" عاشق لميمات "

عاشق الميمات - الجزء  (الاخير)
----------------عاشق الميمات - الجزء 48 (الاخير)------------------ وصلنا لمدينة حطيت هونيدة عند ماماها وقلت نجيب دورة لعند التريتور نتحاسب معاه ملي وصلت لواحد الطريق خاوية شويا شفت فيها 2 مشرملين باقي براهش كايكريسيو فواحد المرا وجابدين عليها الجناوا وهي كاتزاوك فيهم و واحد منهم كايضربها بالجنويا لراس باش طلق الصاك ولكن تا هي جلدا مابغات طلق الصاك مشيت مكسيري لعندهم وكانكلاكصوني بالجهد والله ماخافو وقفت عليهم نزلت بغا واحد منهم اضربني شديتو رفعتو بنص وهو يهرب لاخور وناض هادا اللي ضربت بغا يهرب وشديتو شنقتو وملي مشيت عند ديك المرا اللي جلسات فطوموبيلتها كاتبكي والراس ديالها كولو دمايات طليت عليها ماتوقعوش شنو شافت عيني لقيتها تورية المهندسة اللي كانت باغية تنصب عليا ف 300 مليون كي شافتني تصدمات تورية كاتبكي : حبيبي احمد انا : هادا حمد العروبي ماشي احمد هادا هو اللي كنتي باغية تنصبي عليه ف 300 مليون تورية : سمح ليا عافاك الشيطان لعب بيا شفتك كاتفرق الفلوس فالعرس وطمعت انا : هاد الخبيير ديالك ماباغيش نسمعو كون ماخفت هاد البرهوش اكريسي شي مرا خرا كون طلقتو امشي فحالو تورية : لا عافاك ماطلقوش المشرمل كايبكي : عافاك طلقني اعمي والله إما نعاود انا : شحال فعمرك ؟ المشرمل كايبكي : 16 وكانقرا ف اولى باكالوريا اعمي انا : نتي درتي معايا غلطة كبيرة ودابا جا الوقت اللي نحاسبك فيها ونتا غادي نطلقك ودير عقلك حيت كون طحتي فشي حد اخور مايعقلش عليك والكريساج فيه من 5 سنين ورجع وكي شفتي تا صاحبك سمح فيك المشرمل : عمري نعاود والله غي قلت الشي هي اللي خلاتنا نديرو هادشي جبدت شي حاجة من جيبي عطيتها ليه تورية : لا عافاك ماتقولياش غادي طلقو فهاد اللحظة طلقت هاد المشرمل البرهوش ومشا كايجري تا بعد علينا هو يقوليا المشرمل : الله ارحم ليك الواليدين اعمي والله تا نبعد على هاد الطريق وعلى رفقت السوء صاحبي اللي زييدني لهادشي سمح فيا وهرب انا : الله اهديه تا هو مشا المشرمل تورية : حشومة عليك والله خليتها بلاكا وزت فحالي حيت كيما نقداتها سلوى من الحبس حيت عتاذرات تا انا نقدت هاد المشرمل حيت عتاذر كملت طريقي لعند التريتور لقيتو كايتغاوت مع واحد الدري ايكون فعمري تقريبا ماحسوش براسهم حتى وقفت عليهم انا : اش هاد الفوضى ؟ علال التريتور : والو ا سيدي انا : غي احمد بلا ديك سيدي قوليا اش كاين ؟ داك الولد : كلا ليا رزقي 1500 درهم كانتسالها ليه ماعطاهاش ليا انا : كيفاش تا كلاك فيها ؟ داك الولد : شحال من بريكول خدمت معاه وماخلصنيش ودابا الواليدة مريضة ماعندي تا باش نشري ليها الدوا انا : فاش كاتخدم نتا ؟ داك الولد : انا اخويا طالب معاشي فاشما كان وهاد السيد كانخدم معاه فداكشي ديالي المنصات انا كانبنيهم انا : علال اش كاتقول فهادشي ؟ التريتور : ماعندي مانقول انا : جيب ليا الدفتر ديال الحسابات مشا جابو ليا وشفت فيه اخر تاريخ هو فالعرس ديال ختي هنية انا : ماخدمتو من داك النهار ؟ 15 يوم ماخدمتو ماكريتو تا حاجة ؟ داك الولد : اسيدي راه يوميا كانخدمو العراسات والمناسبات انا يوميا كايصيفطني هاد النصاب نبني ولا نحييد منصة التريتور : عافاك ا سيدي سمح ليا انا : غي احمد بلا سيدي وراك شفرتيني مرارا وتكرارا وسمحت ليك ولكن هادي مافيها سماحة ، سير نتا (لداك الولد) كلم ليا غزلان من الصالون داك الولد : واخا ا سيدي انا : لاخر مرا تقوليا هاد سيدي ، سيدك وسيدك سيدنا رسول الله عليه افضل الصلاة وازكى التسليم داك الولد : عليه الصلاة والسلام (الصعاليك حتى نتوما صليو على النبي) ملي مشا اكلم ليا غزلان انا تاصلت بسلوى سلوى : الو المدير انا : سلوى واحد السيد خدام معايا كايشفرني وعندي الدلائل والشهود سلوى : دوز عندي دابا نمشيو نديكلاريو بيه وخلي ليا الملف نعجبك فيه انا : واخا حتى ندوز عندك ملي ساليت الاتصال ديالي شفت فعلال لقيتو شاد راسو وكايبكي انا : شحال ديال الوليدات عندك ؟ علال : 5 انا : كون كانو كايهموك ولادك كون وكلتيهم الحلال غايحاسبوك يوم القيامة على هادشي اللي كاتوكلهم ، ارا ليا السوارت ديال المحل وديال الديبوو وسير لداركم حتى يجيو عندك البوليس ولا سير سبقني سلم راسك حسن ليك جات غزلان انا : غزلان باقي عندك من الفلوس اللي عطيتك تخلصي بيهم الناس من الحساب ديال بنت المديرة ؟ غزلان : 4 ديال المليون وشي صرف انا : شحال داك الصرف ؟ غزلان : شي 3500 درهم انا : عطيها لهاد الولد راه مو مريضة غزلان : واخا داك الولد نزلو دموعو مسكين وجا ايبوس ليا يدي انا : استغفر الله اش كادير اخويا ؟ داك الولد : اخويا حسيت بيك شفقتي عليا وانا كنت محتاج نحس باللي شي واحد حاس بيا انا : مالك اخويا قلبك طايب ؟ غزلان : مو مسكينة عندها القلب وخاصاها عملية وماعندهمش باش غي الدوايات باش كايهدنو ليها المرض ديالها انا : علاش ماقلتوهاش ليا ؟ شحال العملية ديال ماماك ؟ داك الولد : 3 ديال المليون ونص اخويا انا : كانعرف واحد المصحة زوينة وغادي نتكلف بالعملية ديال الام ديالك والكمال على سيدي ربي غدا ديها لمصحة النور اشوفها الطبيب واعطيها موعد انا غادي ندوز عندهم نرصي معاهم الامور وماتبكيش اخويا دموع الرجال صعاب والراجل الا شفتي دموعو عرف باللي وصلات فيه لعظم وهاز هم يهد الجبال درت عند غزلان لقيتها كاتبكي تا هي متأثرة بهاد الموقف وتا التريتور كايبكي ولكن كايبكي على همو وحدو ماحاسش بعباد الله انا : شحال فاش كليتيني فهاد 15 يوم ؟ التريتور : 4 ديال المليون انا : كاع هادشي صطي فيه ، كبير الكرش تفركع ليه ، سير جيبها ونسمح ليك التريتور : راه كاينة هنا فالمحل دخلت معاه جبدها عطاها ليا وجريت عليه من المحل ووصيت غزلان ضبر ليا شي واحد ثقة ونصحاتني بخوها كبر منها وعندو خبرة فهاد المجال ووافقت عليه بشرط الحساب غانتحاسب معاها هي ووصيتها ابدلو الساروت لكاع القفولة اللي فالمحل والديبوو خديت ديك 4 تاع المليون وركبت طوموبيلتي وديت معايا تا ديك 4 اللي عند غزلان بعد ماعطات لداك الدري 3500 درهم ركبت وانا وداك الدري طوموبيلتي نيشان لكلينيك ووصيتهم عليه باللي غايجيب مو غدا واطهلاو فيها وكولشي على حسابي من بعد رجعت لداري لقيت الحبيبة ديالي موجدة ليا عشيوا زوينة تعشينا الراس فالراس وداز كولشي زين الحمد لله بعد اسبوع ... دارت الام ديال داك الولد العملية