هديـــتي... أهديتــها قلبــي

النهاية

زياد: مارحت المكان جنت اودع عناد طلع للبصرة

فتحت عيوني بصدمة واني احاول استوعب شكال
شنو يعني راح للبصرة يعني تركني بكل برود ورجع حتى بدون لا يكلي

كمت وكفت حجيت: شنو؟ وين راح؟!!

حجه بكل برود: كمل دوامه ونزل البيته شبيج هيج انكلب وجهج

حرمان: وشلون يروح بدون ما يحجي او ينطيني خبر هيج بكل برود يعني راح

زياد: عجيييب اشوف الحجي تغير قبل شكم يوم جان حجيج غير وهسه غير انتي شرايدة بالضبط

حرمان: صح اني اريد انهي علاقتي بي بس مهما يكون ما يصير هيج يخليني معلكة ويروح ما خلالي اي اعتبار المفروض انت اخوي الي تتصرف ويا بدون حتى مادري مو انت مسؤول عني بس وين اذا انت مشجعه ورايح تودعه هم

زياد: حرمان تعبان ومالي خلك هاي سوالفج وما اريد اسوي تصرف ما يعجبج اني الهسه ساكت ومخليج براحتج اريد اشوف وين تردين توصلين فخليني ساكت ومغلس ع تصرفاتج احسن

وقبل لا ارد عليه كامت ماما حتى تدارك الموقف وماتخلينا نتعارك كدام ريام

سكينة: سدو هالموضوع هسه مو وقته بعدين تفاهمو يلله بنات كومو خلي اخوكم وزوجته ياخذون راحتهم يلله حرمان امشي ماما يلله

سحبتني امي من ايدي واني خازرة زياد وهو خازرني والجو مشتعل بيناتنا ناقص بس واحد يكفش الثاني

ريام

طلعو من يمنا حرمان وخاله ام زياد وخواته بعد مارادو يتكافشون الا شوية

اول مرة اشوف علاقة حرمان وزياد هيج عن قريب جنت اسمع عنها من سوالف حرمان بس لكن من شفتهم حسيت شكد علاقتهم سيئة والاجواء متوترة بينهم

طلعو من يمنا وانسد الباب جنت خايفة كلش مادري احس جسمي كله يرجف وايديه ما دا اسيطر عليهن يرجفن من وحدهن وما اكدر ارفع عيني اباوعله
جنت اراقب رجليه وين تروح وخايفة كلش

سد الباب وراح يمشي يم ميز التواليت نزع ساعته وهو يباوع النفسه بالمراية

نزع سترته وراح طلع ملابس من الكنتور وبده يبدل عادي وكأنه متعود ع وجودي من عشر سنوات ويا بالغرفة

دنكت واني مستحية واحس غصت بنص هدومي وهو ولا مهتم الوجودي ولا عبالك ويا احد بالغرفة

شال الطقم مالته علكه بالكنتور واجه للجرباية يريد ينام

فجأة اجاني صوته: تنامين هيج

التفتت وجاوبت بكل غباء الدنيا: هاا

حجه وهو يأشر ع ملابسي: تنامين هيييج

باوعت النفسي بعدني بالفستان بس شلون راح اكله اطلع حتى ابدل