هديـــتي... أهديتــها قلبــي

الجزء الاول من النهاية

حرمان: شنو يعني تتحديني هي علبة شيرادلها

اخذت العلبة من ايدها وجبت السجينه وهنه يضحن وماما تصيح لا تتعورين
التفتت عليهم اريد احاجيهم وما حسيت غير السجينة فلتت وشكت ايدي والدم مله ايدي

اني شفت الدم واني صرخت بأعلى صوتي
وكمزن ماما وخواتي يشوفن ايدي

هنه لازمات ايدي واني اصرخ واكمز من الالم

حرمان: اخخخ عوفوني عوفوني يمة ايدي راحت وج يمة لحكيني ايدي راحت اخخ ايدي راح اموت من الوجع

رغد: اشششش خبلتينا ثبتي شويه خلي نلف ايدج

حرمان: اصلا كله منكم لو ما انتو مايصير بيه هيج

نور: وانتي عربانة بسرعة تندفعين هاي تاليته الي يعاند

حرمان: اشش ولا كلمة ماريد اسمع صوتكم ااااااخخخخ يمة ايدي

اجت ماما بيدها تلفونها: حخابر زياد يجي ياخذج للمستوصف الدم مدا يوكف

حرمان: لا اله زياد ما اريده لا تخابري

فاطمة: هذا وكت عنادج حرمان شوفي ايدج شلون تنزف لا تتزعططين

حرمان: عناد اتصلي بعناد خلي يجي

رغد: هااا هسه ردتي عناد امس انتي طاردته

حرمان: معليج انتي اخخ ايدي انطيني التلفون ماما انطيني

عناد
جنت كاعد اشتغل انا وزياد ودك تلفوني اخذته من ع الطاولة بدون ما اشوف منو المتصل فتحت خط واجاني صوتها تبجي

احس مادري شصار بيه من سمعتها تبجي من عرفتها ولا مرة شايفها تبجي

عناد: شبيج ليش تبجين...احجي شبيج سودنتيني..اي اي اجي ميخالف بس غير اعرف شصاير ..ياهو وياج حاجيني...هااا ايدج شبيهه ...جاي جاي

سديت الخط وكمت بسرعة وزياد كام وياي بدون لا يفهم السالفة شني

زياد: وين رايح منو اتصل بيك

عناد: هاي حرمان تبجي ايدي ايدي كلشي ما افتهمت منها

زياد: زين امشي اني اروح وياك

طلعنا من الدوام انا وزياد
جنت اسوق وبالي كله يمها اول مرة اسمعها منهارة وخايفة هيج
تعودت ع حرمان القوية الي ما تنكسر الي لو شيصير ما تطلب مساعدة من احد

ماصدكت وصلت البيتهم طبكت السيارة ونزلت ركض
ردت ادخل وذكرت انا غريب عن البيت وخواتها موجودات جوه

التفتت الزياد ودخل قبلي وبعدها اشرلي ادخل
دخلت وانا مدنك بس عيوني تدور عليها
سمعت صوتها ورفعت عيني

تقربت عليها وحجيت: شبيج حرمان

حجت بصوت مبحوح من البجي وهي ترفعلي ايدها: ايدي تعورت راح اموت من الالم والله