ونجحات ليها ودعات معايا مسكينة بزاف ديال الدعاوي الحسنة وفهاد الاسبوع نيت تاصل بيا مول القاعة ديال الافراح اللي درنا فيها العرس ديال بنت المديرة وقاليا باللي راه موافق على الشروط اللي كنت داير عليه باش نديرو شريكي ودوزت ليه الرقم ديال خو غزلان اللي ولا مكلف بهاد الاعمال وفهاد الاسبوع نيت ديت حبيبتي وعرفنا شنو الجنس ديال التوام اللي عندها فكرشها فرحنا بزاااف من هاد الموضوع ومشيت انا وحبيبتي شرينا ليهم الحوايج بالفرحة حتى قبل مايتولدو والصلة بين هند وهونيدة توتضات وهادشي اللي باغي انا والحمد لله على كل حال بعد شهر ونصف... خدمت معايا شيفور خاص ليا وهونيدة خدات واحد الشهادة كاتخول ليها تبدا خدمتها فتسيير المقاولات الكبرى وساعداتني فالمشاريع ديال بزاف وخديت منها تجربة وفهاد المدة اللي دازت تزوجات نوهيدة بداك الاستاذ المغريبي كي تزوجات نوهيدة الام ديالها (ريم) كتبات كولشي لبنتها هونيدة الا ديك العمارة كتباتها لخدامة ديالها سامية اللي تخطبات من واحد السيد من الحي ديالنا واللي تا هو لاباس عليه اصلا ديك سامية الله اعمرها دار وغزالة وتستاهل و كون ماكانتش تستاهل ماكانتش ريم تكتب ليها عمارة بداك الحجم وفحي زوين المهم ريم رحلات لفيلا ديالها بعد ما خرجو منها دوك الناس اللي كانت كاريا ليهم وفهاد الاونة كانت الفيلا ديالي كملات فالاصلاح والتجهيز وكولشي وتا لي جاردينيي دارو خدمتهم على اكمل وجه ونتاقلت ليها انا ومراتي هونيدة وديت معايا الكلاب ديالي اللي جبتهم النهار الاول على اساس الحراسة بعد مافرشاتها لينا مهندسة الديكور اللي نصحاتني بيها سلوى المهم من بعد انا تاصلت ب حليمة تجي هي وخوها اللي غادي نكلفو اكون رئيس العمال فهاد الفيرما حيت الصراحة راها فيرما ماشي غي فيلا والدار اللي بنيت حدا الكوارة غادي تكون ديالو طلعات الواليدة ومرات خالي وهند وخالي بنعيسى وخالتي وخالت هند باش نكتبو كتاب العقد النكاح بيني وبين هند واخيرا تزوجت بهند اللي كنت كانبغيها ولكن هونيدة كتر وحتى نتوما اللي كاتقراو دابا فالقصة راه ولفتو هونيدة كتر من هند من بعد جات هند لدارها (الفيلا ديالي) كل وحدة الطبقة ديالها وحليمة هي المكلفة بامور البيت وخوها مكلف بالامور الاخرى بعد ما جبت النعاج ديالي اللي كان مقابلهم ليا الواليد و اللي تضاعف العدد ديالهم تقريبا تبارك الله والحمد لله ودخلت تا على 4 ديال البقرات هولانديات وتبارك الله على خو حليمة راه قايم بالواجب بعد 3 اشهر... وصل الصيف وجات نوهيدة هي وراجلها وخت راجلها من امريكا ورحبنا بيهم ودرت حفلة كبيرة جمعت فيها الحباب والصحاب (جميع الشخصيات البارزة فالقصة) فرحنا وضحكنا ولعبنا من بعد قتارحت على مرات خالي تجي تسكن معانا الدار كبيرة ووافقات ولكن كان عندها مشكل فالبلاد والدار والكسيبة وقررت نشري منها كولشي ونخلي خالي بنعيسى يتكلف ولكن الكلاب ديال هند غادي اوزعوه الا قرب لدار فغياب ماليها ومشيت انا وهند وجبنا الكلاب واللي كانو مربوطين على طول حيت الا تطلقو غادي يصفيوها لاي واحد غايجي قدامهم حتى وليداتهم اللي عندي انا ماغاديش اعقلو عليهم ولكن خو حليمة ولد العروبية وعرف كيفاش اتصرف معاهم