هديـــتي... أهديتــها قلبــي

البارت 20

جنت صافنة ودخل عناد كمت ع حيلي واني اضحك بحماس وفرحانه

حرمان: اني خلصت وجهزت كلشي هااا نروح

عناد: لا ما راح نروح

تغيرت ملامحي وصرخت بعصبية: شنو يعني ما نروح انت شدا تكول تضحك عليه مثلا

عناد: اششش ماريد اسمع ولا حجاية كتلج ما نروح وهاي هيه تجبريني يعني وكافي لا تضلين تلحين بالموضوع

شمرت روحي ع الجرباية بقوة واني اتأفأف واحس ما طايقته يمي ولا طايقة نفسي وبودي اكوم اخنكه واطلع بلاعيمه

حرمان: يعني والله ما يصير هيج انت انطيتني كلمة ووعدتني ليش هيج خلفت بوعدك وجماله حطيت عليه شروط واني نفذت كل شروطك ليش هيج تكذب عليه وتخليني اتأمل راح اشوف اهلي وافرح

عناد
جنت واكف اباب الغرفة وكوه لازم ضحكتي ومحافظ ع ملامحي جامدة ماريد اضحك واخرب الخطة اريد اكمل المقلب
مادري ليش حبيت العب بأعصابها واخليها تتنرفز وتضوج
جانت كاعدة ع الجرباية والدمعة بطرف عينها
راح تخبلني هالبنية فجأة تتحول من وحدة شرسة لسانها اطول منها الطفلة تزعل وتضوج من كلشي وابسط شي يفرحها

حرمان
التفتت عليه لكيته واكف منتجي ع الباب حاط ايديه بجيوبه وصافن بوجهي

صرخت بي باعلى صوتي: هسه شلون يعني ماكو روحه

انتبه من صفنته وحجه: شبيج انتي ما تعرفين تحجين بصوت ناصي جنج بوق مو مرة صوتج يرن

حرمان: اترك صوتي واحجي ترى نفسي صايرة بخشمي كلي شنو الي صار ليش غيرت رأيك يعني شنو ما تروح الدوامك بطلت ع حظي

حسيت ما اكدر اكض روحي اكثر طكيتها ضحكة بأعلى صوتي وهي تباوعلي مستغربة

حرمان: انت شبيك شبيك اي طبعا تضحك لو مفارك اهلك شهر كامل جان عرفت احساسي بس وين تعرف وانت النهار كله اهلك بوجهك

عناد: هههههههههه بس بسج ابتلينا تشاقينا وياج كومي يلا راح نروح

باوعتلي بتك عين وحجت: هسه شنو يعني نروح لو ما نروح

عناد: والله اذا بقيتي كاعدة وتلغين هيج ابطل

كامت ع حيلها بسرعة وهي تلبس بحجابها: لا لا لا هياتني كمت يلا خلصت امشي

اخذت الجنط وطلعت وانا اضحك واحمد الله ع نعمة العقل

صبا
جابتلي خاله ام سيف عشه تعشيت وانطتني علاجي وتأكدت مني ما رايدة شي وراحت وبقيت بالشقة الوحدي اما زياد فلا دك ولا سأل

اتصلت عليه اكثر من مرة ما يرد ودزيتله مسجات ع الواتساب يشوفهم ومايرد ما اعرف شلون اتصرف ويا وما اعرف ليش هيج يتصرف وياي

ريام

تمددت ع جربايتي واني افكر يعني معقولة يا ريام الي دا يصير لو كاعدة احلم ..معقولة اني بحلم وبعدين راح اصحى من عنده لا ياربي لا تصدمني فدوة خليني فرحانة