أنا أحبك يا سيفاً أسال دمي
يا قصة لست أدري ما أسميها !
الصباح،،
بهاء الدين وصف ليهم هو قتلو وين وجابو جثتو لأهلو الهم اصلا لسه ما انتهو من موضوع بنتهم وجابو ليهم خبر ولدهم عمر 21 سنة مقتول
مطعون يعني في اللحظة دي مافي حاجة بتقدر توصف حزنهم عليه مهما كان كعب هم بشوفو كويس لانو هو منهم مهما عمل هم بس عايزنو يكون حاليا معاهم ودا كلو يكون كذب كذب وبس.
طالبو بالاعدام وحاينفذو الحكم على بهاء الدين الهو عمل كدا عشان اختو امو ما قادرة تصبر حتى هي ما مصدقة انو ولدها رجع ليهم وهي م صدقت انو بقى جنبهم تاني يرجع يمشي ويمشي للأبد كمان.
هو ما كان ندمان على العملو وكان بقول لو رجعتو لي السكين تاني حاطعنو زيادة وبرضو ما حايكفيني.
قال لأمو بس انتي سامحيني وانا تاني م عايز حاجة كان بقول ليها السوبر ماركت خلي حسن يشتغل فيه(أخوهو الصغير) ويطلع ليكم منو مصاريف وانتي اقعدي في البيت بس ربي اخواني ديل وخليك جنبهم وقال لهدى انتي خلي بالك من نفسك وأرجعي لقرايتك وبعد تخلصي قراية اشتغلي بس اسي ما تفكري تشتغلي نهائ قال لحسن العمرو ١٣ سنة أمي واخواتي في امانتك انت بقيت راجل البيت ما عايزك تقصر منهم في شي.
*طشاش الدنيا لما نشوف خراج الروح بكل وضوح*
•
•
•
ريفال عرفت انو غسان اتوفى من حسابو في الفيس اصحابو كان عاملين بوست في صفحتو الشخصية ومر شهر على موتو وهي خاشة في حالة اكتئاب م بتمشي المدرسة وبس قاعدة في الغرفة وما بتتكلم مع زول ناس بيتهم محتارين فيها أختها وأمها عارفين بالموضوع وبحاولو يضارو ليها عشان أبوها م يعرف بحاجة أمها قالت ليه هي عيانة بس خليها ترتاح وأبوها الموضوع ما واقع ليه في راسو وقال الا يعرف هي مالها ولو عيانة يودوها الدكتور بدل تكون قاعدة كدا.
امتحاناتها فضل ليها شهر هي م قاعدة تقرا ولا عارفة حاجة من الليل يجي بتقعد تبكي لحدي ما الصباح يدخل ريفال الجميلة شكلها اتغير ١٨٠ درجة بقت ضعيفة وعيونها وارمة وحوليها هالات أمها وأختها حاولو يطلعوها من الهي فيه بس م قدرو هي بتحبو شديد وما قادرة تستوعب فكرة انو هو مات وانو ما حايكون معاها وهي ما حاتشوفو تاني.
*مكان غير المكان أو زمان غير الزمان أو أوان غير الأوان متى وكيف لا أعلم ولكني أعلم أني ما زلت أحبك مازلت مشتاق لسماع صوتك*
•
•
•
أمريكا،،
أمو قعدت في البيت وخلت شغلها حست انها مقصرة من ولدها وحتى ما عارفة ولدها بعمل شنو ولا بمشي وين وبجي من وين وهو قافلة معاه وما عارف يعمل شنو لانو أمو بقت قاعدة في البيت وبقت تودي المدرسة بنفسها وهو م قادر يشتغل شغلو وكدا امورو حاتجوط.
