Unicode...
ကြက်ပျံမကျ စည်ကားနေတဲ့ ပွဲဈေးတန်းတစ်ခု...။ ဒီရာသီက ရပ်ကွက်တွေရဲ့ ပွဲရာသီမို့ တန်ခူးမတိုင်ခင်ထိ ရပ်ကွက် ဘုရားပွဲတွေ တောက်လျှောက်ကိုရှိနေမှာ။
အခုက နတ်တော်လပြည့်မတိုင်ခင် အဝေးဖိတ်ပေါ့။ အဝေးဖိတ်ရယ်၊ အဖိတ်ရယ်၊ လပြည့်နေ့ရယ်ဆိုပြီး သုံးရက်တိုင်တိုင် ဒီရပ်ကွက်မှာ ပွဲဈေးတန်းကြီးရှိနေမှာ။
၁၂ရာသီပွဲဈေးသည်တွေဆို ပွဲမတိုင်ခင်တစ်ရက်ကြိုလာပြီး နေရာဦးကြပြီ။ ရပ်ကွက်လမ်းထဲရော လမ်းထိပ်မှာရော ဈေးသည်တွေအပြည့်။ ဇာတ်ပွဲပါပါတော့ မိုးချုပ်ပြီဆိုတာနဲ့ စစည်တာ မိုးလင်းတဲ့အထိပဲ။
မင်းထွဋ်တို့အုပ်စု အောင်နိုင်ဆန်းကောင်းမှုနဲ့ ပွဲဈေးထဲရောက်နေပြီ။ သူ့အေးအေးကြိုင် သုံးညဆက်တိုက် ပွဲကြည့်မှာမို့ ပွဲမကြည့်ခင် သူကြိုက်တဲ့မုန့်လေးတွေဝယ်ပေးရအောင် လာတာတဲ့။ မင်းထွဋ်တို့ကို တောအရက်တိုက်ပါ့မယ်ဆိုတဲ့ မက်လုံးနဲ့ ဆွဲလာခဲ့တာပဲ။
အစကတော့ မင်းထွဋ် ဘာမှလုပ်ချင်ကိုင်ချင်စိတ်မရှိသလို သွားချင်လာချင်စိတ်လည်းမရှိဘူး။ ဒီတိုင်း အိမ်ထဲမှာပဲ စိတ်လေနေတာ တစ်ပတ်လောက်ရှိပြီ။
အောင်နိုင်ဆန်းက အတင်းဇွတ်ခေါ်တာနဲ့ ရပ်ကွက်ကလည်းနီးတော့ စိတ်ပြေလက်ပျောက်ဖြစ်အောင်ဆိုပြီးထွက်လာတာ။
ဪ... အချစ် အချစ်...။ အောင်နိုင်ဆန်းကို မင်းထွဋ် အားကျပါတယ်။ ချစ်ချင်တဲ့သူကို လွတ်လွတ်လပ်လပ် ချစ်ပစ်လိုက်လို့ရတယ်။ မိဘသဘောမတူတာ ဘာညာ အသာထား။
လူဘုံအလယ် လက်ကလေးတွဲလို့ လမ်းလျှောက်ကြရင် ဘယ်သူက အကြောင်းမဲ့သက်သက် လက်ညှိုးလာထိုးမလဲ၊ ဘယ်ကောင်က လှောင်လိမ့်မလဲ၊ ဘယ်သူတွေ တီးတိုးတီးတိုးနဲ့ အတင်းပြောလိမ့်မလဲ။ ဪ... ချစ်သူနှစ်ယောက် လက်ချင်းတွဲပြီးလျှောက်လာတာ ကြည်နူးစရာလေးပါလားဆိုပြီး အားကျမဲ့သူတွေ ပိုများပါလိမ့်မယ်။
မင်းထွဋ်အတွက်ကတော့လား...။
အောင်နိုင်ဆန်းလက်ထဲမှာ မုန့်လင်မယား၊ မုန့်သိုင်းခြုံ၊ မုန့်ခေါင်းအုံး၊ စနွင်းမကင်းနဲ့ ကောက်ညှင်းပေါင်း အထုပ်တွေ ပြည့်လို့။ ဒါတောင် ခဲတံချောင်းဝယ်ဖို့ပါပြင်နေတာ။ ရင်ပြည့်ပြီး အန်နေမှ ပွဲမကြည့်ရတာ မင်းကြောင့်ဆိုပြီး အမှုပတ်မယ်လို့ ပြောလိုက်တော့မှ ခဲတံချောင်းကို လက်လျှော့လိုက်တယ်။
YOU ARE READING
ခြံစည်းရိုးတစ်ဖက်က ယုဇနပန်းငယ်
General Fictionယုဇနပန်းရနံ့ကိုရှူရှိုက်ပါ။ သံစဉ်ထဲမှာစီးမြောပြီး လခြမ်းကွေးလို အလှတရားနဲ့ မင်းသမီးကလေးကို ရှုစားပါတဲ့...။ ဪ မင်းသမီးလေးရယ်... မဖြစ်နိုင်ဘူးဆိုတာသိပေမဲ့ မိန်းကလေးစစ်စစ်သာ ဖြစ်လိုက်ပါလားကွယ်...။ ယုဇနပန္းရနံ႕ကိုရႉရွိုက္ပါ။ သံစဥ္ထဲမွာစီးေျမာ...