يا ســاكبَ الأمسِ ألحاناً على ِأذني
هاتِ المزيدَ ....... أنا ما زلتُ ظمآنا
-الزول دا فشلني قدام مرتي والله
- ما خلاص انت بررت ليها الموقف بإنو هو ود حلتهم وانت ما عايز تسألو وكدا
-معقولة تكون صدقت
- اي بتصدق
صحبو مشى وهو شايف اختو الصغيرة عمرها ١٢ سنة قاعدة في السرير وهي زعلانة جاء ليها وبقى يسأل فيها مالك زعلانة وفي شنو؟
قالت ليه مافي حاجة وخليني في حالي ومشت وهو مستغرب دي مالها؟؟
عندو خالو كان قاعد في الصالون طلع قال ليه ما تركز معاها كتير خليها براحتها قال ليه ياخ البنات ديل زاتهم ما بتفهمو حيرونا.
•
•
•
امريكا،،
نزل شغل في المستشفى طوالي وشغلو التاني لسه مواصل فيه كان بحاول دايما يخلي حياتو سرية على الناس القريب منهم وما بحب يحكي لزول بعرفو اي حاجة عنو أو يدخلو بيتو طوالي كان دايما بخلي مساحة بينو وبين الناس البعرفهم حتى اصحابو لما يكونو عايزين يتجمعو في بيتو هو بوديهم المزرعة الاصلا هي حقتو لكن هو قال ليهم انها بتاعة صاحب ابوهو عايش في السودان ما كان عايز زول يعرف انو عندو قروش كتيرة أو يعرف حاجة عن شغلو التاني
يوم اتفقو يتلاقو دفعة الجامعة كلهم وكدا في المزرعة ويتونسو وبتاع فاختارو يوم مناسب ليهم كلهم ومشو كان في اصحابو وفي بنات برضو
عندو صحبو إماراتي اسمو نايف وواحد هندي اسمو ماكول واثنين سودانيين والبنات كان في وحدة سودانية وهو بعرفها من اول يوم نزل فيه الجامعة اسمها ريل
(عايشة في امريكا من هي صغيرة حالقة شعرها وبتحب تلبس حلقان طويلة وجيب شورتات أو فساتين قصيرة لبسها كلو قصير واوبن مايند شديد هي بتحب أزهر من اول ما شافتو بس هو كان بعاملها على اساس انها اختو وهي مستعدة تعمل اي شي عشان هو يغير رايو عن موضوع انها اختو وبتاع)
تاني في بنت وحدة حبيبة عبدالله الي هو صاحب أزهر وهي بنت أمريكية.
قاعدين يجهزو في الأكل برة ومشغلين اغاني واخر انبساط ويشربو كلهم ما عدا أزهر طبعا(المثالي جدا)
ريل شايفاه مندمج جدا مع اللحمة الي بتتشوي وانو ما عايز يشرب معاهم فشالت كاسة وكبت فيها مشروب وهي ماشة ليه وبترقص مع الاغنية وبتعاين ليه وهو بضحك
-ي بيب
-ي ريل
-اشرب شوية يااخ
-انتي عارفة اني ما بشرب
-اوف لمتين حاتكون كدا
- انا كدا مبسوط
-(لزتو بكتفها)بس انا م مبسوطة ياخ
-امشي للبرقصو ديل اكيد حتنبسطي
-(بتهبش في الكرفتة بتاعتو وبتدلع)انا عايزة اقعد هنا معاك
-(زهج منها)يا ريل ياخ ما شايفاني بشوي في اللحمة بطلي حركات الشفع دي
كلهم اتلفتو ليهم
- في شنو يا شباب؟
-(ريل)عارفنو طبيعي بصرخ
-(عبدالله)خليهو انتي وتعالينا
بتعاين ليه بحقارة نظام ما بخليك.
