كم كنتُ أُطلقُ فوقَ الشطرِ أشرعتي
حتى أُلامِسَ في التذكارِ شــــطآنا
رجعت بيتها ولقت الشغالة واقعة في الأرض ملابسها مشرطة والدم كان ظاهر انها عملية اغتصاب بقت تصرخ واتصلت على راجلها وهو جاها وطوالي ودوها المستشفى.
كانت فاقدة الوعي اصلا وبعد زمن حتى قدرت تصحى وهي بتعاين للناس ديل كيف كيف ومن فتحت عيونها وهي بتبكي شديد
سجى م عارفة تتصل على امها ولا تعمل شنو اصلا، هي جابوها ليها تشتغل معاها ويحصل معاها كدا في بيتها تقول لأمها شنو تقول ليها ما قدرت اخلي بالي من بنتك وهم ناس طيبين وعلى نياتهم حيحصل ليها شنو لو عرفت بس هي مضطرة تكلمها اصلا فاتوكلت واتصلت ليها خصوصا انو حالة البنت متدهورة شديد وبتبكي وبس.
•
•
•
بتبكي على عاكف وخاتة اللوم عليها وبتقول انو دا امجد هو القتلو وكلو بسببي ياريت لو ما كان قلت ليه انو امجد بهددني ياريت ما كان حصل ليه الحصل من البداية وتشيل وتبكي اتصلت على غسان عشان تحكي ليه لانها متضايقة شديد وموت عاكف دا كان صعب عليها.
اتصلت ليه وهو رد ليها وكان صوتو تعبان
- ريفال
-(بتبكي)غسان مالك في شنو وتلفونك مالو قافل ليه يومين
- انا عملت حادث؟
-شنووو؟ حادث؟متين دا ووين وليه ما كلمتني
- كنت ماشي مع صحبي بالموتر ودخل فينا هايس تلفوني كان قافل ياداب اسي شحنو لي صحبي
-سلامتك انت اسي كيف كويس؟حصل ليك شي اتعوقت؟
-انا كويس ما حصل لي شي بس كضمات صغيرة انتي اسي بتبكي ليه في شنو؟
-عاكف مات يا غسان
-عاكف ود جيرانكم؟
- اي ياهو اطعن بسكين انا للان ما مصدقة انو هو مات ولا قادرة استوعب اصلا
-حصل كدا كيف
حكت ليه الموضوع كلو وهو بقى يهدي فيها انو كلنا بنموت وانو الدنيا كدا في النهاية
قفلت منو لانهم مشو بيت ناس عاكف أمو واخواتو حالتهم كانت صعبة وهي لقت امجد في وشها كان ظاهر عليه انو متأثر شديد، عايزة تمشي هو وقفها
-ريفال انا م قتلتو انا م عندي ذنب عاكف دا اخوي انا وهو اتربينا سوا كيف ممكن اعمل ليه كدا انتي ما عارفة عاكف دا بالنسبة لي شنو انا حاسي اني فقدت نفسي هو كان بالنسبة لي اكتر من صاحب(وبقى يبكي) اي صح انا واحد حيوان وبعتذر ليك لأني هددتك وكنت معذبك وانتي ما بتستاهلي وياريت لو تسامحيني
اتأثرت ليه شديد لانو هو وعاكف كانو اصحاب من هم صغار
جات ربتت في كتفو وقالت ليه ان شاء الله ربنا يرحمو.
