إن لم تكُن عيني فإنّكَ
نورُها
أو لم تكُن قلبي فأنتَ حبيبهُ
والنّجمُ أقربُ من لقاكَ منالُه
عندي، وأبعد من رضاكَ مغيبه
أزهر بتكلم مع أمو،،
-أمي انا عايز أعرس
-(قامت وهي مبسوطة) اخيرا الحمد لله لقيت العروسة ومنو هي اسي نمشي نخطبها ليك
- عايز ريفال
-(متفاجئة) ريفال منو؟
-جيرانا الرحلو أمس بنتهم الكبيرة
-شنووو انت جنيت البنت مخطوبة وعقدها بعد كم يوم
- اي عارف لكن عايزها
-ازهر انا كنت دايما بقول انو انت العاقل والواعي ما زي احمد اخوك المجنون دا لكن الليلة فهمت انو كلكم مجانين بالجد كلكم مجانين
-أمي انا عايز البنت دي ولو ما ماشة معي عشان اخطبها بمشي براي
- لا حولا ولا قوة الا بالله البنت مخطوبة كيف نمشي نخطبها؟ وبعدين انت شفتها متين عشان تقول عايزها؟؟
-شفتها مية مرة يا امي وانا عايزها بس وما بهمني انها مخطوبة أو عايزة تتزوج أو أي شي
-ربنا يثبت علي العقل والدين
بقت تنادي في راجلها تعال شوف ولدك بقول في شنو
•
•
•
مزمل بتكلم مع ميسم بعد ما حكى ليها القصة،،
-قلت لي الولد اسمو أزهر وهو جاء من امريكا؟
- اي
-وساكنين في ....
- اي
-مزمل دا أزهر ود خالتي
-شنو انا كيف ما ركزت في حاجة زي دي والله اتلخمت لدرجة اني نسيت حتى انو نحنا مشينا ليهم بعد جاء من السفر
-اسي حيحصل شنو؟
- ما عارف يا ميسم ما عارف أزهر ود خالتك واسامة صحبي
- مزمل انت ما تحاول تعالجهم
-هو انا عارف مرضهم شنو ولا عارف حاصل عليهم شنو عشان اقدر اعالجهم
-ازهر ممكن يخطفها وممكن يعمل مشكلة كبيرة لو ما ادوها ليه
-واسامة م بخليها ليه الا لو هي قالت ليه ما عايزاك وكدا أسامة امورو بتجوط لانو بحبها بالجد
- ريفال الجننت الناس دي نفسي اشوفها.
•
•
•
أسامة وأمو جو لناس ريفال يباركو ليهم البيت الجديد
قاعدين رعد وأبوهو وأم ريفال معاهم وريفال وريتال في غرفتهم
-(أم اسامة)ماشاء الله البيت حلو ان شاء الله تتهنو بيه
-(أم ريفال)ان شاء الله ي رب
-(ام اسامة) العروس وين
قالت ل لرعد امشي ناديها قاعدين فوق ما بسمعو
رعد قام مشى ليها دق الباب ودخل
-اها الناس ديل تحت عايزين يشوفوك
-(بتبكي)ما نازلة
-اسي اقول ليهم شنو انا
-قول ليهم نايمة ولا أي حاجة
-(ريتال)قومي انزلي عشان ما تحرجي ناس أمي وهي عارفاك صاحية
-(رعد) اي انزلي بعد هم يمشو نحنا نشوف حل للموضوع دا
-(ريفال) انا بس حكلم أسامة واقول ليه اني ما عايزاك
-(ريتال) واسامة ذنبو شنو انتي توافقي وتاني ترفضي
-(رعد) انتي قلتي عايزاه بارادتك وترجعي ترفضيه كدا حتجرحيهو وأبوي حايكون مصر عشان يعرف انتي رفضتيهو ليه
-طيب اعمل شنو يعني انا م عايزة اعرسو ياخ
-اسي انزلي ليهم وبعدين نشوف
لبست وغسلت وشها ونزلت ليهم
سلمت عليهم وام أسامة تشيل وتبوس فيها وتقول ماشاء الله عروستنا السمحة ربنا يحفظك واسامة يشيل ويعاين ليها مشتاق ليها من زمن الخطوبة ما شافها وهي ما بتتكلم معاه على اساس مشغولة مع الرحول وكدا لكن هي بتتهرب منو
قعدت معاهم وبقو يتونسو وجابو سيرة العقد وريفال قلبها شغال دق دق دق دق دق
-(أبوها)نحنا ما عندنا مشكلة انتو شوفو الوقت البناسبكم
-(أم اسامة) قلنا نخليكم ترتاحو شوية من تعب الرحول
-(أم ريفال)اي والله لكن م مشكلة انتو شوفو الزمن الكويس معاكم.
