قلبي يُحَدّثُني بأَنّكَ مُتْلِفِي
قلبي فداكَ عرفتَ أم لَمْ تعرفِ
أزهر اتأخر عليها بسبب مواضيعو الكتيرة لكن هي كانت منتظراه وعايزة تحكي ليه الحصل مع اسامة هي للان ما مصدقة انو حقيقي بتقول انو يمكن انا اكون بتخيل برضو لكن معقولة كل الناس بتتخيل معي وشايفنو؟ طيب يمكن يكون دا ما محمد عادي لانو انا قبل كدا كنت فاكرة انو أسامة دا محمد برضو لكن لو هو ما محمد كيف بفكر فيني برضو زي ما انا بفكر فيه كيف؟ معقولة تكون صدفة؟ لا ما اعتقد لانو كل الحاجات بتقول انو محمد.
اتصل ليها وقال ليها انو هو برة مسحت دموعها وطلعت ليه لقتو واقف برة العربية فتح ليها الباب ركبت
-(بعاين ليها ) كنتي بتبكي؟
-لالا
-كيف لالا انا عيونك حافظها حفظ حتى قبل ما اشوفها
- بس عادي مافي شي
-كيف مافي شي احكي حصل شنو
-انا الليلة شفت اسامة
-(زهج) أسامة دا منو كمان
-الكان خطيبي
-(زهج اكتر) كيف يعني تشوفي وتشوفي ليه انتي ما عايزة تفهمي انو انا ما عايزك تشوفي اصلا
-شفتو عشان اتكلم معاه في الموضوع واقول ليه اني ما عايزاك وعشان ارجع ليه الدبلة؟
-يعني اسي عملتي كدا؟
-اي
- انا كنت ح احل الموضوع دا ما كنت عايزك تشوفيه خالص وبعدين ليه ما بتكلميني بتتصرفي من راسك ليه ليه؟
-كان مفروض انا اتكلم معاه لانو في النهاية انا الغلطانة لأني اخترتو بنفسي
- انا اسي حامشي اتكلم مع ابوكي وعشان نعقد طوالي وننتهي من المهزلة بتاعة أسامة دا
-ي محمد الموضوع ما بتحلا كدا لكن
-محمد منوو؟
-(اتذكرت انها ما حكت ليه حاجة) قصدي ازهر
- (اتجاوز الاسم)طيب بتحلا كيف؟
-الا أسامة اول يقول لناس بيتنا انو خلاص حايخلي العرس عشان ما يفتكرو الموضوع مني أزهر انا ابوي صعب جدا بالذات في المواضيع دي لو عرف انو انا السبب ممكن يقلتني عادي
-واسامة دا حيمشي متين لابوك؟
-م عارفة لكن مادام انا كلمتو الليلة اكيد حيمشي
-ولو ما مشى؟
-حيمشي
-بنتظرو لحدي بكرة بس انا وبعدين بتصرف
- طيب ماشي
لحدي ما وصلها البيت نزلت خشت بيتهم وهو خشى بيتو وهي طوالي خشت غرفتها لقت ريتال اتصلت على رعد قالت ليه تعال غرفتنا في موضوع ضروري
بعد ما جاء
-(حكت ليهم انو هي اتكلمت مع اسامة ورجعت ليه الدبلة وهو يمكن يجي لأبوها في اي وقت ولو ما جاء لحدي بكرة أزهر قال انو هو بتصرف وحيجي ويتكلم مع أبوها ومستحيل يخليها تعرس واحد تاني غيرو)
-(رعد) ما ينفع ي ريفال أسامة يجي لأبوي ويقول ليه خليت بنتك وما عايز أعرس انتي عارفة احساسو حايكون شنو في اللحظة دي انو بنتو اترفضت؟ واكيد حايقول انتي السبب وحايفكر في مية فكرة وانتي عارفة ابوكي صعب حايصر على أسامة يقول ليه السبب كدا كدا فأنا شايف انو دا ما حل مناسب)
-(ريتال)طيب ريفال تمشي لبابا وتقول ليه انو هم حصلت بيناتهم مشاكل وانفصلو وهي رجعت ليه الدبلة وكدا
-(رعد) عشان ابوي يكفتها وعادي يخليهم يتصالحو ويرجعو وكأنو ما حصلت حاجة
-( ريتال) طيب تقول ليه انها غيرت رايها فيه وفجأة بقت م عايزاه
-(رعد) حايقول ليها انو انتي من البداية وافقتي ليه وانا لما سألتك قلتي موافقة
(ريتال) اووف طب الحل شنو
-(رعد) انا بتصرف في باقي اليوم دا بتكلم مع أزهر ومع أسامة
كدا اديني رقم أزهر
ريفال طلعتو ادتو ليه وهي مستغربة هو حيعمل شنو.
