إنها ك وردة ، يمكنك تجاهل رؤيتها ولكن لا يمكنك حبس أنفاسك كي لا تشُمَّ ريحها ..
إنها خيار بين الموت والحياة ، لا يوجد شيء بينهما
إما تتخلى عنها فتموت
أو تختارها فتحيا
🥀
.
.
.
___________________________________
ناض أمير فالصباح ، لبس قشو سقم روحو وهبط ..
وهو فالدروج تباطأت خطواتو حتى حبس ، ضيق عينيه وطلع حاجب وهو عينيه من ومن ، كمل يهبط مي خطواتو مينسمعوش ..
كانت البريسيار تخدم وكاين كاس فوق البوطاجي ، وأمير متأكد بلي رتب كلشي قبل ما يطلع لغرفتو ..
هبط ومشى خطوات دخل للكوزينة ..
حرك عينيه بجنب بلاما يتلفت ، ثواني ودار ويضرب بذراعو ، شدلو الرجل ذراعو وضربو للجنب النفس تقطعلو ، طلع عينيه ورجع خطوة لور ..
طرطق عينيه مع ضحكة وقال ..
- أبي ؟
ضحك نصر الدين وراح قبالة البريسيار ، هز زوج كيسان اللي كانو يعمرو وتلفت فأمير شيرلو باش يجي يقعد معاه ..
قعد نصر الدين وجا أمير قعد مقابلو عالطاولة ، طلع أمير عينيه وقالو ..
- كيفاش !
تبسم نصرو وطلع حاجبو ، وقال ..
- ني هنا فنص ساعة تقريبا ، طلعت عندك للشومبر وهبطت وقعدت وقت ونتا محسيتش ..
- كيفاش دخلت ! النظام اللي طورتو لهاذ البيت متقدم بزاااف وكلمة السر أنا عملتها مكانش اللي يعرفها !
قال أمير ونبرة صوتو متوترة شوي ..
ضحك نصرو وشرب القهوة ساكت ، رجع ارتكز بظهرو عالكرسي وأمير يشوف فيه يقارعلو يهدر ..
دخل نصرو يدو فجيبو وجبد فلاش ديسك نواغ ، حطو فوق الطاولة ورماه جيهة أمير ، وهو حكمو بيدو ، هزو وطلع عينيه فنصرو وهو قال ..
- شيفرة تعطل أي نظام أمان موجود فالعالم .
تبسم أمير وهو يشوف فالفلاش فيدو وعيونو لمعو اومبعد قالو ..
- من وين !
- برنامج يماك الجديد اللي طوراتو مؤخرا ، ماصابتش فرصة باش تجربو مالا جيت جربتو فبيتك اليوم واهيه راو يخدم غاية .
خلص نصرو القهوة ووقف هز الفاست تاعو من فوق الكرسي .. وقف أمير وقالو ..
- رائد ..
تلفت نصرو متبسم وأمير كمل ..
- كاين نظام أمان فبيتنا ، مالا ماجيتش باش تجربو برك !
بقى نصرو يشوف فعينين أمير اللي هوما عيون توائم كأنهم نفس الشخص وقالو بعد ثواني طوال ..
- كاين غبرة فالطابلة اللي بحدا البالكون ، امسحها .
تبسم وراح ، لبس صباطو وخرج ..
بقى أمير واقف ثواني ، اومبعد كأنو فهم طلع يجري مع الدروج لغرفتو ، راح للطاولة اللي بحدا البالكون صاب وراقي هزهم .. عيونو لمعو وهو يشوف فالمخطط اللي مقابلو ..
صونا تلفونو فهاديك الدقيقة ، خبا المخطط فالخزانة تاع قشو ، هز وقال ..
- صباح الخير أيمن !
- صباح النور ، صفا شوية صاحبي !
- هااانية ، عندي وحد الخبر يطرطق
- مام أنا عندي خبر ، عائلة عبد المجيد راحو لمركز الشرطة نورمالمو مزال ما وصلو ، تروح نتا ولا أنا !
