قصص رعب 🔞🚫

" آكلي لحوم البشر "

تعرف إن فيه بشر بيحبوا لحم البشر وبياكلوا لحم البشر؟!
يا عزيزي آكلي لحوم البشر مش أسطورة زي ما إنتَ فاهم، لا همَ زومبي، ولا كائنات فضائية، دول بشر زيي وزيك بس اكتفوا من أكل الحيوانات والخضار وقالوا يجربوا ياكلوا نفسهم، أهو، حاجة جديدة!

ما تيجي أقول لك الحكاية كاملة؟! من غير بقى أي تأليف وقصص ومبالغات، ونشوف مع بعض الموضوع بدأ فين، وأصله إيه!

جاهز؟!
يلا بينا.

آكلي لحوم البشر، أو الـ"Anthropophagy"، ومعناها أكل البشر للحم البشر.
المصطلح مشتق من الاسم الإسباني "Caríbales" من الـ"carib"، وهي قبيلة من جزر الهند الغربية اتعرفت إنها بتحب تاكل لحم البشر.

خليني أقول لك إن أكل البشر بيعود تاريخه لتاريخ البشرية الأولي، حتى إنهم لقوا دلائل تاريخية بتؤكد أكل البشر للبشر في معظم القارات.

يا عزيزي دول لسه لحد وقتنا هذا موجودين، خصوصًا في أجزاء من غرب ووسط أفريقيا، وميلانيزيا، وغينيا الجديدة، وأستراليا، وفي نيوزلندا، وغيره من القبائل كتير منتشرة في العالم، حتى في قبائل مختلفة في أمريكا الشمالية والجنوبية.

فيه مناطق كانت بتشوف إن لحم الإنسان دا شكل من أشكال الطعام، وكأنه لحم حيوان مثلًا، وكانوا أحيانًا بيشبهوه بالخنزير طويل المدى الميلانيزي.

سكان اسكتلندا الأصليين كانوا لما بينتصروا في حرب، كانوا بيقطعوا جثث الموتى بعد المعركة وياكلوها، ويُقال إن قبيلة اسمها "باتاك" في سومطرة كانت بتبيع لحم البشر عادي في الأسواق قبل ما يتم السيطرة الكاملة عليهم من الهولنديين.

وفيه قبائل كانت بتستخدم أعضاء وأجزاء معينة من جسم الإنسان كطقوس بيمارسوها في السحر والشعوذة، وكانوا بيعتقدوا إنها ممكن تديلهم صفة من صفات الشخص الميت اللي كلوا لحمه.
ولنفترض شخص عنده إيده قوية، كانوا بيعتقدوا إنهم لو كلوا إيده هياخدوا قوتها.

ومعظم الممارسات اللي كانت بتتم في أفريقيا وبيحصل من خلالها قتل الضحية وأكل لحمه كانت دايمًا بتبقى مرتبطة بالسحر.

فيه بعض القبائل كانوا بيقتلوا عدوهم ويقطعوا راسه وياكلوها علشان دافع الانتقام في نفوسهم يهدا.

فيه بقى قبائل غريبة جدًا، لما شخص بيموت بيجي قرايبه وياكلوا جثته كاحترام له، ولأنه شخص له شأن كبير في القبيلة كانوا بيقدموا له الاحترام بإنهم ياكلوا جثته، ودي طقوس كان بيمارسها بعض من السكان الأصليين الأستراليين.

وفيه قبائل تانية كانت بتضطر تاكل لحوم البشر بسبب المجاعات اللي كانوا بيتعرضوا لها، كعملية إنقاذ.

يا عزيزي دا فيه قبيلة اسمها "الأزتيك" ودي من أهم القبائل اللي كانت لها عادات وتقاليد أساسها أكل لحوم البشر، بدأت حياتهم في شمال المكسيك كقبيلة بدوية، وعاصمتهم كانت "تينوختيتلان"، واتحركوا لأمريكا الوسطى في بداية القرن الـ13.