•
•
•
أسامة مع مزمل بعد ما حكى ليه الحصل،،
-(اسامة وهو بتكلم بعجز وأسف) انا عارف اني ما بستاهلها وعارف اني في البداية لعبت بيها وفي النهاية دا كلو رجع لي بس انا بحبها ي مزمل وكنت مخطط لحاجات كتيرة حاعملها ليها كنت حعيشها احلى حياة وما اخليها تحتاج لحاجة واعوضها عن كل الفات بس للأسف.
-(مزمل وهو متضايق على وضع صحبو)بس انت كنت عارف انو في النهاية محمد دا حيجي
- كنت بقول انو دا وهم وانو مافي كدا حتى في علم النفس النحنا قريناه عارفين انو دي حالة ممكن تصيب الإنسان بس هو بتعالج منها عادي بس انو الإنسان الخيالي يبقى حقيقي انا اول مرة اعرف حاجة كدا كنت فاكر انها اتعالجت منو لما وافقت بي.
- اسامة خلينا نتكلم بوضوح انت عارف انها وافقت بيك عشان تنسى محمد وعشان تعيش الواقع وتبطل خيال لانها هي ما بتحبك
-في البداية لما كانت فاكرة اني محمد كانت بتحبني
- ما كانت بتحبك كانت فاكرة انها بتحبك
-(متضايق وخاتي يدينو في راسو)
-هي ما آخر بنت في الكون ربنا كاتب ليك الاحسن في حتة تانية ومع وحدة تانية في زمن تاني دا كان درس ليك ي صحبي وانت اكيد عرفت منو حاجات كتيرة وهي فترة وبتعدي ريفال دي حاتكون بالنسبة ليك ذكرى جميلة بس حاتمر بخيالك عادي وتمشي فانت ما تشيل هم للموضوع دا صدقني حتعرف لقدام انو لخير انكم ما واصلتو وما كملتو.
-ان شاء الله
-حاليا حتعمل شنو حتمشي لأبوها ولا تخليها هي تكلمو ولا كيف؟
- ما عارف والله حشوف هي عايزة شنو
أسامة تلفونو ضرب رد لقى انو رعد قال ليه عايز اشوفك واتكلم معاك وكدا قال ليه انو مع مزمل في العيادة قال ليه خلاص مسافة السكة وبجيك
بعد ما جاهم،،،
-(رعد) أسامة والله انا م عارف اقول ليك شنو في الحصل دا لأني خجلان اقول ليك اي حاجة
-(اسامة) الموضوع دا مافي زول عندو فيه دخل
-(رعد) حيحصل شنو طيب؟
-(أسامة) حامشي اتكلم مع ابوك واقول ليه خليت العرس
-(رعد) أسامة انت م بتعرف الحاج كلام زي دا ما بوافق عليه حيقعد ينق في راسك لحدي م تقول ليه انت خليتو ليه وغير كدا ما حايخلي ريفال في حالها.
-(مزمل) طيب ي جماعة الحل شنو؟ ومحمد داك وين وعايز يعمل شنو
-(رعد) قال بجي بكرة بتكلم مع الحاج وانو لو ما اديناه ريفال مستعد يخطفها
-(مزمل ) كأننا في فلم هندي للان ما قادر استوعب حاجة
-(أسامة اخد نفس ) ديل ممكن يجنو اكتر ما هم جانين لو ما عرسو لانو الحاصل دا حاجة غريبة نحنا عجزنا عن انو نفهمها اصلا
-(رعد وهو بفكر ) مجانين؟ اي بالجد مجانين انا جاتني فكرة ممكن تطلعنا من الموضوع دا كلو
-(ال٢) شنو؟
-(رعد ) دقيقة انا حتصل على المجنون دا أزهر ولا محمد دا يجي ونشوف
-(أسامة وهو وشو ما بتفسر من الزعل) طيب اتصل
مزمل بعاين ليه وعارف انو حايضحي عشان خاطرها وياريت لو بقدر يعمل ليه حاجة أو يساعدو لكن للأسف .
