" عاشق لميمات "

38عاشق الميمات - الجزء 38
----------------عاشق الميمات - الجزء 38------------------ خليناها فالجزء السابق ملي كانت الساعة 20:30 وهو يتاصل بيا عزيز انا : الو خويا عزيز : سمح ليا اخويا حمد نسيت ما قلتش ليك ملي تزادو لكليان ديالنا راه عييطنا على 200 عامل اخر باش لاكومونض مانعطلوهاش على الكليان انا : اخويا انا ماحطيتك تما حتى عطيتك كاع الصلاحيات عزيز : لقيت من الضروري نقوليك كان خاصني نشاورك من الاول والله وصانا على المشوارة انا : ماتقولش هكاك احبيبي هانية ، قوليا كاين شي حد من ولاد الدوار هنايا فكازا كاتيق فيه ؟ عزيز : اه كاين ولد خالتي راه مراضع معايا انا : منير لا ؟ عزيز : اه هو انا : غدا قوليه ايجي عندي لحي المحمادي عزيز : علاش ؟ انا : غي قولها ليه محتاجو عزيز : واخا اخويا ، يالاه خليت ليك الراحة من بعد طلعت انا والبنيتات الصغارات وهونيدة وحليمة وطلعنا معانا داكشي اللي غانشويو بعد مادارت حليمة العطرية والقوام لدوك الطروفا ديال اللحم والكفتا... لقينا السطح مفرش وعلياء و فاظمة فيه المهم شويا وهي طلع سلوى ووليداتها كيما سبق ليا وقلت ليكم راه عندها التوام دري وبنت ولكن باقين صغار وطلعات عايدة وعجبها المنظرمن بعد جات المرا اللي ساكنة فالطبقة الخامسة ومعاها راجلها وسلمو علينا جا عندي راجلها لقاني كانعقد المجمر وعرض عليا المساعدة وطلبت منو غي يرتاح انا نتكلف تعطلات ريم وقلت لبنتها تاصل بيها وجات قالت ليا باللي ماماها فالدار هاهية غاتجي هي و سامية واحد الشويا وهي تجي ريم هي وسامية وجلسات حدا صاحبتها سلوى دابا كولشي حاضر الا راجل سلوى (المدير ديال الثانوية) المهم بديت فالشوا وجات هونيدة عندي هونيدة : حبيبي خليني نعاونك انا : الخير اللي غاديري فيا سيري شدي الارض بحالك بحال الناس هونيدة : اقمعني ههههه والله لا مشيت انا : وا يالاه قابلي ليا نتي غي دوك الكوطليطات لايتحرقو فهاد اللحظة تفكرت رقية مسكينة المرا الفايتا ملي شوينا هي اللي كانت فجنبي كاتشوي معايا بليمارا راه كانت مقابلة صوصيص ماحسيت تا نزلات دمعتي هونيدة : مالك احبيبي كاتبكي ؟ انا : ماشفتيش الدخان ؟ راه كانشويو واقيلا هونيدة : الدخان غايدمع ليك عينيك ولكن ماغاديش يدير ليك ملامح الحزن على وجهك انا : قلبي هادوك قلبيهم غايتحرقو وغانشويك بلاستهم هونيدة : واخا ا سيدي المهم كانشويو وكانعطيوهم وكانخليو لينا حنا حقنا انا حليمة هي اللي مقابلة الصينية ديال اتاي ريم : الله اعطيك الصحا عايدة : الله اخلف عليك انا : هاد الصدقة للمرحومة رقية مسكينة دعيو معاها من قلبكم راه حبيبتنا ووحدة منا سلوى بدات كاتبكي حيت هي الصديقة المفضلة ديال المرحومة رقية انا براسي غي حابس الدمعة حيت رقية والله العظيم الا انسانة الله اعمرها دار وكاع هاد الخير اللي انا فيه راه بفضل الله وبسبابها الله ارحمها و اوسع عليها يا ربي وادخلها فسيح جناته بدات عايدة وريم كايهدنو فسلوى المهم بعد ماتهدنات بدنا الاجواء شويا انا : عايدة غدا راجعة لخدمتها سلوى : سخيتي ؟ عايدة : غادي نجيب التقاعد ونحي نتيتي حداك ههههه سلوى : مرحبا الله اودي ريم : الله اكمل سربيسك على خير ، فين البنية ؟ عايدة : راه تزوجات وعندها بنية خدامة فالرباط ريم : فراسي فالرباط اوا الله اكمل عليها بالخير ، ضابطة شرطى ياك ؟ عايدة : اه ريم : تبارك الله من بعد جلسنا مجمعين وكل واحد مشا لدارو وانا دخلت لدوش دوشت وبدلت عليا الحوايج حيت عامرين بريحت الشوا ا الهوااا هههه المهم فالصباح بكري صونات ليا واحد النمرة ماعارفهاش انا : الو السلام عليكم هو : وعليكم السلام خويا حمد انا : شكون معايا اخويا ؟ هو : انا منير خو عزيز انا : اهلا خويا منير نهترك مبروك هو : الله ابارك فيك اخويا انا راني فالحي المحمادي حدا الحمام الكبير انا : سول على البيسري ديال موحماد غايجوريوه ليك وغاتلقاني كانتسناك هو : واخا اخويا نضت غسلت وجهي وسناني لقيت حليمة وجدا الفطور انا : صباح النور حليمة : صباح الخير خويا انا : شحال من مرا قلت ليك ماتفيقيش بكري ؟ حليمة : هانتا فقتي بمري كون مافقتش فين غاتفطر ؟ انا : نوجدو لراسي والا زربان نفطر برا حليمة : واخا اخويا لي بغيتي انا : راه معايا ضيف ديري بحسابو لفطور هاحنا طالعين حليمة : الخير موجود اخويا مشيت نزلت لقيتو واقف حدتطا موحماد اللي حدانا شافني جا لعندي سلم عليا طلعنا لداري منير دري ضرييف الله اعمرها دار دريويش كايتمشى غي جنب الحيط وسكوتي مافيهش قوت الهضرا عادي راه راضع هو وعزيز من نفس البزولة ديال مي فطومة المهم طلعنا دخلنا جلسنا على الطبلة ديال الفطور انا : تفضل اخويا منير : الله اقوي الخير اخويا حمد انا : فاش خدام اخويا ؟ منير : فواحد السطاسيون فالخرجة ديال كازا انا : اي جيتي من تماك تال هنا منير : عادي اخويا انا : الا مامسلكاكش ديك الخدمة سير عند عزيز اخدمك فالمعمل منير : ان شاء الله اخويا انا : شتك درتي اللحية منير : لتازمت اخويا الحمد لله انا : الحمد لله الله اهدينا تا حنا منير : لا يغير الله ما في قوم حتى يغيروا ما في انفسهم او كما قال عليه الصلاة والسلام انا : صلى الله عليه و سلم منير : خويا الله عز وجل الا جيتي لعندو ب شبر كايجي عندك ب خطوة و الا جيتي عندو ب باع كايجي عندك ب دراع و الا جيتي عندو كاتمشى كايجي عندك كايهرول الله كايفرح بالثوبة ديال العباد ديالو انا : كلامك كايرييح اخويا غي انا حاس بذنوبي مغرقييني منير : خويا حمد ركز معايا فهادشي اللي غانقوليك الباري عزل وجل قال فحديثه القدسي "يا ابن ادم لو جئتني وذنوبك وصلت عنان السماء وكنت لا تشرك بي شيئا جئتك بمثلها مغفرة" غي ماتشركش بالله ونزيدك اية قرآنية" هي المفضلة عندي وكاينة فسورة الزمر بعد اعوذ بالله من الشيطان الرجيم " قل يا عبادي الذين اسرفوا على انفسهم لا تقنطو من رحمة الله ان الله يغفر الذنوب جميعا انه هو الغفور الرحيم" غي هاد الاية كافية غي هادي اخويا مانزيد علؤك تا حاجة خرا هادا كلام الله ماكلاميش انا الله كايغفر كولشي كولشي مولشي كولشي ....... كولشي تا المشرك كايغفر