قصص رعب 🔞🚫

موقف على الماشي

اتجوزت وبعد مرور ٧ سنين كاملة مراتي مكنتش بتحمل  للاسف، روحنا لكل الدكاترة اللي ممكن نروحلهم، لكن الكل أكد ان مفيش أي موانع للحمل سواء مني او منها، فقررنا نسيبها لله ورضينا بقضاء الله وقدره، وان الخير ربنا هيعمله سواء كان بالخلفة او بعدمها فأكيد خير لينا احنا منعلمهوش..

وفي يوم مراتي تعبت تعب شديد جدا، ولما ودتها للدكتور شخصها ان مفيش اي مرض عضوي، وان دي اعراض حمل وحولنا لدكتورة نسا، ولما روحنا للدكتورة كانت مفاجأة طيرت عقولنا لما أكدت ان مراتي حامل فعلا، الفرحة في الوقت ده مكنتش سايعاني، كنت حاسس اني طاير في السما، ولامس النجوم بإيديا، كإن حد كان ساحب روحي، وردت فيا من تاني...

كانت لحظات ماتتوصفش، ولا تتحكي، وبدأنا متابعة مع الدكتورة يوم بيوم عشان صحة مراتي وصحة الجنين، كنت كل يوم بحمد ربنا مليون مرة على نعمته وكرمه اللي انعم بيهم علينا، وبعد مرور ٥ شهور من المتابعة، جت البشرى، الدكتورة قالت لنا ان البيبي هيكون بنت، كنت مبسوط جدا، والفرحة مكنتش سايعاني اكتر واكتر..

ورجعنا البيت واحنا في اهلى درجات السعادة، كنت دايما بحاول على قد ما اقدر اقف جمبها واساعدها في الاعمال المنزلية، لان كل ما كانت فترة الحمل بتعدي ويقرب ميعاد الولادة كانت بتتعب اكتر..

وفي يوم كانت تعبانة جدا، اخدت اجازة من الشغل، وهي نامت وانا بدأت اعمل حاجات البيت،  وقفلت تليفوني عشان مفصلش خالص ولا حاجة تشغلني على اني انجز كل اللي محتاج يتوضب في البيت، وبدأت بغسيل المواعين، اللي وانا بغسلها اتولد جوايا احساس شفقة تجاه الستات، وانا بسأل نفسي:
ايه الملل ده؟! هو انا هفضل اغسل طبق طبق؟! انا بزهق وانا بغسل كوبايتي في الشغل!!!..

لكن مفيش رجوع، بدأت معركة غسل الصحون، واثناء انشغالي بغسيل المواعين، سمعت تليفوني بيرن!!!!، قفلت الحنفية وبدأت اركز يمكن يكون بيتهيألي؛ لكن فعلا كان بيرن!!!، سبت كل حاجة وخرجت بره المطبخ في اتجاه تليفوني،عشان الاقيه بيرن على  رقم "برايفت"، ومعرفش ازاي رن وانا متأكد مليون في المية اني قفلته فعلا قبل ما ابدأ شغل البيت!!!..

الاتصال اتقطع، ملحقتش ارد، ولقيت ان الموبيل مقفول فعلا!!!، وبعد ثواني التليفون رن تاني وهو مقفول!!!  ، نفس الرقم البرايفت تاني بيرن، ففتحت السكة بسرعة ولقيت صوت بنت صغيرة،تقريبا في عمر ٤ او ٥ سنين بتقولي:

"ازيك يا بابا"

ضحكت وانا بقول في نفسي:
اكيد شقاوة الاطفال ملهاش حدود..
وقولتلها:

متلعبيش بحاجات الكبار، فين باباكي؟!،

ردت عليا رد صادم، وقالتلي بنبرة فيها نوع من الزعيق:

انا مبلعبش بحاجات كبار، انا عارفة بقول ايه كويس، انت بابا، وانا عارفاك كويس..

السكة اتقفلت بعد ما قالت كده، صوتها خوفني ورعبني، فضلت سايب التليفون على ودني وانا سرحان ومش عارف ده ممكن يكون ايه؟!!..

فتحت التليفون ومكنش فيه اي مكالمات جديدة من ساعة ما كلمت الشغل وبلغتهم اني مش جاي..

فعلا كان موقف غريب، لكني حاولت انسى ورجعت اكمل شغل البيت تاني، ومراتي صحيت واليوم عدى، وايام كتير عدت، وسنين، ونسيت الموقف كله، لان مراتي ولدت بالسلامة وبنتنا بقى عندها ٣ سنين، ٣ سنين من الفرحة وانا بشوفها بتكبر قدامي يوم بيوم..

وفي يوم قررت اعمل للبنت مفاجأة، عديت على سوبر ماركت كبير وجبتلها شيكولاتات وكل الحاجات اللي بتحبها، وكمان كام لعبة، ورجعت البيت لقيت مراتي في المطبخ، ولما سألتها عن البنت قالتلي انها نايمة في اوضتها..

خبيت الهدايا، واتسحبت براحة لأوضتها عشان اعملها مفاجأة، لكن انا اللي اتفاجأت مش هي!!..

لما قربت من اوضتها، ملقتهاش، لكن سمعت صوتها جاي من اوضتي انا ومامتها، فقربت بحذر شديد، ولقيتها بتتكلم مع امي في التليفون!!، كنت مستغرب جدا، ازاي طفلة ٣ سنين قدرت تطلب امي في التليفون وتكلمها على الخط الأرضي؟!، بس رجعت قولت لنفسي:

اكيد بتلعب يعني، وبتتخيل انها بتكلم جدتها، كل الأطفال بتلعب كده، ففتحت الباب وانا بقولها:

القمر بتاعي بيعمل ايه؟! جبتلك حاجات حلوة كتير

فقالت:
تيتة بتسلم عليك يا بابا، خد عايزة تكلمك..

مسكت التليفون، قربت السماعة من ودني، وانا متأكد كل التأكد انها مجرد لعبة خيالية من طفلة زي كل الاطفال، لكن صوت امي صدمني!!!، وقالتلي:

البنت دي ازاي عرفت تطلبني؟!، لازم تخلوا بالكوا منها كويس..

سلمت عليها وحاولت مبينش استغرابي، وثفلت معاها، وبصيت للبنت وانا مستغرب وفي قمة ذهولي ودهشتي!!!، وسألتها:

ازاي يا حبيبتي طلبتي رقم تيتة؟!

صدمتني وقالت:

"زي ما عرفت اكلمك من ٣ سنين"

وسابتني وجريت خارج الاوضة!!..

قعدت على السرير وانا مش مصدق نفسي؟!!

وبقول لنفسي:
هو ايه البي بيحصل؟!، هو ده معناه ايه؟!..

دي بنتي فعلا؟! ولا  كائن من عالم تاني غريب؟!!

مسكت تليفوني وفضلت ادور فيه، على اي مكالمات مسجلة، وياريتني ما دورت!!!..

بقيت مكالمة مسجلة من ٣ سنين، نفس التاريخ، ونفس صوت البنت وهي بتقولي:

" ازيك يا بابا".

مش ده الغريب، الاغرب ان مش ده التليفون اللي كان معايا من ٣ سنين!!!، ومكنش الإصدار ده اخترعوه اصلا!!!، ده اصدار السنة من احد الموبيلات المشهورة!، والأغرب اني لقيت مكالمة عليه من رقم برايفت تاريخها يرجع ل٣ سنين فاتت!!، وذاكرة التليفون مبتحتفظش بمكالمات لفترة اكتر من ٣ شهور!!!!!..