تناقض
بين روح العدالة التي تستحوذ عليَّ بالكامل،
وبين عِشـقي لمجرمة الذي يدفعني للتمرُّد على القانون، عليَّ أن أختــار
ماذا أفعل ؟!
.
.
.
أنا رجلُ قانون لا يمكن أن أخون وطني.
.
.
.
أنا رجلٌ عاشق لا أستطيع الاستغناء عن حبيبتي.
وطني أم هي ؟
__________
وقفت ملاک وسط ذهول أمنية ونصر الدين وفهد اللي كان شاهد .
وقفت أمام القاضي وقالت..
- عذرا سيدي القاضي على مقاطعة الجلسة بهاته الطريقة ولكني شاهدة رئيسية في قضية كل من مراد بن عمر ، سمير، محمد ووائل عبد المجيد.
تقدم فهد لعندها وحكمها من ذراعها وقالها يهمس..
- ملاک واش تعملي ؟ وعلاش راكي داخلة لهنا ياخي تفاهمنا ؟
دزاتو بالشوي باش يبعدها وهي مزال تشوف فالقاضي وكملت تهدر ..
- عندي أدلة قوية ومباشرة، صور وتسجيلات صوتية وأوراق رسمية وفيديوهات تدل على أن الجماعة هم من مؤسسي منظمة الصيادين التابعة للمخابرات الاسرائيلية.
شيرّ القاضي بعينيه على الجندي اللي كان واقف، راح الجندي قبالتها وهي عطاتو كابة صغيرة.
تمتمت فقلبها وهي تخزر فـ وائل..
- كل الأشياء السيئة اللي عشتها واللي عملتها، كل الظلم اللي تحملتو ، كل تأنيب الضمير اللي كنت نحسّ بيه والكذب اللي كذبتو والادعاءات اللي ادَّعيتها، كانت باش نشوف هاذ النظرة فعينيک، الانكسار، قلَّة الحيلة والذلّ. مانيش نادمة على أي شي عملتو باش نوصل لهاذ اللحظة، هاذ اللحظة اللي حلمت بيها ڨاع حياتي.
هبطت عينيها وشافت قدامها.. بقى القاضي يقلَّب فواش كاين فهاذيک الكابة دقاايق طويلة، كانت أدلة أقوى مليون مرة من أدلة أمنية ونصر الدين وفهد وأمير وأيمن..
تلفتت أمنية فنصر الدين وقاتلو تهمس..
- واش بيها ملاک ؟ من وين جابت هاذو كامل ؟
قلب نضر الدين شفافو وهو ساكت ويتبع فملامح القاضي، اللي كان متوتر وهو يشوف فملاک مرات ومرات يشوف فالفيديو قدامو ..
فاتت نصر ساعة، مقدرش القاضي يتفحص الأدلة كامل.. تنحنح وضرب بالمطرقة تاعو وقال..
- بالنظر إلى الأدلَّة التي كانت من طرف الآنسة عبد المجيد فإن المحكمة العسكرية تحكم بـ:
السجن المؤبد لكل من محمد عبد المجيد ووائل عبد المجيد.
السجن المؤبد المنفرد لـ سمير عبد المجيد ومراد بن عمر.
وبموجب الرخصة التي منحتني إياها الدولة الجزائرية فهذا الحكم النهائي وهناک احتمالات في زيادة العقاب وليس في نُقصانه.
نهاية الجلسة.
ضرب القاضي بالمطرقة تاعو.
بدات الهدرة فالمحكمة والناس حسابالها بلي خلاصت الجلسة.
عاود ضرب القاضي بالمطرقة مرة أخرى وقال ..
- صمت.
سكتو كامل وملاک بقات تشوف فيه كأنها كانت تقارع فيه يهدر، وهو قالها..
- آنسة عبد المجيد، قضية التعنيف والأعمال الغير شرعية التي قام بها المجرم وائل عبد المجيد الذي يكون زوجک السابق وكنتِ لا زلتِ قاصرة .. هي قضية يمكن أن تعالجها محكمة الأسرة.
هو قال وأمنية طرطقت عينيها بدهشة وحطت يدها على فمها ونضر الدين تلفت فيها مخلوع يحوس على تفسير وملاک هبطت عينيها باحباط، وهو كمل يهدر..
- ولكن.. بما أنه مجرم دولي فأظن أنه يمكنني الطعن فيما يخص قضيتک.
