"وَكنْ لي سُليماناً على عرشِ أضلعي
آتيكَ من أَقصى المَسَافاتِ هُدهُدا.
بعد المغرب،،،
أزهر اتصل على رعد واول ما رعد فتح الخط
-وافق ولا لا؟
-قال بفكر وبديني خبر
-يفكر في شنو؟ انت قلت كل حاجة اتفقنا عليها؟
-ايوا بس تقريبا ما صدق أو ما فاهم ليه ما اداني جواب طوالي
-دا معناه انو الموضوع ما ركب في راسو انا حجيب ناس بيتنا ونجيكم اسي
-ي أزهر كدا استنى لما نشوف الحاج بقول شنو
-حاتقول لي استنى استنى لما يعقدو ليها وتكون لغيري
- ما حيحصل كدا بس لحدي بكرة
-لحدي بكرة بس
-اي اي
وقفل منو الخط وسامع ابوهو بنادي
مشى ليه وهو خايف من تصرف أزهر
-كدا اقعد ي ولد
-اها ي ابوي
-نحنا لازم نشوف علاج لأختك ونوديها لاحسن الدكاترة لانو موضوع المرض دا ما ركب في راسي وشكلو الدكتور المشيت ليه دا كذاب ساي واصلا اختك ما قالت اي شي ولا قالت م عايزة أسامة ولا اتكلمت دا معناه الا ما عايزة بتاع امريكا دا اصلا
-ي ابوي هي ما الا تجي تقول ليك انت انا وريتال عارفين
- طيب خلاص لو الكلام دا طلع صح بالجد من بكرة نمشي نفتش دكتور كويس ولو ما لقينا انا مستعد اسفرها تتعالج مستحيل يكون مافي ليه علاج وغير انا اديت الناس كلمة وما بقدر ارجع في كلمتي واسامة زول كويس وود ناس وانا ما حالقى ليها احسن منو
- طيب لو قلت ليك انو أسامة زاتو عارف بمرض ريفال وموافق انها تتزوج أزهر
-(زهج فجأة) دا شنو الكلام البتقول فيه دا كيف يعني موافق انها تتزوج الود داك ؟ انت قلت ليه شنو ولعبت بعقلو لما خليتو يصل للمرحلة دي؟
-ي حاج م كدا والله كدا اسمعني
-جيب لي تلفوني اتصل على أسامة خلي يجيني اسي عشان اتفاهم معاه .
جاب ليه التلفون واتصل على أسامة اتكلم معاه أسامة قال ليه انو م عندو مشكلة انو ريفال تتزوج أزهر عشان صحتها وهو ما عايز يضرها لكن ابوها حلف ستين يمين انو بنتو تتزوج أسامة لانو شايف انو الزوج المثالي ليها وقال لأسامة انا حعالجها مستعد اسفرها واي شي وهي اكيد حتبقى كويسة نحنا نأجل العرس لحدي ما البت تتعالج وتاني أسامة م قدر يقول ليه حاجة وقفل الخط على كدا ورعد متوتر تاني م عارف يقول شنو ابوهو قال ليه من بكرة نمشي نفتش دكتور كويس ونعرض عليه حالة اختك وانت م تجيب سيرة لأمها لحدي ما نشوف الدكتور بقول شنو عشان ما تخوفها ساي.
•
•
•
الصباح،،
أزهر اتصل على رعد صحاه من النوم
-اها قال شنو؟
-(رعد بحاول يصحصح ويفتح في عيونو) دقيقة قول بسم الله
-انا ما نايم من امس منتظر الصباح يجي عشان اعرف حصل شنو
-(رعد في سرو الزول دا والله م نصيح) طيب طيب حاحكي ليك
-اها
وقال ليه القصة كلها وهنا أزهر اتضايق شديد وقال ليه من البداية قلت ليك احل الموضوع دا براي لكن انتو منعتوني و شنو و شنو وقعد يجوط ورعد بحاول يهدي فيه وانو الموضوع حيتحلا لكن هو ما اشتغل بيه وقفل الخط ومشى لأبوهو وامو لقاهم قاعدين سوا مستكينين بشربو في الشاي
-ماشي أتقدم لريفال اسي
-(أمو بتعاين ليه باستغراب) البنت دي مش قلت ليك انها مخطوبة تاني إعادة الكلام ليه؟
- اي انا عايزها وهي زاتها عايزاني
-كيف هي متين شافتك عشان تبقى عايزاك
-بتعرفني قبل ما تشوفني حتى انا بعرفها قبل ما اشوفها
- دا شنو الكلام البتقول فيه دا ي ولد
-(ابوهو) يا جماعة كدا قولو بسم الله ما مشكلة نحنا نمشي للجماعة مادام البنت زاتها عايزاه
-عشان نتحرج من الناس ويقولو لينا بنتنا اصلا مخطوبة وبتاع
وقعدو يجوطو ويجوطو واحمد زاتو جاء وكلهم واقفين مع أزهر في النهاية اقنعو أمو انها تمشي معاهم وهي تسكت بس هم البتكلمو.