رعد وريفال بعاينو لبعض
-(رعد) ممكن نستنى شوية على الأقل ريفال امتحاناتها قربت بعد ما تخلص
-(اسامة)ما مشكلة اهم شي عندي هي تكون مرتاحة لانو راحتها بتهمني.
ويشيل ويعاين ليها وهي منزلة راسها
-(أم اسامة)خلاص ما مشكلة بعد عروستنا تمتحن ونتم العرس مرة وحدة.
ريفال ورعد متوترين
بتظاهرو انو مافي شي لحدي ما الناس مشت وريفال رجعت غرفتها تبكي وعرفت انها في مصيبة.
•
•
•
أم أزهر بتتكلم مع ابوهو وقاعدين كلهم مع بعض،،
-ولدك قال عايز بنت جيرانا الرحلو أمس والبت مخطوبة والعقد بتاعها بعد كم يوم شوف ولدك المجنون دا عليك الله.
-(أحمد وأبوهو بضحكو)
-انا بتكلم معاكم وانتو بتضحكو بدل توعوهو
-(ابوهو) خليت بنات الدنيا ديل كلهم وما علقت الا في البنت المخطوبة وعقدها بعد كم يوم
-(ازهر) انا م عايز بنات الدنيا كلهم انا عايزها هي بس
-(ابوهو) انت شفتها امس بس كيف قررت انها تكون مرتك؟
-(أحمد بضحك) بكون شافها في الحلم
-(ازهر )اي شفتها في الحلم
-(احمد) خلاص مادام أزهر عايز البنت الكبيرة انا زاتي عايز الصغيرة
-(امو) ديل حايجننوني والله حايجننوني
اتلفتت لراجلها قالت ليه اتصرف مع اولادك انا خلاص زهجت ومشت
-(أبوهم)عشان ما تجننوني زي امكم احكو لي في شنو؟
-(احمد)يا ابوي انا ريتال دي بعرفها من زمان على فكرة بس ما كنت عارف انهم جايين يسكنو جنبها دا كل الموضوع
-كدا اول شي خلص قرايتك بعدين تعال قول عايز تعرس والبنت زاتها صغيرة
- اي انا ما مستعجل بس قلت اكلمكم ان شاء الله نعمل خطوبة البنت عاجباني
- خلاص تمام انت مشكلتك محلولة أزهر انت مالك
-(ازهر) انا برضو ريفال بعرفها من زمان بس ما كنت عارف اني ممكن القاها مخطوبة وعايزة تعرس بعد ما ارجع السودان
-واسي انت لقيتها كدا والعقد بتاعها بعد كم يوم
- انا ما حخليها تكون لغيري خليكم عارفين البنت دي لو ما عرستها والله اخطفها
-(أحمد بضحك)انت مستحيل تكون أزهر أخوي الكبير الأنا بعرفو
- انا كلمتي وحدة ولما اقول حاجة بعملها وانا ما متضرر عادي بمشي مكان مافي زول بلقاني فيه
-(احمد)ويجو يمسكونا نحنا يسجنونا
-(ابوهم ) انا معاك مادام انت عايزها ما حانخليها تعرس
-(أحمد مخلوع) يا حاج انت جادي؟
-انتو عارفين انا عرست امكم كيف؟
-(هم الاثنين)كيف؟
-شفتها يوم العقد بتاعها وقلت بس انا عايزها كلمت ناس بيتنا وقالو لي انت مجنون هي مرة راجل بعد كم يوم سمعنا انها طلقت لانو راجلها طلع أنصار سنة وقال الا تتنقب وهي رفضت مشيت طوالي ودقيت بابهم وطلبتها وقلت عايز اعرسها طوالي قالو لي استنى تتم العدة مع اني شفتها مرة وحدة.
