Unicode...
Top Queen စက်ချုပ်ဆိုင်...
စက်ချုပ်သမလေးတွေ အပြိုင်အဆိုင် စက်နင်းနေကြသံတွေ လှိုင်ထနေတယ်။ ဒီဇိုင်နာသင်တန်းဆင်း မဥမ္မာဦးစီးတဲ့ ဒီဆိုင်လေးက ရပ်ကွက်ထဲတင်မက တစ်မြို့လုံးမှာပါ နာမည်အတန်အသင့်ရနေတဲ့ဆိုင်လေးဆိုမမှားဘူး။
တချို့က မဥမ္မာကို ဈေးကြီးထဲဆိုင်ခန်းငှားပြီးဖွင့်ဖို့ အကြံပေးကြတယ်။ မဥမ္မာက အမေအိုကြီးကိုလည်းကြည့်ရတာမို့ အိမ်နဲ့တွဲရက်ဆိုင်ခန်းလေးကိုပဲ တွယ်ကပ်နေခဲ့တာ။
မဥမ္မာ အဝတ်စကိုက်နေတုန်း Top Queen စက်ချုပ်ဆိုင်ရှေ့ ကားတစ်စီးထိုးရပ်လာပြီး ဒေါက်မြင့်ဖိနပ်စီးခြေတံသွယ်သွယ်တစ်ချောင်း ကားပေါ်ကနေကျဆင်းလာတယ်။ ကားပေါ်ကလူကိုမြင်တော့ မဥမ္မာက ပြုံးလိုက်တယ်။ ဒေါက်မြင့်ဖိနပ်ကို မထပ်အောင်စီးပြီး ထဘီကို ခြေသလုံးအလယ်ထိသာ ခပ်တိုတိုဝတ်တတ်တာက သူ့စတိုင်လ်။
အဲဒီထဘီကိုလည်း မဥမ္မာကိုယ်တိုင် ဖန်တီးပေးခဲ့တာပေါ့။ သူဆိုတာ ဒီ Top Queenစက်ချုပ်ဆိုင်ရဲ့ VIPဖောက်သည် လှိုင်းခက်...။
"တို့ကိုလှောင်နေတာများလား မဥမ္မာရဲ့... ကားပေါ်ကဆင်းကတည်းက ပြုံးနေတာ အခုထိမရပ်သေးဘူးနော်"
လှိုင်းခက်က ဆိုင်ထဲကိုဝင်ဝင်ချင်း မဥမ္မာရဲ့အလုပ်စားပွဲဆီတန်းသွားပြီး ခုံမှာဝင်ထိုင်တယ်။
"မဟုတ်ပါဘူးအေ... ဟိုတစ်နေ့က နင့်ကိုတွေ့လိုက်တဲ့ဖောက်သည်တစ်ယောက်ပြောတာ ပြန်ကြားယောင်လာလို့"
လှိုင်းခက်က ဘာများလဲဆိုတဲ့မေးခွန်းကို မျက်ခုံးပင့်ပြီးမေးလိုက်တယ်။
"ညည်းကို ကောက်စိုက်သမနဲ့တူလို့တဲ့"
လှိုင်းခက် ပါးစပ်ကိုအုပ်ပြီး ဟန်လုပ်ရယ်လိုက်တယ်။
"ဘယ်ကောက်စိုက်သမက ဒေါက်စီးမှာတဲ့လဲ ဟမ့်"
"ငါကတော့ ငါကိုယ်တိုင်ချုပ်ထားတဲ့ဟာမို့ လှတယ်ဆိုတာ အာမခံပါ့... သူတို့က နင့်လိုလိုက်မဝတ်ရဲလို့ ပြောကြတာပါ"
YOU ARE READING
ခြံစည်းရိုးတစ်ဖက်က ယုဇနပန်းငယ်
General Fictionယုဇနပန်းရနံ့ကိုရှူရှိုက်ပါ။ သံစဉ်ထဲမှာစီးမြောပြီး လခြမ်းကွေးလို အလှတရားနဲ့ မင်းသမီးကလေးကို ရှုစားပါတဲ့...။ ဪ မင်းသမီးလေးရယ်... မဖြစ်နိုင်ဘူးဆိုတာသိပေမဲ့ မိန်းကလေးစစ်စစ်သာ ဖြစ်လိုက်ပါလားကွယ်...။ ယုဇနပန္းရနံ႕ကိုရႉရွိုက္ပါ။ သံစဥ္ထဲမွာစီးေျမာ...
