Unicode...
ညိုတို့သုံးယောက်နဲ့ ဟိုကလေးတစ်သိုက် ရဲစခန်းကို ရောက်လာကြတယ်။ မာမီရွှေမြကတော့ လူကြီးပီပီ ညှိနှိုင်းပေးပါတယ်။ ညိုကတော့ ဒေါသထွက်နေဆဲမို့ ဘာမှဝင်မပြောနိုင်ဘူး။
ဟိုကောင်လေးလည်း သွေးစို့စို့နဲ့ ငိုရှာသေးတယ်။ မှတ်သားစရာပါပဲ။ မာမီရွှေမြလို လူကြီးတစ်ယောက်ကိုတောင် ဟက်ဟက်ပက်ပက်ပြန်ခံပြောခဲ့တဲ့ကလေးက အခုကျမှ လူသနားအောင် မျက်ရည်ခံထိုးနေတာလေ။ အကွက်တွေပေါ့။ ညိုကတော့ ရယ်ချင်ရဲ့။
"ကဲ ကဲ... ခဏလေးစောင့်... မကြာခင် ဒီဘက်က အုပ်ထိန်းသူတွေရောက်လာကြတော့မှာပါ"
စခန်းမှူးက ကြားထဲကနေ ဝင်ထိန်းရင်း တံခါးပေါက်ကိုလှမ်းကြည့်တယ်။
"ဟော လာပြီ"
စခန်းမှူးမျက်နှာက ရွှင်ပြုံးသွားပြီး အဲဒီကောင်လေးရဲ့ အုပ်ထိန်းသူဆိုတာတွေကို သူကိုယ်တိုင် မတ်တပ်ရပ်လို့နှုတ်ဆက်တယ်။
အလောတကြီးပြေးဝင်လာကြတဲ့လူတွေကို ညို မျက်ထောင့်တစ်ချက်ကပ်ပြီး ကြည့်လိုက်တယ်။ သူတို့သား ရဲစခန်းရောက်ရတဲ့အထိ သွေးထွက်သံယိုဖြစ်သွားတာဆိုတော့ ဘယ်လောက်ထိများ ပြာနေမလဲလို့ စူးစမ်းချင်စိတ်နဲ့ပါ။
ဒါပေမဲ့ မထင်မှတ်ထားတာတစ်ခုက ညို့ရဲ့တင်းနေတဲ့မျက်နှာကို ချက်ချင်းညှိုးကျသွားစေတယ်။
မေမေလေ။ ဟုတ်ပါတယ် ညို့ရဲ့မေမေမှ မေမေအစစ်ပါ။ သွေးသစ်ညိုကို မွေးခဲ့တဲ့ ဒေါ်စိန်ညိုရယ်ပါ။ မျက်နှာထားတင်းတင်းနဲ့ ဝင်လာ၊ စခန်းမှူးကို ဟန်ဆောင်အပြုံးလေးနဲ့နှုတ်ဆက်ပြီး လွတ်ရာခုံမှာ ခါးမတ်မတ်ဝင်ထိုင်နေတဲ့ ညို့မေမေပါ။
မေမေက စခန်းထဲဝင်လာကတည်းက ဘယ်သူ့ကိုမှ အဖက်မလုပ်ဘူး။ ဟိုကောင်လေးကိုလည်း စိုးရိမ်စိတ်မရှိတာ မေမေ့မျက်နှာမှာ အတိုင်းသားပေါ်နေပါ့။ ပြီးတော့ ညိုတို့ကိုလည်း တစ်ချက်ကလေးမှ မကြည့်ဘူး။
ညိုလေ မေမေ့ကိုစိုက်ကြည့်နေတာ အကြာကြီး။ မေမေ မျက်လုံးကစားပြီး မတော်တဆ ညိုနဲ့အကြည့်ချင်းများဆုံသွားမလားဆိုတဲ့ မျှော်လင့်ချက်ကလေးနဲ့။
YOU ARE READING
ခြံစည်းရိုးတစ်ဖက်က ယုဇနပန်းငယ်
General Fictionယုဇနပန်းရနံ့ကိုရှူရှိုက်ပါ။ သံစဉ်ထဲမှာစီးမြောပြီး လခြမ်းကွေးလို အလှတရားနဲ့ မင်းသမီးကလေးကို ရှုစားပါတဲ့...။ ဪ မင်းသမီးလေးရယ်... မဖြစ်နိုင်ဘူးဆိုတာသိပေမဲ့ မိန်းကလေးစစ်စစ်သာ ဖြစ်လိုက်ပါလားကွယ်...။ ယုဇနပန္းရနံ႕ကိုရႉရွိုက္ပါ။ သံစဥ္ထဲမွာစီးေျမာ...