-(احمد بضحك) وانا اقول نحنا طلعنا على منو
•
•
•
الصباح،،
ريفال لبست وطلعت ماشة الجامعة كانت متضايقة وشايلة هم بس قالت تمشي يمكن تفرق
أزهر كان قاعد برة وهو زاتو كان بفكر لحدي ما شافها طلعت ورجلينو شالتو لحدي عندها وهي انتبهت ليه
-(بعاين في عيونها) صباح الخير
- (متوترة)صباح النور
-ماشة وين؟
-(مستغربة) الجامعة
-(نبرة زول زهجان)اللبس اللابساهو دا تمشي تغيري وتجي انا منتظرك
-(مبسوطة وما مصدقة انها بتتكلم معاه) ليه اغيرو
-(مبسوط انها واقفة قدامو وما عايز زول يشوفها غيرو) كيف مالو ما شايفة انو البتاع دا ضيق الناس تشوفك كدا يعني؟
-جامعتنا كلها بنات نحنا
-حتى لو امشي غيري سريع وتعالي عشان اوصلك
-طيب
مشت وهي خجلانة هي زاتها ما عارفة ليه سمعت كلامو هو وقف وشغال يتبسم ويقول حعرسك وحتبقي مرتي انا ما انتظرتك الزمن دا كلو عشان في النهاية اخليك تمشي لغيري.
انتظرها لحدي ما غيرت وجات ليه
- دا كيف؟
-(سرحان فيها) حلو جدا جدا جدا
-(خجلانة ) طيب نمشي
-نمشي
فتح ليها باب العربية ركبت ودور العربية وهي بقت توصف ليه في الجامعة وهو يعاين ليها وهي تقول ليه بنعمل حادث كدا عاين قدامك لحدي ما وقف بيها في مكان وهي بقت تنق
-المحاضرة بتفوتني الدكتور ما بدخلني ليه وقفت في شنو ومالك وووووو
- خمسة دقايق بس احسبيها عندك حاتكلم خمسة دقايق ونمشي
-(لقت انها بتعاين ليه بس ) طيب
-انا عارف انو الكلام الحتسمعيهو دا ممكن بخليك تقولي اني مجنون بس انا حقولو وخلاص انتي لما بديتي تجي في خيالي الكلام دا كان قبل سنتين كنت بتخيل عيونك زي ما هي وكنت بفتش عليك بس ما لقيتك سميتك سحر لأني شايف عيونك فيها سحر بتكلم معاك وكأنك حقيقية بسمع صوتك وضحكتك وبشوفها في البداية كنت فاكر اني مجنون وانو دا مجرد خيال بس الخيال بقى يكبر معي كل يوم لقيت بنات كتار ممكن يكونو بشبهوك او عيونهم قريبة لعيونك بس ولا وحدة حسيت انها انتي وبقيت مصر على اني القاك انتي وبس وما عايز غيرك لو اقعد كدا من غير شريكة حياة لحدي ما شفتك في المطار وما مصدق اني شفتك بقيت جاري وراك وانادي فيك باسم سحر على اساس يمكن يكون اسمك بالجد بس انتي مشيتي كنت خايف اني ما القاك تاني بس اسي لما لقيتك عرفت اني ما مجنون وانك حقيقية عارف انك اسي مخطوبة بس عايز اقول ليك حاجة انا ما حخليك تكوني لغيري لأني ما صدقت اني لقيتك ولو عايزة تقولي اني مجنون اي انا مجنون وانا ما باخد رايك انا بوريك اني ما حخليك لغيري بس عشان انتي تكوني عارفة الحاجة دي.
بتعاين ليه وهي متفاجئة مستغربة مبسوطة خجلانة
مسك يدها وقلع منها الدبلة
-م عايز اشوفك لابسة دبلة بتاعة زول غيري فاهمة؟
لقت نفسها بتقول لي فاهمة
هي كانت عايزة تحكي ليه وتقول ليه انها برضو كانت بتفكر فيه الوقت كلو وكدا بس ما عارفة ليه ما اتكلمت يمكن عشان مصدومة أو هو ما اداها فرصة.
لحدي ما وصلها الجامعة وهي عايزة تنزل شال منها تلفونها وكتب رقمو وعمل جرس في تلفونو وقال ليها اول ما تطلعي تتصلي لي فاهمة؟ قالت ليه اي فاهمة
ودخلت الجامعة وهي حاسة رجلينها ما شايلنها ما مصدقة انها لقتو وهو حاليا بتكلم معاها هو طلع مجنون بيها اكتر منها بحبها شديد اي دا هو محمد ونفس اي حاجة هي كانت بتتخيلها حتى تصرفاتو وكلامو وغيرتو نفس أي شي اي شي .
