|| အနီ​ရောင်ချောက်ကမ်းပါး-红悬崖 ||

အခန်း ၂ |အခန္း ၂

{ အနီ​ရောင်​ချောက်ကမ်းပါး }

​လေအ​ဝှေ့၌ မခိုင်​သော ​ရွက်​ကြွေရွက်ညှာများက ​ဖြေး​ဖြေးချင်းဝဲကျလာသည်။
သစ်ပင်ခြုံနွယ်တို့၏ ​ပွတ်တိုက်သံက သာယာစွာပျံ့လွင့်​နေသလို ​နေ​ရောင်ခြည်လည်း​ကောင်းစွာကျ​ရောက်၍ ​ဥယာဥ်​တော်ကြီးဟာအသက်ဝင်လျက်ရှိသည်။

ပဒုမ္မာကြာဖူးတို့က ​ကန်​ရေပြင်တစ်​လျှောက် ယိမ်းနွဲ့​နေကာ ပုဇဥ်းပုတုန်းစ​သော သတ္တဝါများဟာ ဝတ်မှုန်တို့အား ကန်​ရေပြင်​ပေါ် ဝဲပျံရင်းကူးချည်သယ်ချည်ပြု​နေကြသည်။

​ရေပြင်​ပေါ်က ​လေသာ​ဆောင်တွင် ငြိမ်​နေ​သော အရှင်သခင်က​တော့ ကန်​ရေပြင်ဘက်ကို မမှိတ်မသုန်စိုက်ကြည့်လျက်ရှိ​နေတာအ​တော်ကြာခဲ့ပြီ။

ခံစားချက်မဲ့​နေ​သော မျက်ခုံးမျက်ဝန်းတို့က အသက်မဝင်​သော်လည်း နက်​မှောင်သွယ်တန်းကာ။ မျက်ခွံက​လေးများလှုပ်ခတ်တာရှားသည့် အရှင်ဟာ အသက်ရှင်​နေသည့် ရုပ်တုတစ်ခုလိုလည်းငြိမ်​နေတတ်​သေးသည်။ ခတ်များခတ်လိုက်ပါလျှင်လည်း ​ကော့ညွှတ်ကာ အုပ်မိုးကျသွားတတ်တဲ့ မျက်​တောင်စိတ်က​လေးများ​ကြောင့် အရှင်၏အလှဟာ စာဖွဲ့လို့မမှီ​အောင် လင်းထင်း​နေ​ရော့၏။

သို့​သော် မည်မျှပင် လှပသည့်အလှတရားဖြစ်​သော်လည်း အပယ်ခံတစ်ပါးဖြစ်သည့်အခါ လျစ်လျူရှုခံ​စေတာပုံမှန်လို။

ရုပ်​သေးဘုရင်တစ်​ယောက်ဖြစ်သည့်အပြင် မျက်မမြင်၊ ဆွံ့အသူဟူ၍ ဂုဏ်ပုဒ်တပ်ထားခြင်းခံရ​သော​ကြောင့် အရှင်သခင်၏အနားတွင် ချီကုန်းကုန်းနှင့် အ​ယောင်ပြသက်​တော်​စောင့် နှစ်ပါးကလွဲ၍ မည်သည့်အ​စေခံမှမရှိ။ ယခင်က​တော့ အနည်းငယ်ထားထား​ပေမယ့် ဒုက္ခိတတစ်​ယောက်ကို ပြုစုနေသည်က အချိန်​တွေပြုန်းသလိုဖြစ်မည်စိုး၍ထင်သည်။ အရှင်သခင်၏အနားတွင် မည်သူမှရှိမ​နေ​တော့ပါ​ချေ။

ရှိသည့်သူများဟာလည်း အဆင်မ​ပြေခဲ့။ လူတို့၏မမြင်ကွယ်ရာပြုတတ်သည့် စရိုက်​ကြောင့် အရှင်နှင့် အနီးကပ်ဆုံး​နေရသည့် ချီကုန်းကုန်းသည်ပင် အရှင်သခင်ကို​လေးစားခြင်းမရှိ။