عكل
خنساء: ومنين يجي العكل اذا انت مخليني وكاعد هنا يم هاي الصفرة
كمت ع حيلي وبدت اعصابي تطفر: خنساء اكسري الشر ورجعي الحجرتج
خنساء: ما ارجع جا تريدني اكعد بحجرتي واخليك الهاي المعجعجة ( الضعيفة)
فهد: انتي الظاهر ما ناوية تعدين الليلة ع خير بس تدرين شلون انا عايفلج البيت وطالع حتى ترتاحين
عفتهن ثنينهن وطلعت واحس الدنيا ضايكة بيه مادري وين اروح
جنت افتر بالسيارة بلاية هدف كل همي اضيع الوكت ويخلص الليل واروح الصبح الشغلي بدون ما اشوف جهرة خنساء
حرمان
صعدت فوك من بعد ما الكل راح جنت منتظرة عناد بس ما اجه
صارت الساعة ب12 وهو ماكو
جنت لابسة بجامة مال نوم شمرت شالي فوك البجامة ونزلت جنت ناوية اروح اكعد يم الحجية اضيع وقتي بين ما يرجع عناد
نزلت جوه وحسيت نفسي عطشانة دخلت للمطبخ حتى اشرب ماي وبالصدفة انتبهت الفهد كاعد ويا فلورا بالحديقة شفتهم من شباك المطبخ
بقيت واكفة اباوعلهم وهمه يسولفون شلون جانو كاعدين سويه ومبين عليهم مندمجين كلش بالسوالف
بعدها سمعت صوت نعال خنساء وهي تنزل من الدرج
ضحكت بكلبي واني اتخيل شكلها من تطلع وتشوف فهد كاعد ويا فلورا
طلعت من المطبخ واني ناوية ما اضيع هالفرصة ع نفسي
شفتها نزلت واني واكفة اباب المطبخ
اجت تريد تدخل شافتني ودفعتني
خنساء: ميلي من دربي ميلي
حرمان: اوووي شبيج انتي الحمدلله والشكر
خنساء: خايبة وروح ابوي تراني ما متحملة روحي لا تخليني امدنج هنا وابيس بيج
حرمان: وانتي مطلعة بطولاتج عليه روحي شوفي الانكليزية ع كولتكم كاعدة ويا رجلج وماخذة راحتها
لطمت ع صدرها وصرخت: انا غلام ابوي وين كاعدة ولج
حرمان: انتي بس دوري وباعي وراج من الشباك وراح تشوفيهم يلا بااااي حبي
تركتها وطلعت واني اضحك رحت الغرفة الحجية لكيتها نايمة
دخلت وحست عليه صاحت بصوت عالي: ياااهو
أنت تقرأ
هديـــتي... أهديتــها قلبــي
Romanceعانقيني. لملمي شتاتي أنا في حظرة أحضانكِ طفلٌ صغير.. قد وجد بين عينيكِ الأمان جرديني من احزاني ومتاهاتي فأنتي السبيل الوحيد للخلاص من واقعي الضحل (هديتي.. أهديتها قلبي) by مروة المحمداوي i...