•
•
•
بعد ساعة،،
جرس باب ناس ريفال دق وهي قلبها بدا يدق مع انو أزهر ما قال ليها حاجة بس هي حست انو دا هو وبقت تقول ان شاء الله يحصل خير مشت صحت ريتال وبتقول ليها الناس جونا قومي قومي وريتال صحت مخلوعة ناس منو وفي شنو
رعد بعد ما قفل الخط من أزهر رجع نام لانو فاكرو بتكلم ساي وما بجي وأسي بعد سمع صوت الجرس قام مخلوع وبقول الله يستر الله يستر لبس سريع سريع ونزل يفتح الباب ولقاهم هم وهو بس خايف من أزهر يعمل مشكلة أو يتجنن قدام ابوهو .
قال ليهم اتفضلو اقعدو وأبوهو طلع طوالي ومن شافهم قدامو اتوقع انو كلام رعد يكون صح
قعد معاهم ومرتو برضو جات قعدت وهي ما فاهمة حاجة وانهم جو من الصباح مالهم جابت ليهم شاي وكيك وجو قعدو معاهم ورعد كمان
-(ابو ازهر)مبروك البيت الجديد ان شاء الله كدا يكون فيه كل الخير
-(ابو ريفال)ان شاء الله زاتو الحي ماشاء الله هادي
-(ام ريفال) اي فعلا هادي جدا تحس مافيه ناس ساكنين
-(ام ازهر) اي صح لانو مافيه أطفال وكدا
-(ازهر) يا ابو رعد انا ما عايز اطول عليك بس انا عايز بنتك الكبيرة ريفال على سنة الله ورسوله .
أمو وأبوهو مستغربين انو بدا طوالي اي واحد في سرو بقول بسم الله.
ابو ريفال عارف انو حايقول كدا بس برضو مستغرب وما عارف ردو حايكون كيف
ام ريفال ما فاهمة حاجة طبعا
رعد خايف من الحيحصل ومن ردة فعل ابوهو وازهر
-(ازهر)ويتمنى انو ما يكون عندك مانع اصلا اي شي جاهز الصالة والفنانين والبيت واي شي ولحدي ما هي تخلص قرايتها حنقعد هنا بعد تخلص حنمشي أمريكا طوالي.
أمو وابوهو واحمد اخو أي واحد بعاين للتاني ومستغربين فيه متين جهز الحاجات دي الصالة والبيت متين الكلام دا الود دا بالجد م نصيح.
ابو ريفال ما عارف يقول ليهم بنتي عيانة وانا حعالجها وبتاع قدام الناس ولا قادر يقول حاجة بس في النهاية قال
-زي م عارفين بنتي حاليا مخطوبة لدكتور أسامة ومفروض العقد بتاعهم يكون بكرة بس بسبب انها مريضة شوية انا اتكلمت مع الناس عشان نأجل موضوع العرس دا شوية وانا اديتهم كلمة فإنك تجي وتطلبها وهي مخطوبة كدا ما ينفع
ام ريفال بتعاين لراجلها يفهمها حاجة انو بنتها عيانة كيف وعندها شنو وهي على اساس مرتبة لأي حاجة انو بكرة العقد وكيف أجلوهو فجأة وبتاع.
