بَكـمَـآء || Dumb

20

- المطر يتساقط بهدوء في الخارج ، يمكنك أن تأخذ غفوة عزيزي .
- التحديق في عينيك المتعبتين أفضل من إضاعة الوقت على النوم ..
- توقف عن التحايل ونَمْ .
- لقد نِمتُ كثيرا جدا ، سبعة وعشرون سنة . لم أؤمن حتى اليوم أن هناك شيء يستحق أن أُفَوِت النوم من أجله .
- و ما هو هذا الشيء ؟
- وجهكِ ، الذي يشبه وجه السانتا .
- إنك الشخص الوحيد الذي يرى هذا الخَرابُ جَمالاً .
...

🌸

.
.
.

____________________________

شرات ملاك سروال جينز وبودي ، بدلت فالفيترين الداخل بلخف وخرجت .. نحات البيجامة حطتها فصاشي .. خلصاتو وخرجت .. خذات طاكسي بالزربة راحت للافاك ..
كانت لابسة لينات نواغ وكمامة وجهها ميبانش كامل ..
حاولت تتأنق رغم كل شيء ، دخلت للافاك . وهي تمشي بالزربة باش تدخل ل لومفي حبست كي سمعت صوت يعيطلها باسمها ..
كان الأستاذ جاي قبالتها ، تبسمت كي شافتو وقاتلو ..
- سلام الشيخ واش راك !
تبشم وقالها كي وقف قدامها ..
- ملاك .. لباس وأنت ؟
- حمد لله .
هزت راسها وقالت وهو كمل ..
- حبيت نسقسيك ، القصة اللي رسمتيها فالقماش ، حقيقية ؟
تبسمت بتوتر وقاتلو ..
- مستحيل هه ! خيالية طبعا .
طلع حواجبو وقالها ..
- صدقيني يعني راني معجب بموهبتك ، 30متر قماش كامل ؟ رسمتيها ! يعني ما شاء الله . مام الأساتذة لاخرين عجبتهم رسوماتك ..
تبسمت وهبطت عينيها وقاتلو ..
- الله يسلمك .
- لمهم ، عندي ليك خبر يفرح .
هو قال وهي طلعت عينيها ، وهو كمل ..
- المنحة لتركيا راح تتحصلي عليها بعدما تتخرجي ان شاء الله ..
لمعو عيونها وهي تشوف فيه ، مقدرتش تهدر من الفرحة ، وهو ضحك وقالها ..
- مجهوداتك طوال الخمس سنوات موش راح تروح باطل ، وبالنسبة لموهبتك فالرسم خرافية .
- شكراا بزااف الشيخ شكرااا .
قالت وهو حط يدو على كتفها وقالها ..
- أتهلاي مالا ..
فجأة راحت البسمة من وجهها ، مي حاولت تحافظ عليها قدامو ، ثواني وطيحت ساكها فلرض وهبطت باش تهزو وهو راح فطريقو ..
بقات تمسح فكتفها وين كان حاط يدو .. كانت تمسح وتزير ، اومبعد غمضت عينيها وقالت تهدر مع روحها ..
- خلاص ملاك ، خلاص ، حط يدو برك ، خلاااص .
فتحت عيونها كي سمعت التلفون يصوني ، كوبات وراحت باش تدخل تقرا .. عاود صونا ، هزاتو من جيبها وردت ..
- واش أسيل ني حا ندخل نقرا دوكا .
- زهرة مرت عمي توفات .
هي قالت وملاك طاح التلفون من يدها فلرض وبقات فحالة دهشة ..
.
.
.

وصلت ملاك للدار بعدما فوتت الكونترول اللي كان ضروري تعقبو مالقري كانت بلا عقل ..
كان باب البيت مفتوح والناس داخلين خارجين ، بجنب كاين عشرات الطوموبيلات محبسين .. دخلت ملاك بالزربة وهي تمتم مخطوفة ..
- مرام ! مرام ! مرام ..
كانو الرجال فالصالة التحت قاعدين ، دخلت للمخزن رمات الحوايج اللي كانت هازتهك وطلعت تجري مع الدروج ..
حبستها رشيدة مرت باباها حكمتها من ذراعها وقاتلها ..
- وين كنتي ؟
ملاك مامبا ماشافتش فيها ، جبدت ذراعها وهي عينيها هاربين من ومن ، كملت تمشي بالزربة ودخلت للصالة وين شافت النسا داخلين خارجين ..
وقفت عند الباب جمدت كي شافت مرام قاعدة وسطهم وتبكي .. راحت لعندها ، قعدت قدامها طلعت مرام عينيها كي شافتها عنقتها ..
- يا ملاك يما راحت ، يا ملاك لعزيزة راحت خلاص وخلاتني ، وين خلاتني ! لمن خلاتني ! يا ملاك قلبي راح يخرج يماا راحت راااحت .. قاتلي تهلي ف باباك وخياتك ، ملااك يمااا رااحت ..
كانت ملاك تبكي معاها بحرقة مقدرتش تهدر ..