بَكـمَـآء || Dumb

29

كانت مكافحة الشر مهمة مُتعبة ، دائما .
لكني لطالما عشِقت عملي ، افتخرت بنفسي حتى عندما اضطررت أن أقوم بالقفز من أعلى السطح وفي بطني عشر غرزات ، صرخت وسط الألم قائلا هناك أشخاص في انتظاري ، يجب أن لا أستسلم الآن .
لطالما رأيت نفسي باتمان ، أو سوپرمان ، كنت بالنسبة لنفسي البطل الخارق الذي يجب عليه انقاذ الناس والحفاظ على السلام مهما كلفه الأمر .
لم أندم ليومنا هذا على ما فعلت ، لأني اتبَعت القانون ، حَكمت بالعدل ولم أظلم أحدا . لم أترك شريرا واحدا في الخارج بسلام ، إني أُصبح عزرائيلهم حتى يدخلوا السجن أو القبر .
وأنتِ
يــا
عزيزتي
طريدتي
القادمة .
💔

_________________________

دخل أمير للبيت ، فتح الباب بالشوي ، كانت الزوج تاع الليل ، الناس راقدة .
نحى صباطو وطلع للفوق يمشي بخطوات صامتة كالعادة ..
وهو يمشي بالشوي ، جسمو مرتخي علاخر ، تعبان ويهز فروحو باش يوصل لغرفتو ..
جلف كي خرج فيه خيال واحد قدامو ، كانت الظلمة ..
- أمير !
قال وهو استوعب بلي صوت عمران ، غمض عينيه وتبسم على روحو وهو يمسح على وجهو بيدو ، طلع عينيه فعمران وقالو ..
- وعلاش مزال مرقدتش !
- ڨارد مالاد على ماما .
قال عمران ، وأمير طرطق عينيه فيه وقالو بالجفلة ..
- يما ؟؟ مالها يما ! واش صرالها !
- ششش
قال عمران يسكت فيه وكمل يحكي بالهمس ..
- راهي راقدة دوكا ومام ماني معلابلهاش اسكت دوك تفيقها .
- واش صرا ليما ؟
قال أمير مزالو مزير فكلامو ، حكمو عمران من ذراعو وراح يمشي هو وياه ويهدر ..
- دابزت هي بابا وحكمتها لاكريز ، مزية اللي بابا كان مزالو هنا سينون ..
سكت وأمير هبط عينيه للرض ، يلعب بنظراتو من ومن وتمتم ..
- كلو بسبتي ، كلو بسبتي ..
- أمير .
قال عمران وهو يشوف فيه ، تلفت فيه أمير بعد ثواني وهو كمل ..
- ماشي نتا السبة ، وعلابالك بلي يما شخص قوي أما سيرة ياسمين دائما تضعفها .
- ياسمين ، الوردة المفقودة .
قال أمير وتنهد بالصوت طلع عينيه للسما كأنو التنهيدة خرجت من قلبو ..

- واش قاعدين تحكو بالهمس وسط الليل ؟
تلفتو للزوج فضربة وراهم ، وشافو أمنية واقفة عند الباب تاع الغرفة ..
- ارواحوا
قالت ومدت يديها ليهم ، هبط أمير عينيه وبقى يشوف فلرض ..
جات لعندهم ، وقفت قدامهم ..
مدت يدها طلعت لأمير راسو رجع وجهو مقابلها ؛ مالڨري لزوج طوال عليها ؛
تحجرو دموع فعينيه وهو يشوف فيها تتبسم معاه ، اومبعد قالها ..
- يما سمحيلي .
عنقاتو وهو عنقها ، اومبعد تلفتت لعمران مدتلو ذراعها عنقها مام هو .
.
.

ناض أمير الصباح ، فتح عينيه ، بقى يشوف فالسقف وقت طويل اومبعد ناض دخل للدوش ..
خرج من غرفتو بعدما لبس قشو ؛ سروال جينز نواغ وبودي دومي مونش ابيض ورجع شعرو لور ، حط تلفونو بجيبو وهز لينات ولبس باسكات بيضا ..
هبط للكوزينة ، ضرب طلة اومبعد دخل للصالون .. كان نصر الدين قاعد يقرا فالجرنان ، وأمنية وعمران ومانه .. كان الفطور ديجا محطوط قدامهم وهوما يفطرو بالساكت ..
- صباح الخير .
قال وهوما ردو عليه كامل وهو قعد مقابل باباه .. كانت أمنية تشوف قدامها وتاكل ساكتة ، شاف أمير فعمران وشيرلو عليهم وعمران قلب شفافو ، وبقاو متهادرين بعينيهم برك ..
تنهد نصر الدين وحط الجرنان بجنب وهوما كل واحد شاف فطبسيه تم تم .
طلع أمير عينيه حتى شاف يديه باباها ، ظهر يديه كان مجرح ، وأمير يعرف بالتأكيد سبب الجروح .
حرك نصر الدين عينيه لأمير شافو يشوف فيديه ، وقال ..
- هيه أمير ؟ راني نشوف جيت لبارح لهنا ؟
- ايه ، حبيت ن .. نحكي معاك فموضوع .
- خير ان شاء الله !
- م .. موضوع شوي حساس ، مبعد ونهدرو .
طلعت أمنية عينيها خزرت فيه وهو شاف فيها شوفه خاطفة وهبط عينيه تم تم ..
ناضت يماة نصر الدين ، بعدما قاتلهم راح تروح تشرب دواها ..
غير هي خرجت ردخت أمنية المغرفة عالطاولة ، وهوما كامل جلفو فبلايصهم .. وقالت بعد ثواني بصوت هادي ..
- خير أمير ؟ واش هو الموضوع الحساس ؟ ولا أنا عندي حساسية منو مثلا ؟
طلع عينيه فيها وقالها بعد ثواني يحكي بحروف متقطعة ..
- ي يعني .. هو موضوع يمكن تكوني تعرفيه مي ..
- فهد راو يخدم مع ملاك اللي راهي تخدم مع موساد اللي راه مترأسها سمير . هيه ! واش الجديد ؟ ولا ملاك قاتلك شي وحدوخر .. ولا اصبر تشو ، خرجت كذبة جديدة ، أنو ياسمين راهي برا البلد أصلا ؟ ها واش هو الموضوع ؟ ولا .. كازيو اللي هربتو أنت من السجن قتلوه فمعركة سرية بين المافيتين والجثة راهي مختفية فظروف غامضة ويمكن تحصل نتا ونحصلو كامل معاك ؟ ولا موت مراد اللي هو فالحقيقة مجرد خدعة ومراد مزالو حي أما سمير برك اللي عارف وين راه ؟ ولا سمير اللي خطفو الرائد لبارح من بيتو ؟ ها ؟ واش من موضوع مخفي حابين تخبوه عليا !