بَكـمَـآء || Dumb

04

كان الأمر يبدو للجميع أن هناک يد تمتد نحوي وتلمسني ، ولكنه بالنسبة لي كان أمر خانق كأنني رُمِيت في الجحيم .. !

🔥

____________________________

- ملاک ! نقدر ندخل راكي فايقة ! ملاک .. !
قالت أسيل بعدما دقدقت مرتين على باب غرفة ملاك ، مي ماجاها حتى رد ..
فتحت الباب بالشوي وطلت ، ماصابت حتى واحد ، والغرفة مرتبة ..
هبطت تجري ، وصلت للصالون وين كانو قاعدين كامل يفطرو ..
- پاپا ملاک موش فغرفتها ..
قالت أسيل مذعورة ، وباباها طلع راسو شاف فيها ثواني طوال اومبعد قالها وصوتو هادي ..
- خرجت الصباح بكري
هبط راسو يكمل يقرا فالجريدة اللي فيدو ..
- مي ..
قالت أسيل اومبعد سكتت كي طلع عينيه وخزر فيها ..
خلصو فطور وناضو كامل ، راحت أسيل تقرا ومرام طلعت للشومبر تاعها .. بقى سمير وخوه محمد ..
تلفت محمد لسمير وقالو ..
- عيطت الصباح لمحامي أمير صلاح وقتلو بلي قبلنا الشراكة ..
- ايه مليح ..
.
.

كانت قاعدة فـ Salon de tea ، مقابل المعهد اللي تقرا فيه .. قدامها فنجان قهوة ، وكايي أوراقو بيض معبي رسومات بقلم الرصاص ..
قعد قدامها راجل كبير فالسن شعرو أبيض كامل ، داير نواضر شكلهم مستطيل ، قصير .. لابس سروال دان ماغون ، وقمجة فيها كاروات عسليين وپاج .. ورافد كارطابل نواغ مربع ، وفاست تاع خريف من فوق ..
شكلو يبعث الدفئ ..
شير بيدو قدامها ، فاقت من شرودها ، نحات الكيتمان وقالت تتبسم ..
- مسيو عبد الرحيم !
جات راح توقف ، حكمها من كتافها قعدها وهو يقول ..
- اقعدي اقعدي خلاص حركات تلاميذ الابتدائي ، كلما تشوفيني توقفي ..
تبسمت وقعدت ، شربت من قهوتها وهي ساكتة مهبطة عينيها ، كان هو مهبط نواظرو شوي ويشوف فيها ، ضيق عينيه الزرق وتنحنح وقال ..
- نوضي جيبيلي فنجان قهوة ..
- ايه ..
غير هو هدر ، قالت ناضت بالزربة بلاما طلع عينيها فيه ، راحت تمشي بلخف ..
ضحک وهو يشوف فيها وقال ..
- كي يكون عندها بروبلام تعيطلي وفنفس الوقت تحاول تهرب مني ..
رفد الكايي اللي كانت ترسم فيه ، وبقى يشوف فالرسمة ( الفوطو اللي راهي لفوق )
جات هي حطت فالفنجان قدامو وقعدت فبلاصتها ..
- رجعت فوبيا اللمس !
قال وهي هزت راسها ايه ..
- عيطلي باباک البارح قال بلي مقدرتيش تحكي
قال وهي هزت راسها ايه بعد ..
- عادةً كي تجيک الفوبيا تحكي ! واش اللي صرا هاد المرة !
- مقدرتش ..
قالت وهي تشوف فعينيه .. بقى يشوف فيها وهي خذات عليه الكراسة وكتبت ..
- ما فائدة الكلام ان كنت لا أستطيع قول الحقيقة ..
قرا واش مكتوب ، حط يدو تحت ذقنو وهو يشوف فيها قال ..
- ملاک ، مرت 6 سنين بلاما تنطقي حرف ، كنت أنا الشخص الوحيد اللي سمع صوتك كامل هاد السنوات في حين الجميع راو حاسبک بكماء ..
هبطت عينيها ..
- كي نشوف الناس ننسى كيفاش ننطق حتى ، حتى الهلوسات ومنهدرش فيهم .. حتى لوكان نتوجع ميصدرش مني صوت ..
كان يسمعلها وهو يشرب فالقهوة ، ميل راسو يشوف من التاقة الكبيرة كلها زجاج اللي كانو قاعدين بحداها .. سكت دقايق اومبعد قال ..
- ملاک ، صار عندك 22 سنة ، يعني راح تبقاي حياتك كامل متتحمليش اللمس من طرف شخص آخر !
طلعت عينيها ، وهي تشوف فالحيط اللي وراه قالت ..
- الفراشة فاليونانية القديمة تعني " الروح " وذلک يعني " الشفاء " ..
تلفت وين كانت تشوف وتبسم ..
شاف فيها وهي شافت فيه وكملت ..
- بلاک يجي يوم وين نتلاقى بالفراشة الخاصة بشفائي ..
تبسم وهز راسو ايه .. سكت وقت اومبعد قالها ..
- الـ 3 سنوات الأولى تاع العلاج ، قدرتي تنطقي ، كي نطقتي هدرتي معايا غير أنا .. دوكا معلاباليش آسكو نجحت ولا فشلت كـ طبيب نفسي ..
تبسمت وردت ..
- على مدار الست سنوات كنت الشخص الوحيد اللي سمع صوتي ، علمني الرسم ، علمني ننطق ، حسن مخارج الحروف ، سمع لحكاياتي ، حفظ سري ..
أنت بالنسبة ليا جَدّي ، موش برک طبيب نفسي ..
ضحک وهو يشوف فيها وقالها يشير بالستيلو على وجهها ..
- صوتك بشع ، الرسم كان موهبتك أنا برك عاونتك باش تستغلي الموهبة ، النطق .. آه ! كان أصعب شيء حتى ولادي من كانو صغار متعبونيش كيفك ، أما السرّ سر المهنة ..
ضحکت وضيقت عينيها وقالت ..
- طبيب نفسي ولا مهدم نفسي مفهمتش ..
شرب القهوة خلصها وهو ساكت ، اومبعد تعدل فقعدتو وقالها ..
- ملاک ..
همهمت وطلعت عينيها تشوف فيه ..
- حرري الروح تاعک ، تحبي تضحكي ضحكي ، تحبي تبكي ابكي ، تعيي ارتاحي ، تحبي تصرخي صرخي .. الأشياء بسيطة بهذا القدر وبس ..
تبسمت وهي تهز فراسها ايه على كلامو ، اومبعد قاتلو ..
- راح نحاول ..
- وراح تنجحي ..
تبسمت وهي تشوف فيه ..
.
.
.