Unicode...
ပြာသိုလဆန်း နှစ်ရက်နေ့...။
ရပ်ကွက်ဘုရားပွဲနေ့...။
မင်းထွဋ်နဲ့ သွေးသစ်ညိုတို့ လူမသိသူမသိချစ်လာကြတဲ့ ၈ရက်မြောက်နေ့...။ညိုတို့အိမ်မှာ အုန်းနို့ခေါက်ဆွဲကျွေးတယ်။ ကျွေးတယ်ဆိုတာလည်း ဘုရားပွဲကိုအမည်ခံပြီး ဖြူဖြူအောင်တို့မိသားစုကို ဖိတ်တာပါ။
ဘုရားပွဲမှာက ဇာတ်ပွဲပါပေမဲ့ ဖြူဖြူအောင်တို့မိသားစု လာလည်မှာမို့ ပွဲမကြည့်ရဘူးဆိုတဲ့အမိန့်ကို အိမ်ထောင်ဦးစီး ဖေဖေက ထုတ်ထားလေတယ်။ မေမေက တကယ်တော့ ပွဲချိုးပါ။ ဝန်ထမ်းအိမ်ရာတွေမှာနေရတုန်းက ဖေဖေ့ဂုဏ်သိက္ခာကြောင့်သာ ပွဲလမ်းသဘင်တွေ မသွားတာ။ ညို့ကိုဆို ခဏတိုင်းပြောဖူးတယ်။ မေမေအပျိုတုန်းကဆို ဘုရားပွဲရှိတဲ့ရပ်ကွက်လှည့်ပြီး ညလုံးပေါက်ပွဲကြည့်လာတာတဲ့။
ညိုက မေမေ့သွေးတွေအပြည့်ပါလာတာလို့ ပြောရမှာပေါ့။ အခုလည်း မေမေက ရပ်ကွက်ထဲ ဘုရားပွဲသံကြားကတည်းက အိမ်နီးချင်းတွေကို ဇာတ်ပါသလားနဲ့လိုက်မေးနေခဲ့တာ။ မေမေလည်း ကြည့်ချင်နေရှာမှာပါပဲ။
ဒါပေမဲ့လည်း ဒီတစ်အိမ်လုံးမှာ အာဏာအရှိဆုံးက ဖေဖေပေပဲ။ ဒီတော့ မေမေလည်း ဇာတ်ပွဲအကြောင်းမပြောတော့ဘဲ အုန်းနို့ခေါက်ဆွဲကိုသာ အားခဲချက်ရလေတယ်။ မေမေက မငြင်းငြူရှာပေမဲ့ ညိုကတော့ စိတ်မကောင်းဘူး။
ဘုရားပွဲရက်ဖြစ်လို့ ဓမ္မာရုံက သီချင်းသံတွေက တစ်ရပ်ကွက်လုံးကို လွှမ်းလို့နေတယ်။
"သားရေ... ဧည့်သည်တွေမလာခင် အိမ်နီးချင်းတွေကို အရင်သွားပေးလိုက်ဦး"
မေမေက လေးဆင့်ချိုင့်ကြီးထဲ အုန်းနို့ခေါက်ဆွဲတွေ ကျကျနနထည့်ရင်း ညို့ကိုလှမ်းအော်တယ်။ ဒီလိုနဲ့ ဘေးပတ်လည်က ရင်းနှီးတဲ့ နှစ်အိမ် သုံးအိမ်ကို ညို မုန့်တွေလိုက်ဝေလိုက်ရတယ်။
အရှေ့ဘက်အိမ်ကတော့ မပါမဖြစ်ပေါ့လေ။ ညို့ချစ်သူကြီး အလုပ်ဆင်းချိန်လည်းဖြစ်လို့ အိမ်မှာရှိနေမှာသေချာပါတယ်။ ခပ်ရှုပ်ရှုပ်ဖြစ်နေတဲ့ဆံပင်တွေကို နည်းနည်းပါးပါးပြင်ပြီး ချိုင့်ကိုဆွဲလို့ အရှေ့ဘက်အိမ်ကိုထွက်ခဲ့တယ်။
YOU ARE READING
ခြံစည်းရိုးတစ်ဖက်က ယုဇနပန်းငယ်
General Fictionယုဇနပန်းရနံ့ကိုရှူရှိုက်ပါ။ သံစဉ်ထဲမှာစီးမြောပြီး လခြမ်းကွေးလို အလှတရားနဲ့ မင်းသမီးကလေးကို ရှုစားပါတဲ့...။ ဪ မင်းသမီးလေးရယ်... မဖြစ်နိုင်ဘူးဆိုတာသိပေမဲ့ မိန်းကလေးစစ်စစ်သာ ဖြစ်လိုက်ပါလားကွယ်...။ ယုဇနပန္းရနံ႕ကိုရႉရွိုက္ပါ။ သံစဥ္ထဲမွာစီးေျမာ...