ليه بشرط إثوب لله الثوبة النصوح انا : الله ارحم من رباك ومن قراك اخويا منير شكرا بزاف منير : اخويا نبغيليك الخير راك خويا فالاسلام ونتا دري دريويش نسيتي شحال لعبنا فصغرنا ههههه انا : وشكون ينسى دوك الايام منير : كاع ولاد الدوار كلاو منك العصا الا انا و عزيز ههههههه انا : اش كاتفكر تانتا هههه المهم ككلنا فطورنا وهزيت شي وشي وراق ومابدلتش عليا بقيت كنت لابس سروال ديال كيتما فالابض ديال الثوب ولابس تيشورتا بيضة وبانطوفا فالرمادي مابغيتش ندخل نلبس عليا حوايج الخروج حيت منير مسكينة بحال الا مبهدل ومابغيتش نبان قدامو بحال الا راني شي حاجة نزلنا خرجت الطوموبيل وباش عجبني منير مافيهش الفضول بحالة بحال عزيز ماضروش الراس اسولني منين جاني هاد الخير كولو المهم شدينا الكريق لديك لاميزون اللي شرات ليا منها رقية الإس أش لقيناهوم عاد حلو مشينا باش ندخلو والحارس اللي فالباب منع منير ادخل حيت كيما قلت ليكم كانو حوايجو بحال الا مبهدلين انا واخا مالابسش مزيان راه حوايجي نقييين بزاف انا : حييد من الطريق بمسبتك نتا غادي نشري هاد المحل كامل ونجري عليك سمعني مول المحل وجا مول المحل : اهلا اهلا مرحبا انا : هضر معا هادا اتعامل مزيان مع الكليان ولا غايخرج عليك مول المحل : حسابو من بعد تفضلو دخلنا جلسنا فالبيرو ديالو وجبدت ليه الوريقات ديال الاس اش ديالي مول المحل : اه هاد لامارك حنا لي كانجيبوها فكازا كاملة حيت هي من الحجم الكبير ، وهاد الوريقات ديال المحل ديالنا يعني نتا زبون ديالنا ، اش حب الخاطر ؟ انا : بغيت ختها مول المحل : اه موجودة تفضل معايا دانا لواحد الجناح فيه هاد الماركة بكاع الالوان وخطاريت اللون الكحل حيت مع الدوار والغبرة شي لون اخر غايتوسخ المهم خرجها لينا وتكاتبت انا وياه ودرتها فالاسم ديال عزيز حيت عندي نسخة من البطاقة الوطنية ديالو وخلستهالو بالشيك حيت فالطوموبيل عندي 60 مليون ديال ريم وشي حاجة قليلة المهم ملي خرجناها بعد ماعطانا الكاسك كادو وقطعنا ليها لاصورانص مدة عام عطيتها ل منير مشا دار ليخا البلان من السطاسيون اللي حدا لاميزون وعطيتو هو شي بركة واخا مابغاش اشدها ولكن بززت عليه منير : الله اقوي الخير اخويا حمد و الامانة ديال عزيز غاتوصليه من بعد ركب هو مشا ومشيت انا لدار لقيت ريم خارجة بطوموبيلها هزيت دوك الفلوس اللي كانو فساك صغير ودقيت عليها حلات ليا المرايا وانا نحط ليها الصاك فوق حجرها انا : صباح الانوار ريم : صباح الخيرات هههههه اش هاد الصاك ؟ انا : رزقك انسيبتي العزيزة قلباتو ملي لقات الفلوس ريم : والله تا حشومة عليك حرجتيني كون دوزتيهم ليا فحسابي نيشان كنتيغاتقلل عليا الاحراج انا : ماكاينش فرق بين فلوسي وفلوسك واقيلة ريم : اه ولكن... انا : ماكاين ما ولكن يالاه سيري فين كنتي غادا وردي البال لرلسك ريم : احلى احمد فالعالم انا : احلى نسيبة فالكون ريم : هههههه بيزو يالاه خليني نمشي بعد ما مشات ريم دخلت انا طوموبيل وطلعت لداري شويا هي تصوني ليا ختي هنية مخلوعة يتبع...