ازهر ماسك اعصابو بالعافية وبين انو يجوط ويكسر ليهم كل الحاجات القدامهم دي في راسهم لكن دا ما حل كدا أبوها حايكون مصر انو ما يديها ليه فقرر انو يتكلم معاه بهداوة ويحاول يقنعو
-انا فعلا عارف انها مخطوبة لواحد تاني بس انا حختها في عيوني ما حخليها تحتاج حاجة لو عايزة لبن الطير بجيبو ليها انا شغلي كلو في امريكا بس لحدي ما هي تخلص جامعة انا حكون قاعد معاها هنا واساعدها في قرايتها وهي بس عليها تطلب اي شي حايجيها لحدي عندها
ي ابو ريفال انا م عايز حاجة غير انك توافق ومتأكد انك ما حتندم وانا لما كنت هناك رسلت يبنو لي بيتي والحمد لله اسي خلص وان شاء الله حيعجبها وتكون مرتاحة فيه وانا ما حتعبها بالشغل لانها بتدرس بس حخليها تركز في قرايتها واي شي بعملو ليها وبالنسبة ليكم انتو ما بحرمكم منها بيتي مفتوح على طول لأي واحد منكم وهي وقت ما عايزة تجيكم تجيكم حعاملها زي الطفلة الصغيرة وطلباتها كلها اوامر هي تطلب وانا انفذ واوعدك ما حاتجيك بتبكي ولا متضايقة في يوم وعمري ما ارفع يدي عليها لانها نفسي والزول ما بأذي نفسو.
طبعا الجماعة ديل كلهم مستغربين من الكلام الزول شاف البنت كلها كم يوم
احمد في سرو( طلعت خطير انا فاكرك كلام الحب دا كلو بعيد منو طلعت انت سيدو)
-رعد في سرو( بعدين لما امشي أتقدم لرتاج اقول لابوها الكلام دا حايقول لي سوقها اسي دا)
- ابو أزهر في سرو( طلعت أخطر مني ي ود ي طالع على ابوك)
ابو ريفال الكلام عجبو وهو حاليا محتار يقول شنو بقى يبرر لنفسو اصلا أسامة قال م عندو مشكلة انو بنتو تعرس أزهر وديل ناس جيرانا والباب في الباب وشكلهم ناس كويسين ما شفنا منهم حاجة كعبة من جينا هنا وغير كدا ريفال المرض العندها دا م بتعالج الا اذا هي اتزوجتو ف مافي مانع.
-اااه طيب كدا ان شاء الله خير لحدي ما ناخد راي البنت ونديكم خبر ونكلم الجماعة ( هو عارف انو بنتو موافقة بس ما عايز يقول ليهم طوالي كدا خلاص اديتكم بنتي وبتاع)
أزهر فهم انو موافق وخلاص تاني ما عندو مشكلة الدنيا بقت ما ساعياه من الفرح.
اتونسو وشربو الشاي وبعدين طلعو
وريتال وريفال من سمعو صوت الباب نزلو ليهم عشان يفهمو الحاصل.
بعد شهر،،
وهم في بيتهم
ريفال بتعمل في شعرها وهو بعاين ليها
-عارفة انو انا البيت دا بديت ابناه من انا في امريكا كنت عارف اني حالقاك عشان كدا كنت عايز اعمل اي شي سريع سريع عشان لما اجي نعمل العرس طوالي
-(اتلفتت عليه) يعني كنت متأكد انك حتلقاني؟
-متأكد جدا انا لما شفتك في المطار جيت طوالي شفت البيت وصل وين وحصل شنو وحجزت الصالة وجهزت كل الأمور
-( بتضحك) طيب اسي لو انا ما وافقت اخلي أسامة وما وافقت اعرسك
-بخطفك طوالي هو انا اصلا رايك م عايزو
-(بتضحك) لا ي شيخ
-والله
- طيب انت عارف حاجة؟
في حاجة انت م عارفها وانا م لقيت فرصة اقول ليك
-الي هي؟
-قبل كم سنة انا حصلت معي حاجات كتيرة ومشاكل بسببها انا بقيت وحدة تانية اتغيرت للأسوء وفي الفترة دي بقت تجيني خيالات عن واحد وانا سميتو محمد كنت بتكلم معاه وبحكي ليه اي حاجة وبتخيل شكلو بعدين قلت اني مجنونة ولازم اتعالج لانو الموضوع اتطور شديد ومشيت لدكتور لمزمل الي هو راجل ميسم بنت خالتك وكنت فاكرة اني اتعالجت لحدي ما لقيتك وعرفت انو محمد حقيقي
-(ابتسم) عارفة اني عارف دا كلو
-(متفاجآة) عرفت كيف؟
-(بضحك)عرفت كدا
طيب انتي عارفة انو ابوكي فاكر انو نحنا مجانين
-كيف يعني؟؟
-عشان هو يوافق اني اتزوجك رعد اخوكي الف ليه قصة وانو نحنا مجانين وما ينفع انك تتزوجي أسامة ولا كدا حاتجني اكتر والعلاج الوحيد انك تعرسيني انا
-(بتضحك شديد) م جادين بالجد ما جادين
- انا كنت بس عايزك وما بهمني الطريقة الاتزوجنا بيها بهمني انك اسي مرتي وبس
هي تخصني!