وكايطهلا فيهم بالماكلة حتى نساجمو مع ولادهم وولاو هاد الكبار كايتطلقو غي بالليل المهم مع المدة هند حملات والكرش ديال هونيدة كبرات تبارك الله وقالت لينا الطبيبة ديالها باللي غاتولد ولادة طبيعية كولشي عندها زوين ونورمال ماتحتاجش لعملية قيصرية كيما سبق ليا وقلت ليكم باللي ريم كتبات كولشي لبنتها هونيدة بعد ما استاشرات نوهيدة واللي ماكاينش الحساب بينها وبين ختها وانا هونيدة واحد النهار كتبات عليا كولشي الاملاك ديالها عيييت مانحاول نقنعها باللي راني بخيري وخميري الحمد لله وقالت ليا باللي حياتها غاتعطيها لوليداتها وليا ولهند وباللي انا لي نصلاح نتكلف وباللي بحال هاد الحسابات مابيناتناش راحنا زوج وزوجة جا نهار الولادة ديال مراتي الحبيبة وانا وريم ونوهيدة وهند وختي هنية والواليدة ديالي وختي الصغيرة إلهام ومرات خالي (ام هند) وعايدة عند الباب ديال الغرفة اللي كاتولد فيها الكبيدة ديالي هونيدة وانا كانسمع الغوات ديالها مسكينة والبكا ديالها لحمي كايتكنزز عليا وكانقول الله اسمح لينا من الوالدين وكانبوس الراس ديال ميمتي واحد الشويا كانسمع الصوت ديال واحد التربية كاتبكي هنا عرفت باللي هونيدة ولدات بالفرحة دخلت كانجري لقيتهم جبدو بنية صغيرة زعيعرة عويناتها زورق شابها لجداتها ريم ومشيت كانبوس فالراس ديال مراتي وانا شاد ليها فيديها وهي كاتزيير عليا من المخاض ديال الولادة وانا كانبوس ليها فراسها وكانواصيها وندعي معاها حتى ولدات المولود الثاني اللي كان كايشبه ليا بزاف الله يا ربي على نعمة 2 توام دري وبنت وهونيدة فرحانة بزاف دخلات عائلتي الغرفة وهي تجري علينا الطبيبة ودخلو هونيدة لغرفة العمليات حيت النزيف مابغاش اوقف ماعرف واش نفرح بوليداتي ولا نحزن على مراتي اللي راها فالخطار بعد 30 دقيقة خرجات لعندي الطبيبة وصدماتنا بهاد الخبر المفجع الطبيبة : لا امل لها في النجاة دخلو لعندها تشوفوها وباغا تشوف وليداتها انا بالصدما بقيت مقرنص بلاستي ماقديتش نتحرك من بلاستي جراتني هند دخلوني لعند هونيدة اللي كانت كاتشوف فيا وكاتبكي وتقول بصوت خافت قرب ليا ا راجلي قرب ليا قربت ليها وعطيتها وليداتها عطاتهم البزولة ديالها واخا مافيهم اللي ارضعو وهما عاد كي تولدو ولكن حسيت بيها باغية تحس باللي اول لقمة لوليداتها غاتكون منها وجميع اللي فالغرلة كايبكيو هند من ديك الجهة وانا من هاد الجهة وجات ريم كاتبوس فبنتها ريم كاتبكي : راضية عليك ابني راضية عليك عمرك شقيتيتي ولا عدبتيني وديما كاديري بهضرتي راضية عليك ابنتي راضية عليك اما واحد نوهيدة غي كاتغوت وضرب فراسها وتنتف شعرها حتى جات طاحت على ختها باستها وهي تغيب فوق ختها هونيدة بصوت خافت وكاتبكي : عطيني اراجلي يديك وحتى نتيا اختي هند انا عمري عتابرتك ضريرتي ديما كعتابراك ختي ورب العالمين شاهد عليا وعارف شنو فقلبي والبرودة طالعة ليا مع رجلي ودابا انا كانشوف شي حوايج مايتخييلهمش دماغكم هونيدة كاتبكي : احمد راجلي العزيز ميمتي رضات عليا ولكن انا غادية ندخل لجنة برضاك نتا لي راجلي ورضاك سابق لراضت واليدية رضي عليا عافاك رضي عليا قبل ماتخرج روحي رضي عليا نسمعها منك تكيت عليها وكانبكي بحال شي