•
•
•
لقتو قاعد يغسل في ملابسو
-(بتتكلم براحة)عاكف ي عاكف
-(اتلفت)ريتال؟ يا اهلين
-اسمعني ريفال أختي عايزة تتكلم معاك ضروري قالت ليك اتصل عليها
-(قلبو بقى يدق دق دق دق)ريفال؟
-ااي(وختت ليه ورقة فيها رقم ريفال وجرت)
وهو ما صدق شال الورقة وكتب الرقم في تلفونو وهو بفكر حاتكون عايزاني في شنو؟ معقولة تكون عايزة تقول لي نكون مع بعض وكدا أو تقول لي ما تسافر وخليك هنا معقولة؟
اتصل ليها وهو منتظر بس يسمع صوتها
هي كانت بتتكلم مع غسان
-انتي عارفة انا بس خايف انك تفتكري اني كنت خايف من امجد ود جيرانكم عشان كدا م ضربتو لكن المشكلة انا ما كنت عايز اعمل ليك مشاكل
-لالا انا م فكرت كدا والحمد لله انك ما عملت ليه حاجة لانو اكيد كان حيعمل لي مشكلة كبيرة
مكالمة عاكف
ما مسجلة رقمو بس قالت يمكن يكون هو
-صحبتي خاشة علي خليني اشوفها وارجع ليك
-طيب حبيبتي
وردت عليه
-الو
-(جسمو برد) ا ا ا لو ريفال
-عاكف؟
-ايوا انا ريتال قالت لي انك عايزاني في موضوع
-ايوا صح
-(قلبو بدق شديد ومستني في اي لحظة انها تقول ليه ما تسافر أو انا بحبك أو او او حاجات كتيرة)
-(حكت ليه اي شي وفي النهاية قالت ليه) انا بحب غسان شديد وما عايزة تحصل مشاكل بيناتنا وابوي لو عرف انا كدا ما حاقدر اتواصل معاه تاني لانو حايشاكلني وانا وهو ما عندنا ذنب في الحصل وانا م عايزة اخسر غسان لأي سبب عشان كدا عايزاك تساعدني وتتكلم مع امجد.
*كنت أظن ولكن خاب ظني*
م طلعت ولا حاجة من الحاجات الهو فكر انها ممكن تقولها ليه م عرف يقول ليها شنو لكن هو لازم يساعدها
- انا ما اتوقعت انو امجد يعمل كدا والله ريفال انا اسف لكن بوعدك ما حخليه يعمل ليك حاجة وما حايضرك بشي انتي اطمني تمام؟
-طيب تسلم كتير ما عارفة اقول ليك شنو
-م تقولي اي شي في النهاية نحنا جيران صح؟
- اي وانا خاتاك في مكان اخوي بالجد
-تسلمي
وقفل الخط
*عارفين اكتر حاجة بتوجع في الحب شنو؟ انو تكون بتحب زول شديد وبتخت في آمال زايفة وانو ممكن يكون لي في يوم القسمة ما معروفة ووو حاجات وافتراضات كتيرة بس عشان تطمن نفسك بس لما تسمعو بقول ليك اخوي هنا بتحس اي شي اتدمر*
•
•
•
مشى لأختو في بيتها هي عروسة جديدة وسكنت جنبهم ولقى معاها وحدة شغالة وهي بتمسح في الأرض بقى متنح وبعاين ليها من فوق لتحت ويتفحص في جسمها بعيونو
-اها ناس البيت كيف بالله؟
ما مركز معاها
- كنت بتكلم مع هاشم انو نجيكم نقيل معاكم وكدا ابوي ما يكون تعب تاني
م مركز معاها
-ي ولد هييي
- اي اي في شنوو؟
-بالك وين انت ياخ
-معاكي اي
ولسه ما قادر يشيل عيونو من البنت الشغالة.
