أَنت النَعيمُ لِقَلبي وَالعَذابُ لَهُ
فَما أَمَرُّكِ في قَلبي وَأَحلاكِ
أمريكا
ولدها بقى يجري في البيت من هم خشو والبيت كبير وهي تنادي فيه محمد أقيف ي ود
أزهر مسكها من نصها
-اسي خلينا من محمد يمشي وين م عايز خليكي معي
-(خجلانة) طيب اهااا
- انا الليلة عايز اوريك أي حاجة كنت بقول ليك اني مؤجلها لحدي ما نجي هنا حوريك الحاجات المخبيها حتى على ناس بيتنا
-والي هي شنو؟
-تعالي
مسكها من يدها وخشى معاها مكان في البيت عبارة عن غرفة صغيرة وكان فيه خزنة فتحها وهي انبهرت شديد من الشافتو كانت مليانة دولارات ذهب واي حاجة ممكن تتخيلوها
- ازهر دا شنو
شال عقد من الخزنة ولبسو ليها عبارة عن لمعة بس وهي ما مصدقة الشايفاه
-م عايزو ينزل من رقبتك
- ازهر انت كيف قدرت تجيب كل الحاجات دي في فترة ووو كيف يعني م فاهمة
- انا لما جيت هنا كنت صغير فكنت بشتغل اي شغل وما بقعد ساي كنت بغسل العربات والجزم اشتغلت في مطاعم في فنادق اي شغل ممكن تتخيليهو لحدي ما جاتني فرصة وبقيت تابع لجهاز المخابرات الأمريكية بس انا كان مفروض ما اقول لزول اصلا اني تابع ليهم حتى لو ناس بيتنا كل الناس عارفة اني دكتور أزهر بس وما حاجة تانية كل حياتي هنا كنت بتعب وما بقعد دقيقة وحدة كل الناس فاهمة انو أزهر في امريكا بكون عايش حياتو ومن بنت لبنت بس انا كان بهمني اتحصل على قروش عشان اعمل بيها حاجات كتيرة كتيرة
انا لما جيت هنا ناس بيتنا ما كان عندهم قروش وضعنا كان صعب شوية ختيت عهد على نفسي اني امتع اهلي واخليهم يعيشو ملوك واعيش مرتي وأولادي احلى عيشة
ناس بيتنا للان فاكرين انو القروش الكانت بتجيهم من شغلي في المطعم والبتجيهم حاليا من شغلي في الطب وبس اما موضوع المخابرات انتي بس العارفاه وموضوع الخزنة برضو والبيوت العندي في امريكا وبريطانيا حوديك ليهم كلهم وتشوفيهم.
اليوم البعديه،،
مشو ومعاهم ولدهم بيتو الفي الجبل وهي مبهورة شديد من جمالو وما مصدقة الشايفاه قعدو فيه يومين وهي عايزة تقعد اكتر لكن هو قال ليها انو يوريها باقي البيوت حتعجبها اكتر بعدين مشو البيت العلى البحر بيت صغير كدا هي انبسطت شديد وما عايزين يمشو منو فقعدو فيه ٤ يوم بعدين وداهم بيتو الفي فرنسا الي هو عبارة عن بيت كلو بالأسود يعني فخامة فخامة فخامة وكان طالي على البرج طوالي وهي بقت تحنس فيه انو يقعدو هنا بالمرة وما يرجعو امريكا لكن هو قال ليها انو شغلو كلو هناك وكدا وقعدو فيه اسبوع بعدين رجعو امريكا وهي نزلت شغل وهو كمان رجع لشغلو.
أي واحد لقى التاني ونسو الخيالات بتاعتهم ما مضطرين يتكلمو في الخيال لانهم لقو بعض، اي واحد حريص كل الحرص انو يحافظ على التاني لانو مجنون بيه ما بقدرو يتخيلو حياتهم من غير بعض يمكن حتى هم مستغربين في القصة الحصلت معاهم وانها معجزة معجزة انو لقو بعض بعد خيال دام فترة طويلة ، للان هم ما مصدقين انو حصل معاهم كدا بس الحاجة دي خلت زواجهم يكون حلو واي واحد عارف انو التاني مستحيل يستغنى عنو لانو وصلو ابعد مرحلة من الحب.