دري صغير و كانقوليها : راضي عليك دنيا واخرة وسمحي ليا الله اخليك الا شقيتك معايا عمري شفت منك العيب قلبك طييب قلب ذهب الله ارضي عليك وراك ديما فبالي هونيدة : بنتي سميوها هونيدة ووليدي نزار بعد اذنك اراجلي هونيدة كاتبكي : ونتي اختي هند العار عليك وليداتي العار عليك وليداتي فهاد اللحظة طاحت هند غابت بحال نوهيدة هونيدة : سمحو ليا بحقوقكم الله اخليكم ونتا ا راجلي العزيز كنتي ليا خير زوج وطهلا فهند و العار عليك وليداتي 😭 العار عليك وليداتي 😭 العار عليك وليداتي 😭 من بعد ترسمات واحد الابتسامة على وجه هونيدة وتوفات ومشا عند سيدي ربي طاهرة عفيفة حيت المرا اللي كاتموت بعد الولادة كايتغفرو ليها ذنوبها انا طحت غبت اول مرا كانسخف فحياتي ملي فقت لقيت راسي فالسرير اللي حدا هونيدة نضت لعندها وبديت كانبوس ليها فجبتها وكاتبكي بهيسريتيا والناس اللي ضايرين بيا ماكايبالية تا واحد منهم كولشي فلو غي هونيدة اللي كاتبان ليا بكيت وبكيت وحاس براسي باقي باغي نبكي ونبكي ونغوت ونخوي قلبي ونقول اش هاد الزهر غي اللي بغيتها كاتكاب عليا الثروة ديالها وكاتموت اش هادا يا سيدي يا ربي واشمن ذنب درت فحياتي ياك تبت وسلمت امري ليك ؟ انا نصبر ولكن شنو ذنب هاد الوليدات الصغار اللي غايتزادو بلا ماماهوم ؟ وتا ماماهم ماشبعات منهم بكيت وبكيت وكانت الساعة شي 12 ديال النهار دموعي فعينيا حتى كانسمع اذان الظهر انا : ماتغسلوهاش حتى نجي مشيت توضيت وهزيت طوموبيلتي لاقرب جامع والدموع فعينيا دخات صليت تحية المسجد وكانهز راسي من السجود كانخلي الزربية فازكة بالدموع والانين ديالي كايتسمع فالجامع كامل واخا كانعيا مانكتم الألام ديالي ولكن هيهات هيهات دخل الامام صلينا والانين ديالي كايتسمع طول مدة الصلاة حيت الظهر كايتصلى بالسر ملي سلم الامام طحت ساجد وكانبكي وكاندعي مع هونيدة والناس ضايرين بيا وكايحاولو اهدنوني واخا ماعارفين اش واقع ولكن غي من البكا ديالي باينة شي حاجة بيزار جا لعندي الامام ملي شافني فديك الحالة الإمام : مالك اولدي اش هاد الحالة داير فراسك ؟ (حكيت ليه همي) الامام : ان لله وان اليه راجعون البركة فراسك اولدي وعزاوني تا الناس اللي كانو دايرين بيا الامام : عطيوني شويا من وقتكم ، الموت علينا حق و مراتك سيدي رب العالمين بغاها وخطار ليها ديك الموتا المرحومة اللي تمناها اي مرا وكتر من هادشي خلات ليك 2 جوهرات وكتر من هكاك ربي بغاها وهو فعال لما يريد وماعندنا ما نديرو الدنيا مادايماش 3 ديال الحاجات الانسان خاص ابقى مفكرهم الاولى هي الموت جاياه جاياه والثانية هي الدنيا مافيها راحة والثالثة هي لا سلامة من كلام الناس ولدي الله اصبرك نوض رجع عند مراتك ودعها وغسلوها ودفنوها مع العصر الرسول عليه الصلاة والسلام قالينا "إكرام الميت دفنه" وطهلا فوليداتك وديرهم عويناتك وتفكر الوصية ديال مراتك ودعي معاها والا رضيتي عليها راه وجبت لها الجنة وغي هادي غاترييح لك قلبك انا : الله اجازيك بالخير على هاد الكلام خرجت مشيت لكلينيك سلمت عليها ودعتها وقلت ليهم اغسلوها ومشات سلوى مسكينة وجدات لينا الوراق ديال شهادة الوفاة واوراق الدفن والواليد ديالي جاي فطريق