"مابالُ عقلي لايفارق غائبًا
أضحى فؤادي من رحيله خائبًا"
المستشفى،،
وصل واتصل على رعد سألو انت وين ووصف ليه المكان القاعدين فيه وطوالي مشى ليهم وهو قلبو بدق حايشوف الكانت مرتو من سنين وحايكلم ولدو انو هو ابوهو ما عارف هو حاسس بحاجات كتيرة ملخبطة.
ماشي خطوة خطوة لحدي م وصل وشايفهم قاعدين جنب بعض من بعيد بتقدم شوية شوية لحدي ما وقف قدامهم وهي رفعت راسها وعرفتو اول ما شافتو وبقت تعاين ليه وهو يعاين ليها ، رعد رفع راسو شافو طوالي قام فوق سعادتك اتفضل اتفضل
أم رعد:- انت انت الجابك شنو هنا انت عايز مننا شنو انت رجعت تاني ليه عايز مننا شنو
وخايفة وبترجف رعد مستغرب
ي أمي اهدي في شنو بسم الله
وهي:- بس طلعو طلعو من هنا عايز مننا شنو انت عايز شنو وانت مالك وانت وانت
طوالي وقعت والناس كلها تعاين رعد شالها وهو ما فاهم حاجة دخلها جوة وجو قاسو ليها الضغط وركبو ليها درب
ورعد بقى يسأل فيه انت منو وبتعرف أمي من وين وليه هي لما شافتك بقت مخلوعة كدا وخايفة قال ليه انا حفهمك اي شي بس أمك تقوم بالسلامة.
وهم واقفين بتكلمو الدكتور جاء وقال ليه انو المريضة طلع عندها مرض الذئبة الحمراء
مرض الذئبة الحمراء(هو مرض مزمن بصيب الرجال والنساء لكن النساء أكثر عرضة له وهو مرض مناعي يصيب الجهاز التنفسي والكلى وممكن يعمل زلال في البول وتساقط الشعر وممكن يعمل طفح جلدي واحمرار في الوجه وتقرحات في الفم وممكن يصيب القلب والجهاز العصبي وكريات الدم وممكن يتم كشف المرض عندما يظهر انخفاض في عدد كريات الدم أو الصفائح الدموية).
الدكتور قال ليهم انو المرض دا نادر ومنو خوف بس انا حاكتب ليها الأدوية وهي تمشي عليها وبالسلامة.
في اللحظة دي هو حس انو ما باقي عليها كتير وضعف شديد وعرف انو رجع متأخر جدا وياريت لو كان فتشهم من زمان ياريت
(هو كان متزوجها لما كان جديد في الشرطة كان لسه عسكري ودايما بضربها وبجي البيت سكران وحياتو كلها كانت بس شراب وعدم مسؤولية لحدي ما طلقها ومشى خلاهم من غير قروش ومن غير أي شي وهي كانت مع امها لحدي ما أمها اتوفت والبيت الكانو ساكنين بتاع عمها وأمها جاء شال بيتو وهي وولدها اتجهجهو، هو قدر يرجع كويس بعد فترة وخلا السكر وشغلو اتصلح واتزوج اعمل أسرة جديدة وما كان عندو الجرأة يفتشهم تاني)
اسي ما عندو حل غير انو يكلم رعد بانو هو ابوهو قبل ما أمو تصحى.
•
•
•
مزمل في بيتو،،
-عارفة ي ميسم الليلة جاتني بنت في العيادة( حكى ليها قصة ريفال كلها).
-يالله! معقولة هي وصلت المرحلة دي؟
-واكتر من كدا انا راسي ضارب وما عارف اساعدها كيف
-زي ما ساعدتني زمان
- بس انتي كنتي مختلفة عنها هي واصلة مرحلة جنونية عديل
-م تضايق نفسك انا متأكدة انك حتقدر تساعدها بس فكر براحة وحاول تتكلم معاها بمنطق
- هي البنت دي فاقدة المنطق عديل انا بس نفسي اساعدها لانها كدا بتضيع.
-حاتساعدها انا واثقة فيك.
-ان شاء الله
باسها في راسها وقام اتصل لدكتور أسامة واتكلم معاه عن حالة ريفال.
•
•
•
ريفال في بيتهم،،
-الليلة مشيت لدكتور اسمو مزمل وحكيت ليه عنك ي محمد انت عارف انا مشيت ليه عشان انت تطلع من خيالي عشان تاني م اتكلم معاك حتى بس انا م نفسي يحصل كدا ما قادرة اتخيل انو ممكن يجي اليوم الانت حاتكون فيه برة خيالي أو ما اتكلم معاك أو انت ما ترد علي بس ي محمد تفتكر اني ممكن ابقى مجنونة بسببك؟ تفتكر اني حاليا مجنونة؟ انا ما عايزة حاجة والله غير انك تجي واشوفك قدامي اقدر اتكلم معاك عادي( بتبكي) انا ما عارفة حانساك كيف انا خايفة على نفسي خايفة اكون جنيت بالجد وانا ما ملاحظة ياربي انت وين اسي وبتعمل في شنو؟
بتفكر فيني زي ما بفكر فيك؟؟