هو لقى شريكة حياتو الكان بتمتاها عمرو كلو وبنفس المواصفات نفس العيون نفس اي شي وشاركها اي حاجة بتخصو ما شارك بيها زول تاني.
هي لقت الزول الخلاها تنسى اي حاجة عاشتها زمان عرفت انو كل الاختيارات قبليه كانت غلط وانو اي حاجة حصلت عشان توصلها ليه وهي اتعلمت كتير من الحصل معاها وحاليا مافي زول ممكن يكون بسعادتها ربنا اداها اكتر من ما هي اتمنت وكل الحصل معاها كان اختبار وهي نجحت فيه.
*برجوازي*
*قامة طوله، عيونه القهوجية،حاجبيه المقرونين ، أنفه المعتدل، عروق يديه البارزة،وجهه، همهماته، همساته، مداعباته، مغازلاته، محبته للقهوة، اندماجه في الكتب، بروده كالثلج، عصبيته، انتقاده، حنيته، محادثاته الدافئة*
وجهه الباعث للتفكر يجعلني أغرق فيه كالبحر، نظرات عيناه الحادة التي تخترق قلبي كيف له أن يجمع كل هذه الحنية مع القسوة؟ كيف له أن يكون حار وبارد في ان واحد؟ صوته،كيف يصبح بحر وسماء في ان واحد؟ كيف لي أن احلق واغرق؟
هو الوطن فهو يشبه الهوية عندما اكون غريب.
*أيلام قلبي بما هوى أم عيناك بما اغويتني تلام؟*
*برجوازي*
*كنت أذهب إليه بالرُغم من إنطوائي وأتحدث معه كثيرًا بالرُغم من قلة حديثي كان مُختلف جدًا، لم تكن كل الطرق تؤدي اليك انا من كان يعكف الطريق عنوة لأعود اليه، وصفني ذات يوم بالنور ومنذ ذلك اليوم وانا اضئ لأجله،يعرف كيف يقول لي احبك بعينيه،أراه عذبا في الخصام وفي الرضا وأراه في كل الظروف جميلا*
*أحببته برجوازي*
النهاية،،،
-أي حاجة بتحصل معانا بتكون لخير فنحنا ننتظر الخير دا لحدي ما يجي وما نستعجل.
-ربنا لما يختار لينا احسن بألف مرة من اختياراتنا.
-الدكتور النفسي ما عيب وما معناها اننا مجانين لو مشينا ليه كلنا بنكون محتاجين زول نحكي ليه عشان يخفف عننا.
-كما تدين تدان وبنات الناس ما لعبة زي ما بتخاف على اخواتك خاف على بنات الناس برضو.
- صارحو بحبكم للناس البتحبوهم لانو الموت ممكن يشيلنا قبل ما هم يعرفو.
-اسمع كلام عقلك لانو هو البرشدك الاحساس البجيك أو الكلام البجيك في عقلك فجأة هو البرشدك اسمع الصوت البجيك فجأة.
-انتبهو لأقرب الناس ليكم لانو الضربة ممكن تجيك من اقرب زول ليك وحاتكون بتوجع شديد.
-ما تظلم زول لانو عذاب الضمير مافي حاجة بتوجع اكتر منو.
- ما تيأس لانو انت ما عارف ربنا كاتب ليك شنو.
- ما تحاسب نفسك على حاجة انت ما عندك ذنب فيها.
-خلو بالكم من أولادكم وبناتكم لانكم ما عارفين البحصل وراكم خليكم قريبين منهم عشان بعدين ما تندمو.
-الحاجة البمنعوك منها ناس بيتكم ما عشان هم بكرهوك عشان هم عايزين مصلحتك.
-اجتهد عشان تصل للعايزو زي ما عمل أزهر كان بس همو شغلو لحدي ما وصل وكل العايزو بقى قدامو.
-مافي حاجة مستحيلة كلنا ممكن نصل للعايزنو بس لما نكون واثقين اننا حنصل.
-الانتقام ما بفيد في حاجة خلو الأمور ل الله هو بدبرها.
- ما تثق في اي زول وفي نفس الوقت خليك واثق في نفسك وحبها لانها بتستاهل.
*الرواية من وحي الخيال لكن ممكن تكون حقيقة في واقع ما*
*بستقبل تعليقاتكم على الرواية في الايميل الخاص بي*
nafahatmahmoud0011@gmail.com
*بحبكم جدا*