تبسمت كي قالها هكا وتغرغرو فعينيها دموع وهي تشوف فيه، ضرب بالمطرقة وناض ولحقوه الحاشية تاعو..
تبسمت ملاک وتلفتت فيهم، كان فهد يشوف فيها وفعينيه دموع ..
- كامل مكانش علابالهم بلي وائل كان زوجها، وبلي كان يعنفها و.....
فتح ذراعتيه ليها وهي راحت لعندو عنقاتو.. كان أيمن يشوف فيهم اومبعد تفكر أمير..
تمتم وهو يعيطلو ..
- مي واش بيه أمير ؟ واش صرا ؟؟
عيط وعيط ومردش عليه وزاد عيط فالثالثة رد عليه مي ماقال والو ..
وأيمن قال يحكي بحماس ..
- وين راک أصاحبي الشعب هنا حكموه مؤبد ونتا وين راك، ڨاع حياتک ونتا تقارع لهاذ اللحظة التاريخية وملاخر متجيش..
بقى أمير ساكت وحاط التلفون على وذنو وهو على تفس الحالة كيف قبل.. كأنه شبح..
بقى أيمن ساكت شوي اومبعد قاله..
- صحا ملاک علاه قتلي متخليهاش تدخل، جابت أدلة لدرجة أنه القاضي بقى ساكت نصر ساعة يقلب فيهم اومبعد تم تم أصدر الحكم النهائي، ما دار ني جلسة سماع طرفين لا والو ..
هو قال اسم ملاک وأمير روبوت وضغطو على زر التفعيل تاعو .. بدا يتنفس بالقاوي يستوعب فواش يقول أيمن وقالو ..
- يـ.. يعني ملاک كانت مجرد شاهدة؟ مسلمتش نفسها ياک ؟؟
- كيفاش هاذي تسلَّم نفسها ؟
قال أيمن وأمير كوپا عليه وقلع باللوطو بلخف..
تلفت أيمن يشوف فـ ملاک، ضيق عينيه كأنه يخمم اومبعد تمتم بعد ثواني طوال..
- أمير قالي حبسها وكان متوتر وخايف، ملاک جابت أدلة سرية ودقيقة وخاصة جدا خلات القاضي يصدر الحكم النهائي فنص ثانية بدون نقاش، سمير عندو انفصام وقالت أمنية اللي سمير هي نفسو كامورا، ملاک لحقت بأمير لايطاليا وقابلت كامورا المزيف، ملاک عرفت بلي أمير من المخابرات وساعداتو .. يعني ملاک هي العميلة اللي مقدر حتى واحد يفک شيفرتها، وجهها سرِّي واسمها سرِّي ، العميلة اللي هي اليد اليمنى لـ كامورا وهي اللي كانت تنفذّ أوامروا بطريقة نظيفة خالية من الشكوک والأدلّة.
بما أن هاري پوتر عندو انفصام ، فشخصية سمير كانت هي كامورا ويتعامل مع ملاک بسرية وبطريقة غير مباشرة وهكا متقدرش تكشفو وتكمل تخدم معاه.
ملاک هي العميل إكس اللي أمير حاب يقبض عليه.
ولكن هاذ العميل كان دائما يد العون اللي كانت تساعدنا فالخفاء .
كان الحوار الداخلي بين أيمن ونفسو وهو مرتكز عالحيط ويشوف فلرض، فاق كي فرقعت أمنية صباعها قدام وجهو ..وهو شاف فيها وتبسم وهي قاتلو ..
- أمير وين راه ؟
- معلاباليش، قالي راو جاي كان عندو أمر عاجل.
هزت راسها ايه اومبعد تبسمت وحطت يدها على كتفو وقاتلو ..
- تهانينا أيمن!
- شكرا أستاذة.
تبسم وقالها وهي عنقاتو..
.
.
.
پارت صغير باش تتوضحلكم الحالة
ولكن نظن راح يزيد يخلطها أكثر 😹
سمحلي وسمحلي
أنت تقرأ
بَكـمَـآء || Dumb
Любовные романы• ~ هناک خير في كل شـر ~ • تربى وسط عائلته كالأمير ، تلقى معاملة أمير ، نضج وأصبح رجلا يحمل ملامح مَلِک أسيبقى الأمير على عرشه ! • ~ المجروح من عائلته لا يُشفى أبدا ~ • فتاة متعجرفة ، انطوائية وابنة رجل غني .. أميرة لا يعجبها العجب أعند من الحجر أ...