•
•
•
أمريكا
-انا م عايز زول يعرف اني اشتريت المستشفى دي اصلا انا حاشتغل فيها دكتور زيي زي غيري
-معقولة يا دكتور أزهر بس حاليا هي ملكك
-ايوا بس انا م عايز الموضوع دا يتعرف بس يكون كدا والمدير باعتبارو المدير القديم انا هنا دكتور وبس
-طيب زي م عايز
جاتو مكالمة من ريل
-ايوا يا ريل
-انت وين؟
- في المستشفى
-انا جاياك طيب
- انا مشغول في شنو حاصل؟
-عايزة احكي ليك حاجة وم بقدر احكيها الا ليك انت
-ضروري يعني؟
-ايوا ضروري شديد
-نص ساعة بس لأني مشغول
-طيب ماشي
قفلت منو وقالت( شكرا لأنك اديتني من زمنك الثمين دكتور أزهر لكن نص ساعة كويسة)
•
•
•
أمها جات جارية المستشفى وسايقة معاها اولادها الصغار ومن شافت بنتها وقعت في الأرض وبقت تبكي وتضرب في نفسها كفوف وانو بنتها خلاص ضاعت واي شي ضاع وبنتها من شافتها اتجننت اكتر وبقت تبكي
سجى بتبكي لانو شايفة انها هي السبب في الحصل للبنت وما كان تمشي وتخليها براها والبنت حالتها صعبة وما راضية تتكلم وتقول دا منو العمل فيها كدا بس كانت بتبكي اليوم كلو
سجى عارفة انو هم م عندهم قروش أخوها سافر الدهب من سنة وما رجع تاني وهي شغالة في البيوت وأمها شغالة في مدرسة بتفرش حاجات للشفع وأخوانها صغار وابوهم اتوفى من فترة وهم ما عندهم شي يعني بعد الحصل دا امورهم حتتدهور اكتر.
سجى قالت إنها حتتكفل بمصاريفهم وبعلاج هدى لانها ما بتستاهل الحصل ليها ولانو الحصل ليها دا حصل ليها في بيتها هي.
رجعو البيت وهي ما بتتكلم مع زول والخبر انتشر وطبعا عادة الناس انو يعملو الذنب على البنت ناس الحلة كانو بتكلمو وهم كانو مستحملين كلامهم وساكتين وهي بس بتبكي وما راضية تقول شي وأمها اتصلت على أخوها وتلفونو خش معاها الا بعد كم يوم وهو دمو فار وكيف يحصل كدا وشال حاجاتو وراجع ليهم.
•
•
•
أمريكا
-هناك جريمة
-اين ومتى؟
-بالأمس في لوس انجلوس
-وما المطلوب؟
-ستذهب إليها وتكتشف الجريمة
-حسنا سيدي
،،،،
قاعدين في مطعم وهي قاعدة قصادو
-اها يا ريل لخصي؟
-انت ليه مستعجل لي كدا خليني آخد نفس
-طيب اها
-انا م عارفة اعمل شنو في المصيبة دي مافي زول غيرك ممكن يحلها لي
- في شنو ومصيبة شنو؟
-أزهر بصراحة
-شنو؟
- في واحد قاعد يهددني
- دا منو ويهددك بشنو؟
-انا كنت بعرفو من فترة وهو كان مصر اني اكون معاه وانا رفضتو وهو عندو لي صور وانا متصورة بوضعيات م كويسة لأني اصلا قاعدة في البيت واسي بهددني بيهم
-(شغال يفكر وشك في الموضوع عارف انو ريل ما بتهمها الحاجات دي وعادي لو زول نشر صورها بأي وضعية حتى لو ما لابسة اي حاجة طيب كيف اسي هي خايفة كدا) وهو عايز منك شنو في المقابل؟
-عايزني اكون معاه وامشي ليه في بيتو؟
-طيب اديني رقمو وانا بتصرف
-لا لا لو انت اتدخلت هو كدا ما حايخليني في حالي
-طيب ومطلوب مني اعمل شنو؟
-كيف يعني تسألني سؤال زي دا يا أزهر بس اتصرف انا خايفة منو
- ما انا قلت ليك اديني رقمو وانتي رافضة طيب انا اعمل شنو في الحالة دي؟
-انت ليه كدا انا اقول ليك واقعة في مشكلة كبيرة وانت بتتكلم معي بالطريقة دي؟ يعني انا امشي للزول عادي في بيتهم وانت ما حايهمك اوكي لو كدا انا حامشي ليه
وقامت ماشة وشغالة تمشي براحة فاكرة انو حايوقفها وكل شوية ترجع ورا وهو حتى ما ناداها
اتغاظت منو شديد رجعت ليه ووقفت قدامو وشالت كباية الموية وكشحتها فيه ومشت.