جايبو عزيز ومنير المهم بعد ما غسلوها كفنوها مسكينة وعييطنا على سيارة نقل الاموات وديناها صلينا عليها من ورا صلاة العصر وديناها دفناها فالفيرما باش نبقاو مفكرينها ومفكرين الطيبوبة ديالها والاخلاق ديالها بكينا والدموع مابغاو اساليو من بعد ما دفناها جمعت العائلة كاملة ومعاهم تا صحابي عزيز ومراد انا كانبكي ووليداتي بين يدي : سمعوني الله اخليكم ، حزنتو ولكن ماتكونوش حزتنو قدي ممكن ريم و نوهيدة هما اللي غاينافسو الحزن ديالي ولكن ماغايوصلوهش راه سيدي ربي لي عالم بيا وبالحرقة اللي فقلبي ، هونيدة مشا الجسد ديالها ولكن الروح ديالها باقا معانا وباقا فوليداتها وكولكم سمعو الوصية الاخرة ديالها واللي عي نطهلاو فوليداتها اللي هما وليداتي هاد الوليدات مشات ليهم مهوم اللي ولداتهم ولكن عنهم بزاف ديال الامهات تبارك الله كاع النساء اللي هنايا (هند ،ريم ،نوهيدة ،الواليدة ،ختي ،عايدة ،سلوى ،حليمة ،علياء وفاظمة) اللي مشاو عندو غادي يطهلا فيهم انا متييقن من هادشي وبزاف هونيدة عطاتنا مسؤولية كبيرة قبل ماتوفا الله ارحمها ولكن غادي نكونو عند حسن الظن ديالها ان شاء الله وزيادة وهند ماغاديش تقصر وعندي طلب لنسيبتي ريم وبغيتها توافق عليه وماتردوش ليا فوجهي على وجه المرحومة هونيدة اللي جمعاتنا مابغيتهاش ترفض ليا طلبي واللي هو تجي تسكن معانا هنايا ووليداتي اترباو على يديها ونكونو كاملين قراب من هونيدة ريم كاتبكي : نجي اولدي من غدا علاش مانجيش نجي بعد اسبوع... فهاد الاسبوع اللي داز الفيلا ماكانتس كاتخوا من عباد الله كاع اللي خدامين عندي فالمعامل والشركات والاهالي ديالهم كولهم جاو عزاوني ووقفو فجنبي وفهاد الاسبوع نيت انا تاصلت بديك بنت الدوار ديالنا اللي فكيتها من داك الشمكار ولد مول الارض اللي كان باغي اتكرفص عليها واللي شديت رقمها وواعتها نخرجها من ديك القهرة اللي معيشاها فيها خالتها وراجلها واللي كايعاملوها كي الخدامة لا ماكلة مزيانا لا لباس مزيان عييط عليها وجابها ليا عزيز واخا هو ملتزم ولكن ماكاينش لي ايجيبها وولات عايشة معانا فالدار وفالاخير ديال الاسبوع جمعت الحباب والصحاب ودرت السبوع لوليداتي وسميناهم كيما وصاتنا ماماهم "هونيدة ونزار" داز كولشي مزيان الحمد لله دازت الساعات والايام والشهور وكبرات الكرش ديال هند ومن بعد ولدات ليا بنية غزالة سميناها جنات واللي كاتشبه لخوها نزار بزاف من بعد قرر عزيز اترشح للانتخابات فالفيلاج وفنهار اللي غايقدم البرنامج الانتخابي ديالو انا جيت وهضرت مع الناس ديال الفيلاج والدواور اللي دايرين بالفيلاج واللي كانت واحد الساحة كبيرة بزااااااااف عامرة بالخلق ديال سيدي ربي والمنصة مبنية والبيفان منتاشرين باش اوصل الصوت لكولشي انا : السلام عليكم ورحمة الله وبراكاته وصلى الله على نبينا محمد وعلى آله وصحبه اجمعين وسلم تسليما كريما خوتي وخواتاتي عمامي وخوالاتي ولادي وبناتي انا واعوذ بالله من قولة انا كاتعرفوني كامليمن انا ماكانمنش عليكم انا عندي طلب ولا حسن نقول رجاء واللي هو دعمو عزيز وصوتو عليه الا كاتشوفوني راجل مزيان فعينيكم راه هو حسن مني وخادم الرجال سيدهم سولو عليه وليداتكم و باواتكم