- نروح أنا ، حاب نشوف وجه وائل كيفاش عامل كي يشوف باباه سبقو للحبس ..
- ايه صحا .. خلاص كيما تحب ..
ضيق أمير عينيه كي سمع نبرة أيمن كأنو زعفان ، اومبعد قالو ..
- ولا ارواح معايا نسحقاك .. تلاقو تم
- صحاا
قال أيمن متحمس ، كوبا أمير وتبسم وراح هز حوايجو وخرج ..
___
فتحت ملاك عينيها ، وحركت راسها وعيطت ، حست برقبتها تلوات .. حركت عينيها من ومن .. رقدت فالمخزن اللي فيه حوايج الرسم تاوعها .. رقدت كيما القرد !
قعدت وهي تكسل فعظامها ، شعرها مشنشف ووجهها مخلط موسخ بالألوان ..
شافت فالورقة اللي كانت فلرض وتبسمت ، هزتها وبقات تتأمل فرسمتها اومبعد كورتها وحطتها فالانبوب هاداك اللي هي تحط فيه الرسومات ..
ناضت ، فتحت الباب بعدما كانت قافلاتو بالمفتاح ، وخرجت .. سمعت الحس تاع لجين هي وعادل متدابزين راحت للكوزينة ، وهي تتبسم قالت
- صباح الخير ..
تبسمت الخدامة وقاتلها ..
- صباح الخير ملاك ؟ وين كنتي ؟
خبشت ملاك شعرها وقالت
- كنت فالمخزن ورقدت خخخ
تبسمت الخدامة وقاتلها ..
- اغسلي وجهك وارواحي تفطري .
طلعت ملاك لغرفتها غسلت وجهت وبدلت قشها , لبست سروال جينز نواغ وبودي نواغ ..
حزمت شعرها للفوق وهبطت ..
دخلت للكوزينة وراحت طول وقفت بحدا الخدامة وهمست فوذنها ..
- وين راهم ! الدار وين راهم !
تلفتت الخدامة ف لجين وعادل وجرتها خرجو من الكوزينة وقالت تحكي بصوت شبه مسموع ..
- جا خبر بلي حكمو عمك محمد وفيها شرطة كبيرة وقضية كبيرة ، الله يستر برك كامل راحو للمركز ..
طرطقت ملاك عينيها وهي تسمع ، غير كملت جات راح تطلع حكمتها من الذراع .. وقاتلها ..
- قال السي سمير أنو كي تفيقي خوذي عادل ولجين بعيد على البيت لأنهم أطفال وملازمش يسمعو هاد الأخبار خصوصا فهاد الفترة .
عضت ملاك عشواربها وتمتمت فقلبها ..
- اذا سمع مراد راح يتأكد بلي اللي فالصورة شرطي واللي هو سبب كل هاذ المشاكل ، ان شاء الله برك ميعرفش أنو أمير .. وعلاش قاعد يخلط فالوضع علاش !
دخلت ملاك للكوزينة وبدلت ملامح وجهها كي قعدت قدام الذراري ، وقاتلهم بعد ثواني ..
- راني خارجة .. تروحو معايا !
هزو راسهم ايه ولجين قالت
- وين ؟
- لحديقة الألعااااب ..
عيطت ملاك وعيطو مام هوما وناضو يجرو طلعو باش يلبسو ، وقفت ملاك وتلفتت فالخدامة وقاتلها ..
- خالتي راح ناخذهم ، كاش ما يصرا عيطيلي ..
- راح نخبر عمك باش يوصلكم ..
- لا لا راح ناخذ طاكسي ، دوكا نطلع نلبسهم .
أنت تقرأ
بَكـمَـآء || Dumb
Romance• ~ هناک خير في كل شـر ~ • تربى وسط عائلته كالأمير ، تلقى معاملة أمير ، نضج وأصبح رجلا يحمل ملامح مَلِک أسيبقى الأمير على عرشه ! • ~ المجروح من عائلته لا يُشفى أبدا ~ • فتاة متعجرفة ، انطوائية وابنة رجل غني .. أميرة لا يعجبها العجب أعند من الحجر أ...
