بَكـمَـآء || Dumb

35

~ لن أتوسل لک من أجل روحي ، أنا الأمير ابن عبده لن أركع لغير الله ~

🔥

_________________________

كان كامورا واقف وسط رجالو اللي نصهم تفرق يمشط فالمكان ..
خرجت ملاك من الطوموبيل وراحت قبالتو ، بقات واقفة بعيدة عليه .
تلفت فيها بعد ثواني بقى يشوف فيها اومبعد تلفت قدامو ، بقات ملاک تشوف فيه بريبة اومبعد تمتمت فقلبها ..
- مستحيل يكون هو كامورا ، كيفاش طفل الأمس يقدر يسيَّر منظمة كاملة ! مستحيل . أكيد كاين شيء وأشياء مخبية تحت لباس الأناقة هذا .
تنهدت وهي مزالها تشوف فيه وتمتمت ..
- راح نشوفو واش راح يطلعلنا فلاخر . مع العلم أنو أي واحد من الأشخاص اللي بيناتنا يقدر يكون هو كامورا .

بقات واقفة هكاک ، بدات تتلفتت من ومن وهي عيونها على كل الأشخاص اللي تم ، شكّـت فيهم كاملين ، الشوفار اللي كان يسوق بيهم ، شخص مُسِنّ ، بقات تشوف فيه ، نظرات ريبة وشکّ .
هبطت عينيها عليه كي تلفت فيها ..
دقايق ماشي طوال ورجع كامورا للسيارة وقال يمشي يهدر ..
- راح نروح عندي ظرف مهم .
استغربت ملاک وهي تتلفت من ومن وقاتلو باستهزاء ..
- يعني راح تواجه منظمة ياكوزا بعشرين راجل برک !
قعد فبلاصتو وغلق الباب وفتح التاقة ، طلع عينيه فيها .. تبسم وقالها ..
- عشرين ألف قصدک!
خلص جملتو حتى سمعت صوت شاحنات جاية ، حاوطوهم شي عشر شاحنات مغلقة مضادة للرصاص ، بقات تتلفت من ومن وبداو يهبطو منها رجال مسلحين وملثمين .
تنهدت من هول المنظر اومبعد طلت عليه وقاتلو ..
- نقدر نروح مالا!
- راح تجي معايا آنسة ملاک .
هو قال وطلع التاقة وهي زيرت على سنيها وبدات تسبّ بينها بين روحها .
طلعت قعدت بحداه ، وتمتمت بصوت مسموع ..
- يا الله ، الظاهر راح يكون فيها رجال برک!
طلع الشوفار العجوز عينيه فالمراية يشوف فيها صابها تشوف فيه .. هبطهم بلخف وهي تبسمت وتمتمت فقلبها ..
- والله طحت فيدي يا وحد الختيار .

شي ربع ساعة .
وصل أميـر للموقع اللي كانو فيه كامورا وملاک قبل شوي ، حبس الطوموبيل فبلاصة دارڨة بيان سور . بقى يشوف فالجيش اللي كان ممشط المنطقة .
ضيق عينيه وهو يشوف فيهم ، كان راكز عالباب متاع الطوموبيل اومبعد تبسم وتمتم ..
- حرب عصابات ها!
قلع بالطوموبيل راح ، ورجال كامورا بداو يتخبو ياخذو فأماكنهم پسك فبالهم راح يجو عصابة الياكوزا وهوما راح يهجمو عليهم .

راح يسوق ويتبع فجهاز الاشارة وين راه محدد موقع ملاک ،  كي بعد على الانشاءات ، دخل يدو فجيبو هز قابسة صغيرة مربعة ، فتحها كان فيها زر أحمر ..
تبسم وضغط عليه .
بقى يشوف فالمراية لور وشاف الدخان طالع .
أمير فَجَّر المكان اللي كانو فيه رجال كامورا ..
نسبة النجاة ! %2 .
وصلت موكب كامورا للميناء ، هبطو وملاك بقات تتلفت من ومن ، كانو زوج طوموبيلات يتبعو فيهم ، رجالو طبعا .
تمتمت ملاك فقلبها ..
- خواف ، ما يمشيش بلا كلابو .
ارتكزت على الطوموبيل وهو راح تقدم يمشي لوحد القارب كان مرسي عالميناء .
تلفت فيها كي بغا يطلع وقالها ..
- متطلعيش !
تبسمت معاه وقاتلو ..
- شمس إيطاليا دافئة ، راح نبقى تحتها .
تبسم معاها وطلع لليخت ودخل الداخل ، راحت البسمة من وجهها وقالت تمتم ..
- خصک غي تعلڨني فسروالک .
رجال وحدين دخلو معاه ووحدين بقاو واقفين عساسين . تلفتت للطوموبيل كان الشيباني راقد الداخل . بقات تشوف فيه وتمتمت ..
- زيد كمل عليا تان نتا .
هزت تلفونها من جيبها وعيطت لأمير ، رد عليها وبقى ساكت حتى قاتلو هي ..
- أمير أنا ملاک .
طبعا أمير موش غبي باش يهدر هو الأول ، كان يمكن يكون شي واحد عيط بتلفونها ، يعني يحط احتمالاتو ..
كي قالت رد بالزربة يحكي ..
- راكي غاية ملاک ؟ ما صرا والو ؟
- رانا فالميناء ، كامورا دخل لليخت راح ينتظر الطرد عالأغلب .
- تحملي شوي راني قريب .
قال أمير ودار مع الطريق اللي توصل للميناء ، هزت راسها ايه ، مي كانت ملامحها حزينة وقلبها خايف ، قالت بعد ثواني ..
- أمير ..
قالت وسكتت ، همهم أمير وهي تنهدت وقالت ..
- كي توصل خبرني .
حبس الطوموبيل وقالها ..
- راني نشوف فيک ديجا.
هو قال وهي وقفت تعدلت وهي تتلفت من ومن ، هبط الزاجة تاع التاقة وهي عيونها طاحو عليه . بقات تشوف فيه وتبسمت .. تنهدت براحة وطمئن قلبها كأنو كامل السكينة اللي فالعالم هبطت فيه .
تبسم معاها وطلع الزاجة تاع التاقة ، بقاو عينيه عليها مالڨري كان يشوف من ومن يدرس فالمكان مي كان انتباهو كامل عليها .
The guardian ? No , the protector .