وخوتكم اللي خدامين عندي فالمعمل ايقولو ليكم عليه الا صوتو عليه ماغايخسكم تا خير وغايخدم ليكم بلادكم احسن مني ورب العالمين شاهد بدا كولشي تايغوت بسميتي واسفق والدراري كايصفرو من بعد طلع عزيز لمنبر عزيز : كنت بغيت نقدم البرنامج الانخابي ديالي ولكم خويا حمد ماخلا ليا مانقول الا كاتشوفوني اهل لثقة صوتو عليا ومايكون غي الخير ان شاء الله من بعد ما دازو الانتخابات نجح عزيز بفارق ساحق ضد المنافسين ديالو وولا رئيس المجلس البلدي من بعد وبدا كايترقى فالمناصب ومنير هو اللي ولا مكلف فالمعمل بلاست عزيز مانسيتش رقية مانسيتش هونيدة فضلهم عليا كبير بزاف كبرو وليداتي قدام عينيا دابا عندهم 3 سنوات تقريبا وجنات قل منهم وكانشوف الحب والوئام بيناتهم فينما مشاو كايمشيو مجموعين واللي بكا فيهم كايبكيو معاه لوخرين ومفششين اللي دازو من حداه كايعطيهم الحنان اما نور بنت حليمة راه دابا عندها الثالث ابتدائي ودخلتها لمدرسة بريفي كايجيبها النقل المدرسي تال الفيلا وديما الاولى تبارك الله وتا اسراء بنت علياء كل ويكاند كاتجي لعندي وكاتعييط ليا بابا اما بما يخص خو حليمة اللي مكلف ليا بالشؤون الداخلية ديال الفيرما راه قايم بالواجب وديما الحمد لله كايجيب ليا الربح بالزايد وكبرات الكسيبة ديالي لا من النعاج لا من البقر وتا الدجاج والبط والحمام الحمد لله الخير فاض و الجنان اللي عندي وسط الفيرما راه فيه تقريبا بزاااف ديال الفواكه بالانواع وكل 15 يوم كانجمع الحباب والصحاب وكاندير وليمة عندي فالفيرمة صدق ورحمة على رقية و هونيدة ومن بعد شريت تا شي خيول حيت كيما سبق لي وقلت ليكم كانعشقهم وكتر من هكا جا خو حليمة خطب مني سعاد البنت اللي جبت من العروبية ديالنا اللي كانت خالتها كاتكرفص عليها وعطيتها ليه على سنة الله ورسوله وقتارحت على حليمة باش تجيب ماماها وخوتها اسكنو مع خوها هنايا فدارو اللي فالفيرما راها كبيرة وبزاف و من 2 طبقات الخير موجود ماحدي كانزيد نعرض على شي شخص اسكن معايا سيدي ربي كايزيدني من فضلو والحمد لله تقييدات ميمتي وبويا وريم ومرات خالي المكي وانا وهند فالقرعة ديال الحج وبفضل الله سبحانه وتعالى تقبلنا من اول محاولة ومشينا درنا المناسك ديالنا وغسلنا ذنوبنا وطلبنا من الله اتقبل منا وعلى جبل عرفات دعيت معا هونيدة من قلبي تا فاضو عويناتي ومانسيتش رقية وخيرها عليا رجعنا لمغرب بعد ما ولينا حجاج ودرنا زردا كبيرة من بعد تفكرت النائبة ديال رقية فجمعية الامهات العازبات ومشي زرتهم ولقيتهم فاحسن حال وقررت نخصص ليهم دعم مادي شهري صدق ورحمة على الرئيسة السابق ديالهم رقية كنت وقتما وصلات شي مناسبة سوا من الاعياد ولا من رمضان المبارك كنت كاندير ولائم للفقراء صدق ورحمة على هونيدة ورقية وفالعيد الكبير كنت كانفرق الاضحيات على الفقراء والمحتاجين على حسب الاستطاعة ماحدي كاندير فافعال الخير وسيدي ربي كايرزقني من حيث لا احتسب هادي كانت قصة احمد عاشق الميمات كيفاش كان بطالي لا خدمة لا ردما كيفاش مشا عند خالو المكي المدينة وكيفاش وقعو ليه دوك المناوشات مع الميمات ... وكيفاش تاب وتزوج ودار دارو وكيفاس كبر وليداتو وكيفاش مسك عليه الله النهاية .