قصص رعب 🔞🚫

لعبة منتصف الليل

فيه لعبة مخيفة ظهرت سنة 2012 وكانت تريند وقتها اسمها "لعبة منتصف الليل" وتعتبر اللعبة دي من ألعاب العالم الاّخر لأنك من خلالها بتقوم بتحضير كائنات غريبة أو أشباح أو أي شئ مخيف أنت وحظك. ناس كتير جربتها وأنت كمان ممكن تجربها بسهولة لأنها مش محتاجة متطلبات كتير وبيرجع أصل اللعبة دي للميثولوجيا الإسكندنافية لكن وقتها كانت لأهداف مختلفة, كانت طقوس وثنية بيستخدموها لعقاب الخارجين على القانون وكمان كانوا بيخوفوا بيها الناس عشان ميعصوش الاّلهة أو يعبدوا اّلهة تاني.

طب إزاي تجربها؟

بص يا سيدي في البداية لازم تلعبها في شهور محددة شهر 3 أو 7 أو 7 أو 11 ولازم تكون لوحدك في البيت ومعاك ولاعة وشمعة وورقة وملح.
الساعة 12 بالظبط تكتب اسمك رباعي على الورقة ومن تحت اسم والدتك وتجرح إيدك جرح خفيف وتحط كام نقطة دم على الورقة وبعد كدا تحط الورقة قدام باب البيت وفوقيها الشمعة بعد ما تولعها طبعا وتطفي كل أنوار البيت والشبابيك وكل حاجه, نسيت أقولكوا لازم تكون معاك شمعة تاني غير اللي حاططها قدام باب البيت.

بعدها تخبط على باب البيت من جوه 22 خبطة ولازم الضربات تكون مع عقارب الساعة أو تكون في إيدك ساعة فيها ثواني وتسيب التليفون خالص يعني مع كل ثانية خبطة وأنت بكدا يا معلم جاهز ودخلت اللعبة وبتسمع لكائنات العالم الاّخر بدخول بيتك.

بعدها تولع الشمعة اللي ماسكها ف إيدك وتكون ماسك الولاعة والملح وتتمشى داخل البيت براحتك المهم متوقفش في مكان واحد أكتر من 10 ثواني يعني لازم تتحرك باستمرار.. وأنت بتتحرك في البيت هتشعر ببرودة المكان ولو الشمعة انطفأت حاول تولعها من جديد خلال العشر ثواني الجايين ولو فشلت بسرعة اعمل دايرة حواليك بالملح اللي ف ايدك عشان ميصيبكش أذى وبعدها ولع الشمعة بهدوء وبراحتك.

وقت اللعبة بيكون من الساعة 12 لحد الساعة 3:33 والمطلوب منك خلال الفترة دي تتحدى نفسك وتصمد خلال الأحداث اللي هتحصل معاك ولو شوفت أي شئ غريب أو مخيف متركزش وكمل مشي في البيت عادي مهما حصل ومهما شفت عشان كل اللي هيحصل هيكون حاجات غير حقيقية.
طبعا اللعبة دي عملت ضجة وتم تجسيدها في فيلم أمريكي عام 2013 بعنوان The midnight game  وبتدور أحداث الفيلم عن مجموعة طلاب من المدرسة الثانوية وهما بيلعبوا لعبة منتصف الليل وكمان اتعملت video game  وممكن تحملها وتلعبها على الكمبيوتر بتاعك.

الكلام ممكن يكون تخاريف أو مجرد أسطورة .. طب تعالوا أحكيلكوا عن شاب فلسطيني قام بتجربة اللعبة وحكى لنا حصل معاه إيه.
الشاب بيقول سمعت عن لعبة منتصف الليل وبعدها بأيام أختي الحامل راحت للمستشفى تولد وأمي راحت معاها وكنت في البيت لوحدي وقررت تجربة اللعبة كنوع من المغامرة بعد ما أثارت فضولي واتصلت بصديقي قولت له إني هجرب اللعبة عشان يتابع معايا ولو حصلتلي حاجه ومكلمتوش بعد الساعة 3:33 يعرف إني في خطر وييجي ينقذني.