بكلامها غير المفهوم، بتعابيرها الفرحة، ملامحها الحزينه، تخصني!
مشاوريها التي بلا هدف، مواضيعها العادية، تعنيني وحدي، ولا يحق لأحد رؤيتها وهي تضحك غيري!
بغضبها اللطيف، بثورتها الناعمة، بشخصياتها المئة، بتوترها الدائم، بحبها لي، هي لي!
هي قبلتي الثانيه، قدسي وأرض ميعادي، تسكن وحدها جُدران قلبي العالية، معلق عليها لوحة صغيرة تقول "ملكية خاصة"، أو عبارة "أرض عسكرية" محظورة تابعة فقط لي!
هي النهر وأنا المصب!
هي الليل وأنا الأحاديث الحزينه!
هي النجوم وأنا السماء!
هي القلب وأنا الدماء!
هي كُل ما يُمْلٓك ويُمَّلك وهي مُلِكي!
•
•
•
بعد ٣ سنين ،،
في الفترة دي،،
رعد ورتاج صحبة ريفال اتزوجو وحاليا عندهم ولد وعايشين مع أهل رعد في البيت
- انا م بحب ارجع للماضي بس انا ولأول مرة ما اخجل من الماضي بتاعي وممكن اتكلم بفخر اني قدرت اتجاوز اي حاجة انا اتعرضت لاغتصاب من اولاد زيي كدا والحاجة دي خلتني أميل للاولاد الحمدلله اني اتعالجت عند مزمل ورجعت طبيعي
-(متفاجآة من البقولو ليها)
-أمي ربنا يرحمها كانت دايما بتقول لي عايزاك تتزوج عايزة افرح بيك عايزة اشوف اولادك قبل ما اموت وانا كنت بحس اني ما راجل واني ما بقدر اتزوج واحقق لأمي حلمها وربنا اخدها قبل ما تشوفني متزوج بعد اتعالجت شفتك انتي وحسيت انو الدنيا دي كلها ما فيها غيرك كنت متردد من اني اصارحك أو اتكلم معاك كنت خايف بس انا اكتر حاجة عملتها كويسة في حياتي وبفتخر بيها اني حاليا متزوجك يا رتاج
-انت أرجل راجل شفتو لأنك قدرت تتجاوز دا كلو ورجعت قوي واتعالجت وانا محظوظة بيك جدا جدا والله
ﻭﺍﻻﻗﻴﻚ ﻓﻲ ﺍﻟﻤﻜﺎﻥ ﺟﻨﻪ ﻋﻮﻳﺪ ﺻﻨﺪﻝ ﺷﺘﻴﻞ ﺣﻨﻪ ﻳﻔﻮﺡ ﻣﻦ ﻗﻮﻟﻚ ﺍﻟﻌﻨﺒﺮ ﻳﺪﺍﻭﻱ ﺟﺮﻭﺣﻲ ﻭﺍﻷﻧﻪ...
•
•
•
أسامة كان ماري بفترة صعبة لانو ما قدر يتجاوز ريفال بسرعة رجع الإمارات والحمد لله مع الأيام قدر يتجاوز وهو حاليا خاطب دكتورة معاه في الجامعة الهو بدرس فيها.
•
•
•
ريتال اتخطبت لأحمد اخو أزهر وهي حاليا في الجامعة
-تتذكر لما كنت بقول ليك يا شافعة وكنتي بتردحي لي وقال شنو خاتة صورتك بروفايل في الفيس براسك الكبير دا انا زاتي م عارف عملت ليك آد ليه
-(بتضحك) بالله اسكت انت نسيت صياعتك كنت بحنسك للقراية تحنيس ي معفن تعبتني معاك والمشكلة انك كنت قليل ادب ما عارفة كنت متحملااك كيف اصلا
-القلب وما يهوى
بعد قلة أدبي دي كلها بحبك يا شافعة
زي وطناََ وقت اشتاقلو برحل ليهو من غير زاد..
•
•
•
مزمل بقى الدكتور النفسي بتاع العائلة كل ما زول تحصل معاه مشكلة يجرو ليه كرهو حياتو قال ليهم والله انا يوم اقفل العيادة دي وارتاح كرهتوني ناس ما عندهم غير المشاكل انا تعبت منكم
ريفال واحمد يتشاكلو يجو جاريين ليه ام ريفال وابوها وهناك ام أزهر وابوهو.
#يتبع