يوم هو فتح شنطتو وطلع كيس هيروين وأمو جات داخلة قام دخل الكيس سريع سريع وهي قالت ليه دة شنو وقال ليها مافي شي وبتاع وشال شنطتو وقال ليها انو حيمشي المدرسة وهي وصلتو ولما جات راجعة اتصل ليها المحامي بتاعهم وقال ليها انو في مبلغ كبير اتسحب من الحساب بتاعها حوالي ..... دولار وهي مصدومة دا منو العمل كدا وعارفة انو مافي غيرها هي وجاك ودي ما هي اكيد دا جاك مشت البيت مستعجلة دخلت غرفتو وبقت تفتش فيها على اساس تلقى أي حاجة وللأسف لقت كيسين هيروين وعرفتو .
•
•
•
متابع جينيف عشان يعرف منو جاك دا منو ولاحظ انو جينيف متوتر من الموضوع دا خاصة لما هو جاب ليه سيرة جاك وما قدر يطلع منوو بحاجة لكن جاتو فكرة انو يصل للواي فاي بتاع تلفون جينيف ويشوف الرسايل البيناتهم وجاب زول ظبط ليه الموضوع دا ولقى رسايل بيناتهم وجينيف قال لجاك ياخد بالو لانو في زول بعرفو وحكى ليه بانو شافو وقال عايز يشتري الشركة بتاعتهم وانو الشركة دي المدير بتاعها جاك
جاك قال ليه اعمل حسابك ما عايز غلطة الزول دا لو عرف عني حاجة عن طريقك انت انا حاقتل اولادك ومرتك حتى اقتلك انت
هنا هو فهم انو الرجال الكان ماتو في الشاحنة وهم قاصدين عملو كدا لانو الشرطة لو كان مسكتهم كانو حيضطرو يحكو عن جاك وجاك كدا حيقتل اهلهم فهم انو جاك بهدد الناس بأولادهم
الفضول عايز يقتلو وهو بأي طريقة عايز يصل لجاك وعايز يعرف هو بعمل كدا ليه ويقدر ينقذ الناس منو لانو حايدمر العالم بالطريقة دي
هو حاليا م عندو حل غير جينيف هو الحايوصلو لجاك شكلو حيقعد في واشنطن كتير عشان يشوف طريقة تخلي جينيف يتكلم.
•
•
•
السودان،،
كانت بتفكر تمشي لدكتور نفسي هي م عارفة ليه فكرت كدا بس هي محتاجة ليه هي في حاجات كتيرة م قادرة تعالجها واولها أزهر ود خالتها هي حياتها كلها بقت واقفة عليه حتى في الجامعة تفكيرها كلو معاه تطلع تنزل تفكيرها معاه تخش تفكيرها معاه هي عايزة تطلع من المتاهة دي وتكون انسانة طبيعية وبس تعيش حياتها عادي حياتها الهو ما حايكون موجود فيها.
فتشت في النت عن دكتور كويس واختارت واحد عشوائيا كان اسمو مزمل وعرفت عيادتو واتصلت تلفون وعرفت هو شغال متين وسجلت وعلى أساس انها تمشي بكرة الساعة ٤.
•
•
•
خشت صفحتها في الفيس وبقت تكتب وتكتب
(كنت أظن أنك ستبقى إلى جانبي، ستبقى معي إلى أن نشيخ معا،تركتني في الدنيا التي كنت اقول لك أني أخاف وجودي فيها ، تركتني رغم تكراري لك دائما دائما أني لا أستطيع العيش بدونك، تركتني رغم أنك تعرف أني غبية لا أستطيع التصرف حتى في أتفه الأشياء، تركتني رغم معرفتك بأنك صندوق أسراري، تركتني وأنا الآن عالقة في غرفة لا أريد الخروج منها لمواجهة العالم بدونك، لأني أظن أني من دونك لا شئ لا اظن بل أنا متأكدة أني من دونك لا شئ، ظننت وظننت وظننت ولكن خاب ظني)
جاسم صاحب غسان صديق ريفال في الفيس(الكان مشى معاه البيت المهجور ولقو البنت) وشاف البوست بتاعها عرف انها متأثرة شديد وانو هو مفروض يطلعها من الهي فيه واصلا غسان ما بستاهلها وهي م عارفة حقيقتو رسل ليها وقال ليها انو صاحب غسان وهو عايز يتكلم معاها عشان يفهمها حاجة واحسن لو شافها هي رفضت تشوفو فأصر عليها انو لازم يشوفها وضروري جدا هي وافقت وطلعت ودي كانت اول مرة تطلع من البيت من شهر كامل أمها وأختها لما شافوها لبست عباية وقالت طالعة لما خافو عليها و انها ماشة تعمل لروحها حاجة لكن هي قالت ليهم انها كويسة وعايزة تشم هوا بس ومشت شافتو وقعدت وهو بدا يتكلم.
