بَكـمَـآء || Dumb

09

تعلمت من والدي كيفية التحدث مع كبار الشخصيات في سن السادسة
تعلمت من أمي الفروسية في سن السابعة
تعلمت من والدي الرماية في سنّ الثامنة
تعلمت من أمي اللغة الانجليزية في سنّ التاسعة
تعلمت من والدي الدفاع عن نفسي في سن العاشرة
تعملت من أمي المشي دون اصدار صوت في سن الحادية عشر ..
منذ أن تعلمت الكتابة ، وفي نهاية كل عام يعطيني والداي ورقة ويطلبان مني كتابة الأشياء الجيدة التي حدثت معي طوال العام ..
بعد سنوات ، أدركت أني وفي كل سنة كنت أركز أكثر على الأشياء الايجابية وبالكاد أذكر الأشياء السلبية التي حدثت معي ..
طريقة تربيتهم لي صنعت مني الأمير هذا ، الذي يقف أمامک ..
عميل ناجح ، حتى أمي في مثل سنِّي لم تكن تملک هذا السجّل الباهر ..
لكن قولي لي .. كيف سأنجح في مهمتي هاته المرة ! كيف سأستطيع تخطي هاتين العينين لأقفز نحو نجاحي ! كيف سأدمر هذا البريق !
كـــيف أشرح هذا الشـــعور الذي يمنعني !
! كــــــــــــــــــــيف !

💛

__________________________

- 08:30 - الليل :

ملاک قاعدة فوق الكرسي مقابلة الدفاية بعدما لبست قشها بعدما نشف ..
( تذكير : كانت لابسة قميص تاع صوف وردي فاتح ، وسروال جين نواغ )
شعرها مفرود ، رجع كيرلي شوي بعدما تبلل ..
تلفتت بحداها تشوف فالكرطاب تاعها اومبعد دنات ليه جبدت منو كايي تاع الرسم كانت ورقاتو مجعدة پسک تبلل ونشف ..
جبدت قلم رصاص وحطت الكايي فوق ركابيها وهي تسرح فالورقة بيدها وتشوف قدامها كأنها تخمم غايسة ...
فاتو دقايق هبطت عينيها تشوف فالورقة وبدات ترسم ..
دخل أمير من برا ، يتحرک بالساكت خطواتو معندهاش صوت ..
كان ينفخ فيديه اللي رجعو حمرين من البرد ، حبس كي شافها ترسم .. وقف فبلاصتو وارتكز على باب الصالون وهو يشوف فيها ..
راح يمشي قبالتها وقف وراها وهو يطل عليها واش كانت ترسم ..
- يدين حاكمين فبعض و.. وايت !!!
كان يهدر بينو بين روحو ، اومبعد سكت وترسمت فوجهو نظرة استغراب وشاف فيديه وعاود شاف فالرسمة ، تفكر كي كان يمسحلها فيديها ..
كانت كاتبة فوق الرسم :
" I think i .. ! "
( أعتقد أنني .. ! )
رجع خطوة وتنحنح ورمى روحو عالفوتاي ، تسرسبت هي وغلقت الكايي بلخف ورجعت شعرها لور وتلفتت فيه وقالت ..
- جيت !
- ايه ..
- وينتا نروحو !
- دوكا اذا راكي واجدة !
قال وشاف فعينيها وهي حركت راسها ايه وهي تشوف فيه ، ثواني اومبعد تلفتت تلم حوايجها ولبست الفاست ..
جاو خارجين بعدما لبسو قشهم ..
ودعو العمة والعم وآدم بعدما خذا عليه أمير مفاتح الطوموبيل ..
- راح نرسلها غدوة مع هيثم ..
قال أمير لآدم اللي كان واقف عند الباب ، ركب أمير وقلع ..
وهوما فالطريق قال أمير ..
- U think what ?
تلفتت ملاک لأمير موش فاهمة قصدو وهمهمت ..
- هم ؟
بقى أمير يشوف قدامو موش عارف ينظم حروفو وقالها ..
- كنتِ كاتبة I think i ..
طلعت حاجب وقاتلو ..
- تتجسس عليا !
هز راسو لا لا بالزربة وقالها ..
- لا لا شفتها بالصدفة برک ..
بقات تخزر فيه وهو يشوف قدامو ، اومبعد شافت للقدام ..
بقاو ساكتين وهي رقدت حتى قرب لدارهم ..
- ملاک ! ملاک وصلنا
قال وهي فتحت عيونها شوي اومبعد تعدلت فبلاصتها وفركت عيونها ..
قرب للبوابة ، فتح الحارس الباب ودخل للداخل يناديلهم ..
هبطت ملاک من الطوموبيل وهبط أمير .. راحت تمشي وهو بحداها .. خرج باباها ومرتو وعمها ووائل ..
وقفت ملاک فبلاصتها , تلفت أمير يشوف فيها ووقف مام هو .. كانت نظرتها عادية موش خايفة أو متوترة ..
خزر فيها باباها بلاما يقول حرف ، كان بيناتهم شي 3 أمتار ..
- وين كنت !
قال عمها مغشش ، اومبعد قال وائل ..
- ملاک وعلاش مخبرتينيش ناخذك أنا
- علاش مسمعتيش كلامي !
قال باباها يعيط
شافت فعمها اومبعد فوائل اومبعد فباباها وهي تتبسم اومبعد صفقت وقالت ..
- پرافو !
تنهدت وكملت ..
- مي هاد التمثيلية متنفعش قدام أمير پسک راو شاف وعرف .. مكانلاه تلعبوها تقلقتو دوكا صافي ..
بقى أمير يشوف برك من المشهد اللي قدامو ، لسان ملاک السليط قدام عايلتها متوقعوش أبدا !
بداو أفراد العائلة الباقيين يخرجو مام هوما ويوقفو ..
راحت تمشي اومبعد تلفتت بعد ثلاث خطوات ، تبسمت مع أمير وقالت ..
- شكرا بزاف مسيو أمير .. خذيتني عند يما ، أنقذت حياتي من الرصاص ومن الناس اللي كانو يطاردو فيا ، خذيتني لبلاصة آمنة ودافية وأخيرا وصلتني للبيت .. معروف كبير نردهولک شي يوم ..
تبسم تبسيمة تغمضو عيونو للنص ، وهز راسو ايه .. راحت تمشي باش تدخل للدار .. حكمها وائل من ذراعها جا راح ينطق ضرباتو بكف ميل راسو عجنب ..
جبدت ذراعها بالتغشاش وقالت ..
- حتى يومها مضربتكش كف وائل .
غمض سمير عينيه كأنو يتوجع ، دخلت ملاک تمشي بالزربة للدار ولحقتها مرام وأسيل ..
بقى أمير فبلاصتو واقف موش عارف يروح ، يهدر ، يسكت ..
دقايق من الصمت فاتت ، ووائل يخزر فأمير بالتغشاش ، وأمير يمضغ فالعلک ويتبسم ويشوف فيه ..