•
•
•
أمريكا،،
سايق العربية وماشي على المستشفى فجأة شاف لافتة كبيرة قدامو فيها صورة بنت عاملين دعاية لماركة بتاعة ميكاب فجأة وقف وهو بعاين ليها
نفس العيون نفس العيون
هو سرحان فيها نزل من العربية ووقف قدام اللافتة وهو بعاين ليها وبقول نفس العيون
يعني عادي جدا اني القاها؟ يعني عادي انو في بنات عندهم نفس عيونها؟ يعني عادي جدا انها تكون موجودة؟
فجأة ابتسم شديد ورجع عربيتو وهو مبسووووط حس انو حيلقاها وأنها اصلا قاعدة اكيد هي قاعدة في مكان واكيد هو حيلقاها
وصل المستشفى وهو ببتسم للضرس الآخير وكل البنات بعاينو ليه لا هو عندو حلاة ضحكة وابتسامة واااي
•
•
•
مشى ليه في بيتهم وهو متضايق منو شديد
-اوو عاكف ود ليبيا اها مسافر متين؟
-مستعجل لسفري للدرجة دي عايزني امشي؟
-لالا ياخ م كدا لكن عشان تظبط امورك دي ما بلد بقعدو فيها والله
-امم انا امشي وانت تظبط امورك هنا مع ريفال؟
- (اتوتر)دا شنو ي فردة ليه تقول كدا معقولة انا اعمل كدا انا عارف انك بتحبها من زمان مافي سبب بخليني اقرب ليها
-انت قربت منها واتخطيت حدودك وانتهيت وهي حكت لي اي شي
-(قام فوق وهو بصرخ)يعني انت بتصدق اي كلام بتقولو ليك وخلاص عايز تدخل بنت بيناتنا وتتتشاكل مع صحبك.
-انت لو صحبي ما بتطعني في ضهري لو صحبي ما بتمشي بتهدد البنت الأنا بحبها وتقول ليها تكون معاك بالغصب كنت فاكر انا لما اسافر انت حتبقى ليها اخو لكن للأسف كنت غلطان
-ياخ اي انا بحبها زي ما انت بتحبها انت لما كنت بتحكي لي عنها انا م كنت قادر اقول ليك اني بحبها لأنك صحبي وشايفك متضايق بسببها لكن ياه انا بحبها اي وعايزها تكون لي ومستعد اعمل اي شي حتى لو اخسرك
-طيب لو انت اخترت كدا حتندم يا امجد لانو العارفو عنك انا مافي زول عارفو عنك ولانو انا ممكن اجيب اجلك اسي دا لو عايز
-ايوا يعني بتهددني آخر الزمن
- اي بهددك ولو راجل قرب من ريفال
-وانت لو راجل افضحني ولا افتح خشمك بكلمة وحدة
-طيب نشوف الراجل فينا منو
•
•
•
أمريكا،،
-ي ريل م ممكن تكوني لصقة بالطريقة دي
- انا بحبو ي عبدالله بحبو وهو عارف وانتو عارفين بس هو ما عايز يديني فرصة
-عشان كدا انسيهو وما تركزي معاه
- ما بنساه وحخليهو يحبني عادي جدااا
-عايني ي قلبي أزهر دا ما زينا يعني لو قلتي ليه اي شي لو دلعتيهو ا اهتميتي بيه أو لبستي اشكال والوان ما حتقدري تجذبيهو
-م مشكلة بجرب حاجات تانية
-انتي ما بتستسلمي نهائي؟
-أبدااااا
في جهة تانية،،
- انا عايز اشتري المستشفى دي؟
-انت جادي ي أزهر
- اي جادي وعايز اتم الإجراءات سريع
-ومن وين عندك القروش اصلا وكيف تقدر تشتري مستشفى كبيرة زي دي انت عارف انها حاتكون بكم؟
- اي عارف وانا عندي القدرة اني اشتريها
-ليه اصلو كدا انت شغال شنو ولا جبت القروش دي من وين
-انا من جيت البلد دي وانا شغال ما خليت حاجة ما عملتها الحمدلله ربنا كريم
-(ما اقتنع بكلامو) طيب انا بشوف ليك المالك بتاعها ونتفق معاه على السعر
-السعر ما مهم انا بديهو الهو عايزو بس انا عايزها وبسرعة
-طيب ماشي
•
•
•
جاتها رسالة من امجد
-فاكرة انك لما تكلمي عاكف معناها كدا انا ما حاعمل ليك حاجة عاكف ما بخوفني هو واحد وطرورة نملة ما بقدر يقتلها عايزاه يخوفني انا؟ وانا لسه في كلامي وريني سريع قررتي شنو لأني بديت ازهج منك والله
