ما مَر ذِكرُكَ إلّا وابتسمتُ لَهُ
كأنّكَ العيدُ والباقونَ ايامُ ..
فتحت لرعد الباب وجاء قعد جنيها -وريني في شنو وليه كنتي بتبكي فجأة ريفال انا عايز اعرف اي حاجة انتي مخبياها عني وأسي ومن غير مبررات كتيرة
-قالو لي انو ما حقيقي واني بتخيل واني مجنونة وانا صدقتهم وافتكرت انو ما حيجي وبقيت لغيرو وبعدين هو جاء انا اسي اقول ليه شنو بس اقول ليه شنو؟
-انتي بتتكلمي عن منو؟
-محمد
-محمد منو؟
-(حكت ليه القصة كلها)
رعد ما مصدق كيف يعني والكلام دا معقولة يكون حقيقة مافي حاجة زي دي ريفال دي بتتوهم بس وعادي صدفة انها تشوف واحد وتفتكر انو دا محمد بتاعها دا ووو زاتو م عارف يفكر كيف ولا كيف
-دكتور مزمل؟
- اي دكتور مزمل بتعرفو؟
-(ما عايز يقول ليها انو برضو كان بتعالج عندو) بس معرفة سطحية كدا
-طيب
- ريفال انا ما عارف اقول ليك شنو بس يمكن انتي بتتوهمي ويمكن القبيل شفتيه دا بس ساي جاء في بالك انو ممكن يكون محمد بس انا (ما عايز يقول ليها انها مريضة وبتتوهم لانها اسي مافي حالة بتسمح يقول ليها كدا) طيب انا متاكد انو أي حاجة حتتحسن وحاتشوفيه تاني وحنلقى طريقة عشان تقدري تفسخي الخطوبة من أسامة انتي بس ما تتضايقي ما عايز اشوفك بتبكي
قعد يطمن فيها لحدي ما نامت
وهو طلع وراسو ضارب
اول شي عملو اتصل لدكتور مزمل وسألو عن حالة ريفال ومزمل قال ليه انو اسي حالتها كويسة وانا متابع معاها لحدي آخر لحظة وعارف انها كويسة
رعد حكى ليه انو ريفال م كويسة وأنها قالت شافت محمد الليلة
مزمل برضو بقى راسو ضارب ويعني هي ما اتحسنت ولا اتعالجت وأسي هو يكلم أسامة بالحصل ولا لا واصلا كيف يكلمو شعورو حايكون شنو وهو بحب ريفال جدا.
مزمل قال لرعد يحاول يجيبها ليه في العيادة لكن رعد قال ليه ما بقدر لانو انا م عايز افهمها انها لسه مريضة وكدا حالتها حاتسوء اكتر لو عرفت اني ما مصدق الكلام الهي قالتو لي
مزمل قال ليه كدا انا بشوف حل للموضوع دا وبديك خبر.
مزمل قاعد في عيادتو،،،
اول مرة تلاقيني حالة زي دي انا عارف انو المرض دا م كتير بس حتى الناس البتعاني منو بتتعالج عادي والموضوع بنتهي حتى ريفال كنت فاكر انها اتعالجت خلاص.
سكت مسافة وفجأة قال معقولة محمد دا يكون حقيقي بالجد؟
معقولة في حاجة حقيقية رابطاها بيه وهي بتحس بيه بالجد وبتتكلم معاه بالجد وبتسمعو وكدا؟
مزمل انت بتقول في شنو مافي كلام زي دا .
•
°
°
رعد بفكر،،
معقولة في حاجة كدا معقولة زول بتخيل زول اكتر من سنة وبتكلم معاه وبسمعو وبحس بيه معقولة؟
معقولة زول يحب زول بس في خيالو هو ما شافو معقولة ما يشوف زول غيرو وهو ما شافو هو بس في خيالو
يا دنيا تاني فيك شنو نحنا ما عارفنو فيك شنو؟؟
•
•
•
بعد أسبوع،،
بدو يرحلو حاجاتهم لبيتهم الجديد
ريتال بتتكلم مع احمد صديقها في الفيس
- وين مختفية ي كلبة
-قاعدين نرحل في حاجاتنا ماشين بيت جديد
- انتي جادة ماشين وين؟
-.....
-كضابة والله
-والله
مالك في شنو؟
-دي حلتنا
-واي م جادي دا شنو وجع الوش دا
-(بضحك) ان شاء الله تكونو جيرانا عشان اعذبك ليل ونهار
-والله برحل طوالي برجع بيتنا القديم
-وييين ياا وراك وراك
•
•
•
أزهر بتكلم مع نفسو،،
مر اسبوع من ما انا شفتك وتاني ما شفتك حتقعدي تلعبي معي كدا يا سحر ما حتظهري تاني ؟ ما حشوفك تاني؟طيب وبيتنا الجاهز؟الحياة الراجيانا؟ المحلات النفسي اوديك تشوفيها؟ البيوت النفسي انك تقعدي فيها وتبقي ستها نفسي الف معاك العالم دا كلو معقولة ما تجي؟ ليه بتعملي في قلبي كدا وريني ليه؟
انا حانتظرك اسبوع تاني ولو ما ظهرتي عارفة انا حاعمل شنو؟ حاقعد افتش الخرطوم دي بيت بيت عشان القاك واكيد حالقاك انتي في مكان مكان.
