طلع بدون لا يرد وطلع زياد يلحكه واني رجعت يم خواتي وامي
كعدت يمهن وهنه مستغربات من حالي الي انكلب فجأة
دخل زياد ووجهه ما يتفسر: شبي عناد طلع هيج شكتيله وهيج عصب
كمت وكفت وحجيت: ما كتله شي اصلا ماصار شي يستحق هيج يسوي هوه ماعرف شبي كالب خلقته من اجه
صاح بصوت: حرمان احجي عدل خليني محترمج لان خطار ماريد اهينج
دريت عليه بنتر: ومنو كالك خطار لا عيني كاعدة ع كلبك هاي كعدتي فرحان عبالك راح ارجع ويا وتخلص مني ما حزرت اذا هذيج المرة زوجتني بكيفك هالمرة اني اقرر مصيري بكيفي
حجيت هيج وهجم عليه وهو يصرخ وماما وخواتي صارو بيناتنا
زياد: راح اذبحج قبل لا تقررين مصيرج قسماً بالله العلي العظيم اذا ما حطيتي عقلج براسج ورجعتي ويا رجلج ليكون اخر يوم بعمرج
طلع وعافنا واستلمني ماما وخواتي
فاطمة: خافي ربج حرمان شوفي ماما شصار بيها ضلت ترجف من وراكم يعني الا يصير بيها شي يالله ترتاحون انتي وزياد
كعدت ماما ع الكرسي وحجت: اوووف ياربي لشوكت نبقى بهالمشاكل وج حرمان يمه رحميني رجلج خوش رجال وشاريج ليش تخسرينه ليش
حرمان: لو يصير احسن رجال بالعالم مادام من طرف زياد ما اريده
نور: انتي عبالج الشغلة سهلة يعني حلوة تصيرين مطلكة وانتي ما صارلج شهر متزوجة تتحملين حجي الناس الي راح تطلع عليج اشكال الوان
رغد: خليها بعنادها هسه بس راح يجيها يوم وتندم بكد شعر راسها ع هاي تصرفاتها الطايشة
حرمان: عود اذا ندمت ما راح اتصل بيكم واكلكم تعالو كابلوني ولطمو ويايه اني ندمانه خليكم كلمن ملتهية برجلها وزعاطيطها وتركوني اني اقرر حياتي
نور: وعبالج زياد راح يتركج اصحي حبيبتي عناد وزياد عشرة عمر وزياد يحب عناد حتى اكثر منج عنده استعداد يضحي بيج وما يضحي بي
حرمان: ولله يحبه يكرهه اني معليه خلي يطلكني وخليهم نارهم تاكل حطبهم ثنينهم
تركتهم ودخلت للغرفة واني اكابر ماريد استسلم وارجع عن قراري
وكفت كدام المراية واني اباوع النفسي
لا تستسلمين الكلبج حرمان انتي تدرين كلش زين انتي تحبي وما تكدرين بدونه بس مستحيل لا تحققين رغبة زياد وتخلينه يخلص منج بهالسهولة
دوسي ع كلبج وانتقمي النفسج وكرامتج الي داسها زياد مو حرمان الي يمشيها ع مزاجه وع رغبته
بس عناد ماله ذنب ويمكن ماراح الكه احسن منه كافي حسسج بالابوة الي عمرج ما حسيتي بيها ليش تصيرين انانية ويجرج كبريائج الحياة ظلمة
امج ماراح تدوملج وخواتج كلمن ملتهية بحياتها وزياد يشوف عدوة ومايشوفج وين تروحين بعدين منو الج غيره يا خوفي يجي يوم احتاجه وما الكاه يمي
طبعا ماراح تلكينه عبالج بيداء راح اتركه الج راح تستغل اي فرصة حتى تاخذه منج
أنت تقرأ
هديـــتي... أهديتــها قلبــي
Romanceعانقيني. لملمي شتاتي أنا في حظرة أحضانكِ طفلٌ صغير.. قد وجد بين عينيكِ الأمان جرديني من احزاني ومتاهاتي فأنتي السبيل الوحيد للخلاص من واقعي الضحل (هديتي.. أهديتها قلبي) by مروة المحمداوي i...