•
•
•
رجعو بيتهم بعد يوم طويل في بيت البكاء أم عاكف وأخواتو ما كانو قادرين يصبرو أمجد كان متأثر والوقت كلو بخت الذنب عليه
اصلا هم ما عملو حاجة لانو عاكف قبل ما يخش غرفة العمليات قال انو ما كان بقصد وانو امجد ما عندو ذنب.
ريفال اتصلت على غسان وبقت تتكلم معاه وتبكي وهو يهدي فيها ويقول ليها انو الدنيا ما بتستاهل وكلنا حانموت في النهاية.
- اسي انتي صليتي العشاء؟
-لا
-طيب قومي صلي
-حقوم
-ريفال انا ما عارف اذا انتي منتظمة في صلاتك أو لا بس عايز اقول ليك انو صلاتك دي هي الحتنفعك في دنيتك وآخرتك وانو لما تموتي صلاتك دي اول حاجة بسألك منها ربنا عشان كدا ما تقطعيها وخليك مواظبة عليها لانو والله لما تقعدي في المصلاية وتقيفي قدام ربنا حتلقي انو مافي احلى من الشعور دا عشان كدا واظبي عليها٠
-حاضر
-صلي ونومي.
-تصبح على خير
فعلا هي ما كانت مواظبة على صلاتها وبتصلي وقت وبتخلي وقت بس كلامو دا أثر فيها يمكن عشان هي بتحبو وهي عايزة تسمع كلامو وعايزة تصلي لانو الكلام دا جاء منو هو بس في كل الأحوال هي ما حاتفوت صلاة بعد اليوم دا.
•
•
•
أمريكا،،
-دي كل تفاصيل الجريمة يا بوس
-(منزل راسو تحت وبقرا في الملف القدامو فجأة رفع راسو وعاين للقدامو بنظرة حادة) كل الفترة دي قرابة سنة وانتو ياداب عايزين تتحرو في الموضوع؟؟
-م كنا قادرين نعمل حاجة ي بوس لأنو مافي دليل عليه
-(قام فوق وهو شايل الملف في يدو)القضية دي حتتحلى.
وطلع،،
•
•
•
في جهة تانية،،
قاعد في غرفتو وهي مظلمة في كرسي متحرك شغال يتحرك ورا ويرجع قدام طلع برة وهو بعاين في بيتهم الكبير الفاضي المفروض يكون أمو وأبو معاه وهو في عمر ال١٥ سنة حالتو النفسية كانت متدهورة لانو بحس انو وحيد الوقت كلو وانو مافي زول بحبو كان بعيد من كل الناس حتى من اصحابو في المدرسة يمكن عشان امو وابو دايما منشغلين وما مدينو الاهتمام الهو بستاهلو.
غط شعرو بالطاقية بتاعة الجاكت وطلع الشارع وهو ماشي بهدوء وبحاول يدس نفسو فجأة وهو ماشي شاف قدامو أولاد في عمرو وكان في واحد طلع ليهم اكياس فيها حاجة بيضاء اداهم ليها وهم بقو يشموها بقى مستغرب دة شنو وهو بعاين ليهم كيف هم مستمتعين بالحاجة دي كان نفسو يعرف دا شنو بس شخصيتو الانطوائية خلتو واقف بعيد وما يحاول يمشي ليهم ويسألهم، واحد من الاولاد شافو وبقى ينادي فيه وهو شغال يمشي خطوة ويرجع خطوة وهو خايف لحدي ما وصلهم الولد جراه وأداه كيس في يدو وقال ليه
