#أبن الاجاويد

part 7

                                ﷽

بقلمي: ZahraaAlk2
_________________

- مزوج عليج امي ترى صارلهم بالاسبوع ، ردت اكلج والله بس خفت لاتصير مشكله واوكع بيها اني ،

- ردت بهدوء صافنه علي ، ادري يمه اصلا من اول ماكال اريد اجيب بنات ناظم لجاي ، عرفت تاليها ياخذ امج ويزوجها ..

لا امج المره الحوك والاصيله والي تضل على ذكره رجلها ،

ولا عمج الاخو الزين والحنين ، ومايخلي عينه على عرض ومرت اخوو..

سكتت متفاجئه بكلامها ، حجت بحه الالم اطبطب عليه .. لازعلين علي يايمه احجي الصدك اناا .. عمج هذا دربه من ١٥ سنه ..

- شلون يعني ؟!

- ماضل وحده ماتزوجها عليه ،  لا عبده ولا بيضه ولا عراقيه ولا الاعجميه ، ياهي بيها مجال ياخذها شهر زمان ويطلكها بعدين ..

-  وهذا ياهو ينطي مره بس شهر زمان ، شنو لعب جهال زواج عندهم  ..

- يطو يمه يطوو ، عمج راعي متع من زمان ، وربعه هواي كلها تريد خاطره ، عبن عود سيد ويزوج العالم بلاش ، لوجهه الله وبثواب الحسين ،

والناس الطيبه تصدك يايمه عبالهم خير وجده النبي ، شعرفها الوادم كلها على كد نيتها ، وياخذون بركاته ، مابيهم واحد متعلم لو قاري كتاب ديني حتى يعرف عمج جذاب ، الجهله وناس دراويش تتعبه ومايطون بي  بكد شعره لو حتى كفر لو حرف القران ...

- استغفرالله شهل عقليات ، بابا ابد ماكال احنه ساده تفاجئت بعمي من يكول انا سيد ، حتى عمتي ماحجت ولا كالت ونكرت ..

- اي يمه عمج سيد مال هالوكت ، الي اخذو شهايدهم بعد الاحتلال وصارت كلمه سيد تنكال لياهو جاي حتى للنكس ، حشاه النبي يطلعون احفاده هيج ،

حشاه للحسين من هيج ذريه تعبانه متخاف الله ، هسه ياهو جاي حط عمامه على راسه ولمله جم واحد .. وكعد ياكل بمال العالم بحجه ثواب ونذر اوو يايمه خليني ساكته ، كلبي مورم من هالسوالف ،  الحظره متروسه امثال عمج ،...

- ليش ضليتي على ذمته يااعمه جان تطلكتي ..

- ياهو يلفيني بعد ، وانا عمتج اخواني واخواتي ناس فقره ، وعمج شراني ، حتى الكاع الجواه تصيح منه ومن اذيته ، بناته ما خلصن من شره عاد ناس الغربه ..

- بناتج صدك وين عمه ، حتى ايه ماشفتها بعد من رجعت لرجلها ...

- جرت نفس ليش تهيجين المواجع يايمه والله كلبي موجر ماصدك شوي التهي وانسى ..

سكتت ورجعت راسي بحظنها ساكته ، اجاني صوتها ابد لا تنزلين راس العمج جاي انصحج تردين تاخذين بيها او لاا ، بكيفج بعد ..

- شلون عمه ..

- لا تاخذين بكلامه ، ولا تامنين بي ابد ، عمج ماعده مخافه الله ولا حتى غيره على عرضه ، قربت حلكها من اذني تهمس ،