-انا عارف انك بتحبيهو شديد لدرجة انو شكلك بقى كدا بس هو م بستاهل تعملي دا كلو عشانو
عاينت ليه
-(بتتكلم براحة)كيف بتقول كدا؟
- انتي عارفة هو مات كيف؟طعنو ود جيرانا عشان اغتصب اختو
-شنوو؟كيف بتقول عنو كدا وهو صحبك معقولة؟
- ريفال دي الحقيقة وانا اكيد ما حكذب على زول ميت،واقول ليك حاجة تانية اليوم اللاقاك فيه بعد المغرب في المركب هو كان مخطط اليوم داك انو يفقدك عذريتك بس ربنا ستر واخوهو اتصل ليه وهو م قدر يعمل ليك حاجة
- انت مجنون وانا ما حاسمعك تاني وغسان ما بعمل كدا(وقامت عايزة تمشي)
وقفها
-اسمعي كلامي لحدي النهاية بعدين لو عايزة تمشي ممكن تمشي
-انا مستحيل اسمع كلام زي دا عنو
- ريفال دي الحقيقة وانا مصلحتي شنو من دا كلو انا عايز اوريك حقيقة الزول الانتي عاملة دا كلو عشانو لانو ما بستاهل انا عايزك تعيشي حياتك عادي وتنسيهو.
-وهو يعمل كدا ليه حيستفيد شنو؟
-غسان دا من نحنا صغار زول طماع واناني كان اي حاجة عايزها لازم يشيلها ما بفكر في زول غير نفسو مش هو اتعرف عليك في القروب داك؟ولما شاف صورتك في البروفايل ونحنا قعدنا نقول البنت مزة وبتاع قال لينا البنت دي انا عايزها وحخليها تكون لي،هو ما بحبك هو بس كان شايفك حاجة بعيدة واتحدانا واتحدى نفسو عشان يصل ليك ولما وصل ليك عايز يصل لأبعد من كدا بس انتي ربنا حماك منو والحمد لله م قدر يعمل ليك حاجة ربنا انقذك من واحد مغتصب دمر حياة بنتين ووحدة ماتت بسببو
-شنووو؟
-اول وحدة (حكى قصة البنت الشافوها في البيت المهجور)اليوم البعديه جاء قال لي انو رجع للبيت داك وعمل العايزو وفي نفس اليوم قالو لقو بنت في بيت مهجور وهي ميتة والتانية كانت شغالة عند اختو.
-(مصدومة ما قادرة تتكلم)ك ك ك يا غسان يعمل كدا ك ك ك يف؟
-غسان هو اصلا كدا وبالمناسبة القروش الشالها منك ديك ما عشان يعمل مشروع ويجي يعرسك جاء عزمنا بيها واشترى ليه تلفون وكم يوم وخلصها وكان حايشيل منك تاني وتالت لانو كان بقول لينا البنت دي ماسورة دهب وانا حاقعد اشرب منها لحدي ما اروى.
في اللحظة دي أي حاجة تحس بيها ريفال ما بتتوصف ولا حتتوصف زي الزول الاطعن في قلبو لما يحكو ليك حاجة عن زول انت مستحيل تتوقعها منو لأنو كان اقرب زول ليك مستحيل تتوقعها.
رغم كل الشّرور ما زلت تعشقه؟
رغم الجور والفجور ما زلت تحنّ إليه؟
رغم ما فيه من غرور؟
