هديـــتي... أهديتــها قلبــي

البارت3

عناد: السلام عليكم

حمد وهو يكوم ويصافح عناد: وعليكم السلااااام والرحمة هلا بأخوي شلونك

عناد: بخير.. لوني اخوك صدگ يحمد ما تخلي اختي تختاض واحنه الي مخلينها امانة عدك

حمد: جا خوية بيش تريدني احلفلك انا ما مسويلها شي وهي الي طلعت من البيت بلا شوري وانت تدري يعناد لو شيصير ما يصير المرة تطلع من البيت بليه علم رجلها وفوك هذا كله من ودت عليه حبوبتي ما كلت لا واجيتها وهي معاندة ترجع جا بيش قصرت بعد انا يا خوية

عناد
صارن عيوني بكصتي وانا اسمع حجي حمد:  جا شلون ولج طالعة بليه شور رجلج ومن اسألنج تكولين هو الگلي روحي

كامت تمتمت ووجها ينطي الوان
وفاء: جا خوية ترضاها امه تهيني وتمسح بيه الكاع ومن اكلله انوب يكوم يصيح ويسب بيه كتله تسكت لو اروحن لخوتي كال روحي عود تخوفيني

حمد: انا كتلها روحي بساعة عصبية وما جنت متوقع بت عمي تسويها وتطلع من البيت وانا مو بي

عناد
مسحت ع شعري بتعب وانا اتنهد واستغفر ربي: هسه تلمين غرضانج وترجعين ويه رجلج افتهمتي

وفاء: جا بس خوية

عناد: ما اريد اهيس حسج ولا الج جلمة بعد جلمتي يلله همي روحج

التفتت الحمد وحجيت: امشي نكعد بره علما تخلص

اخذت حمد وطلعنا برة بقينة كاعدين شويه واجت وفاء بس وجهه معفوس وعبالك ما راضية باسلوبي وياهه
تجاهلت نظراتها وسلمت ع حمد وخذاهه وراح

جان لازم اسوي هيج حتى ما تعيدها مرة ثانية مهما يصير بينها وبين رجلها ما جان لازم تعوف بيتها وتجي بدون علم رجلها

******

حرمان

تمر الايام روتينية وممله
نفس الروتين يعيد نفسه كل يوم
من كم يوم سكنوا مقابيلنه ناس جدد كلش هادئين وما الهم صوت بالمنطقة بالرغم من ان منطقتنه شعبيه واغلب الجيران ناس تدخل ع ناس
يمكن لان بعدهم جدد وما يعرفون احد
نسيت اكلكم عدهم ولد صاك يجنن
جنت اشوفه يومية من اطلع للمدرسة يطلع من بيتهم
الظاهر هو طالب كلية هيج مبين عليه
بس ما اكلكم شكد حلووو اووويييلي اذوب اني

صرت افز من النوم مثل الحصان بس ماما تكعدني حتى اشوفه
ما اعرف شعوري شنو اتجاهه بس اكو شي يجذبني اله ويخليني هيمانة من اشوفه
يمكن لان شكله وسيم ومرتب وثكيل همات
جنت احس بي يباوعلي بس لما يحس بيه انتبهت يدور وجهه ويسوي نفسه ما شافني

سكينة :حرمان حرمان ب7 گعدي

حرمان
كمزت من فراشي مفزوعة الساعة بال7 واني كل يومية اتعمد اطلع 7 وثلث لان وقت طلعته هيج وقت حتى اشوفه
يااا ربي ما بقه غير ثلث ساعة شلون الحك هسه