#أبن الاجاويد

part 5

                                ﷽

بقلمي ZahraaAlk2
__________________

اشوف كرار صاعد بالصدر يم عمي ، امي بصف شباك ومينا بالنص واني من جهه ثانيه اباوع لامي بزعل وعصبيه ..

ولااهتمت الي وغلست عليه ، ماسكتت بجي ، كلت والله الا اصدع روسهم واصركعهم ، نوب اني دخت وهمه ولا يمهم تالي عمي نتر بيه وضل يحجي على عنادي وعفيه خلك الج بالبجي شنو انتي من طفله ..

امي ضلت تكله مو كتلك وكحه ماتنجرع والله مورمه كلبي هاي شوف عينك شوف ..

درت وجهي واشهك ، وامسح بدموعي لحد مادخت ليه سكتت ، نوب درب لعبها لروحي ومتت جوع ، طالعين من سته صبح ، هسه باا١٠ ازدحام عند بوابه كل محافظه ، كتل الازدحام ..

احس بطني تقرقر ، نزل عمي عود يجيب اكل ، اشتهيت لفات كص اي شي المهم زفره لان متت واريد شي يترس البطن ..

انداريت على مينا جوعانه ..

هسه عمج نزل ياخذ غده بالكت يجيب دجاج شي متت جوع ..

امي حجت عود خزنه طاح حظجن ماشايفات ..

ماحاجيتها شايله عليها ميته قهر منها ، ردت مينا عليش نخزيج ميتات جوع ، كتلج ناخذ شي من البيت لان طالعين بدون ريوك ، بطونه يابسه على العشه مال البارحه ..

نطيتي انتي وعمي لااا عود من درب ناخذ من مطعم تالي صار بال٤ ساعات بالدرب كلشي ماشفنه ..

غمتنه ثنينه وحجت بنات الفكر منو عمتجن قابل ..

اجه عمي يهفي بيده علاكه صمون ، وبطاله ماي ، صعد وشمر العلاكه علينه .. بس فتحناها تفاجئت بيها ..

رفعت نظري على مينا فاكه حلكي ..

مينا مصدومه مثلي ، فردشت العلاكه دور بيها زين خاف متوهمه ، تالي طلع ماخذلنه باكيت جبن مثلثات وخمس صمونات على عددنه وبطلين مي ..

انداريت على امي شلتهن بعلاكتهن وخليتهن بحظنااا همست الها منو الفكر هسه عمي لو عمتي ..

همست ادب سززز بلا تربيه حلفت لو اعرف اموت من جوع مااشرب كمع مي لو اخلي نتفه صمون بحلكي ..

ضليت هيج مزهوره وحلكي مر من القهر ، كل شوي عيوني مدمعه وامسح بيها .. مينا وكرار ماتحملو اكلو صمون وجبن ..

شكد انهضمت والله احنه ولد خير ، صح بابا مدرس بس خير من الله صح نوبات نمر بازمه ماليه حالنه حاي اي بيت عراقي ، بس بطونه ماروسه وشبعانين ملابس احسن شي ، حالنه حال ناس ..

بس امي تباوع لغيرها تباوع ليفووووك .. تشوف اخواتها بايران ونسوان اخوتها وتقارن عيشتهم وسفرهم وطلعاتهم وطباتهم ..

محد كللها تزوجي واحد دخله متوسط ، هيه اختارت والي دفرت نعمه وبدت تتكبر من اهلها راحو لايران واستقرو هناك ..