الشاب قال الساعة 12 عملت كل الخطوات وقفلت النور وخبطت على الباب 22 خبطة وبعد اّخر خبطة بلحظات سمعت صوت ضحكة مكتومة في البيت, خوفت في البداية لكني أقنعت نفسي أنها أوهام وبدأت أتمشى في البيت.. حسيت ببرودة في الجو فقررت أروح أوضتي ألبس الجاكيت بتاعي وفي طريقي للغرفة شميت رائحة قطة ميته أو رائحة عفن ناتجة عن تحلل شئ ميت ولما دخلت غرفتي على ضوء الشمعة شوفت حد نايم فوق سريري وبيشخر, اترعبت وقتها والشمعة كانت هتوقع من إيدي لكني افتكرت قوانين اللعبة وإني مطلوب مني مركزش على أي حاجه هتحصل حواليا. اتقدمت ناحية الدولاب وطلعت الجاكيت ولبست بهدوء وخوف وقبل ما اخرج من الأوضة سمعت صوت أمي بتقولي أقفل باب الدولاب وراك ولما بصيت ناحية الصوت لقيتها هي اللي نايمة على السرير وباصه عليا بنظرة رعبتني.
خرجت من الغرفة بسرعة فاتفاجئت بابن أختي مهند بيلعب مع قطة ميته وأول ما شافني جري ناحية غرفتي فجريت وراه لقيته اختفى وباب الغرفة اتقفل في وشي .. من الخوف الشمعة وقعت من ‘يدي رحت بسرعة رشيت ملح حواليا في دايرة وعلى ضوء القدامة مسكت الشمعة من الأرض وولعتها من تاني.

غرفة أختي قصاد غرفتي وكانت مفتوحة بصيت فيها شوفت واحد واقف وملامح وجهه مش ظاهرة وقدمه تشبه قدم الحصان وفي إيده سكين فضلت باصص عليه راح طاعن بيها واحد نايم على الأرض واللي نايم بيبصلي ويضحك ومادد إيده ناحيتي في إشارة معناها ساعدني .. في اللحظة دي حسيت إني في ورطة وإني دخلت عالم أنا ندمت إني دخلته فقررت أنهي اللي بيحصل وجريت ناحية باب البيت عشان أهرب لكني ملقيتش المزلاج أقسم بالله ومعرفتش أفتح الباب بأي طريقة, حسيت بانهيار عصبي وبقيت أضحك بشكل هستيري لكني تمالكت نفسي ورشيت ملح حواليا وقعدت على الأرض من كتر الخوف.

بعد ثواني خرجت من أوضتي ست عجوزة جدا وقربت ناحيتي وقالتلي مالك يا خالتي؟ بتعمل إيه هنا لوحدك؟ عملت نفسي مش سامع وحطيت إيدي على وداني راحت قالتلي مش أنت عمار؟ بصيت ناحيتها لقيتها اتحولت لملكة جمال قلتلها إنتي مين؟ قالتلي أنا مش هعرف أكلمك هنا تعالا معايا الغرفة.. لاحظت أنها مش عارفه تقرب لي عشان الملح اللي حواليا وبسرعة رحت رشيت عليها ملح راحت صرخت بشكل مرعب واتحرقت وفي نفس اللحظة شوفت وهج نار خارج من غرفة نوم أمي وبخوف رحت ناحية الغرفة لقيت النار انطفأت وشوفت راجل عجوز لابس أبيض ولحيته بيضاء وماسك في إيده كتاب وفي الإيد التانيه مسبحة ووجهه كل نور كأنه ملاك.. سألني هل اّذوك يا ابني؟ قلتله أنت مين؟ ودخلت بيتنا إزاي؟ راح ابتسم وقال لي تعالا ورايا واتجه ناحية باب البيت واختفى فجأة من قدامي وشوفت مزلاج الباب رجع من تاني .. فتحت الباب وجريت للشارع ووقتها سمعت صوت أمي وأختي بيصرخوا يقولوا تعالا متسبناش لوحدنا مع الشياطين .. فضلت أجري في الشارع لحد ما رحت لأقرب محل تليفونات واتصلت بصاحبي وجي أخدني بالسيارة وكنت لحظتها منهار من العياط ونمت الليلة في بيت صاحبتي والصبح رحت المستشفى وحكيت لأمي كل شئ ورجعنا البيت وطبعا شلت الشمعة والورقة من قدام الباب.
 

المصادر
Amy'scrypt
Wikipedia
Youm7