دخلت للهول ولكيت حجي راضي كاعد وحبوبتي
بداخلي كلت الله يستر لان ولا مرة تجمعنا انا والحجي بمكان اذا ما صارت عركة
يمكن تستغربون عبن ما نكول بويه بس هالحجاية احسنها ثكيله بحلكي عبن ما تنكال لاي واحد
عناد: السلام عليكم
ام راضي: هلا يبعد حيلي هلا بيك تعال اكعد حذاي
راضي: هلا بجبيري هلا
باوعتله بنص عين ورحت كعدت يم حبوبتي
جريت صينية الجاي وصبيتلي استكان
راضي: جا ماكو شلونك بوية
عناد: ما حاجة نسأل لان عرفنه لونك زين
راضي: بدينه يعناد
عناد: ليدك الباب يلگه الجواب حجي
ام راضي: جا راح تتناگرون خاب اعنيد اگضب السانك شويه
عناد: يمة جلمة الحگ ما ينزعل منها بس انا اريدن انشد ابوي جدامج واريدنج شاهدة ليش جاينه اليوم مشتاگلنه ميت الشوفتنه لو اكو سبب ثاني
راضي: لا تكعد تخربط بالحجي يعناد تراني ابوك لا تنسى روحك
عناد: دامك عرفت روحك ابوي المفروض انا اجيك واكلك بوية رايدلي جم فلس مو العكس
راضي: وشبيها لون ابوكم احتاز وتساعدونة هاي تاليها تعيروني ما الومنكم طالعين خباث لامكم
كمت ع حيلي وحجيت: امي لا تجيب سيرتها على لسانك ترى مرت الاخرى ما يصير خير
سمعته كام وراي يصيح: لا تضل تنعثل وياي اطيني جم فلس خليني اروحن
انداريت عليه وانا اضحك باستهزاء: شفتي بعينج حتى مرت الثانية ما تلوميني
ام راضي: جا شجاك انت وين تودي الفلوس التاخذهن ما بسك من النسوان
راضي: يمة انتي لا تدخلين
باوعتله من فوك ليجوه وحجيت: شكد رايد
راضي: شكد عدك اطيني
عناد: بسيطة يصير خير
مديت ايدي بجيبي وحجيت: اخذ هذني مشي امورك بيهن وبعدين انا اطيك
اخذ الفلوس مني وهو يضحك
انداريت وطلعت من البيت واحس ارض الله ضاگت بيه
يا حيف بس هذا ابوي يا حيف الجنت اتمنى من تميل بيه الدنيا يتجيلي طلع هو يريد من يتجيله
********
ريام
من اليوم الي رحت البيت حرمان وشفت زياد هناك واني افكر بطريقة تقربني منه
ما لازم ابقه واكفة بمكاني وانتظر الصدف الي تجمعني بي
زياد راح يرتبط اول وتالي ما راح يبقى اعزب كل عمرة
واني مستحيل اخلي وحدة غير تتقربله
أنت تقرأ
هديـــتي... أهديتــها قلبــي
Romansaعانقيني. لملمي شتاتي أنا في حظرة أحضانكِ طفلٌ صغير.. قد وجد بين عينيكِ الأمان جرديني من احزاني ومتاهاتي فأنتي السبيل الوحيد للخلاص من واقعي الضحل (هديتي.. أهديتها قلبي) by مروة المحمداوي i...
