#مـاذنبي..!
نُوكوميس"فَـتاة القمر"
الحلقه الاولى.
نزلو دمـوعها بألم وهيا تقول بشهقات متقطعه لي أمها: أنـا شن ذنبي! علاش من الدنيا كلها غر اني هكي صارلي!
مسحت الحاجه فاطمه ع شعر بنتها وقالت بحزن: من قال انه إنـتـي بس صاير فيك هكي يابنتي النّـاس كُلـها تعاني
رانيا: اي بس اني تعدبت هلبا ياماما نضرت الناس ليا في هالمجتمع سيئه هلبا والله يشبحولي ؏ اني مطلقه ماينفعش لا نخدم ولا نطلع من الحوش مش ساد معاملة خوتي! ونساوينهم؟
فاطمه: انتي قاعده في حوش بوك مش في حوش خوتك راك معززه مكرمه وبعون الله ترجعي تكملي قرايتك ورجلهم فوق روسهم واللي مش عاجبه يدور وين يمشي وبوك معاك في كل شي.. الحق مش فيك يابنتي الحق في طليقك
نزلو دموعها تكلمت بحزن مسيطر ع ملامحها
رانيا: حتي هوا الحق مش عليه الحق ع اماليه اللي ماقلوش انه مريض لما خطبوني وانا وافقت زي الهبله
فاطمه: بري امسحي دميعاتك ماحد يستاهلهم توا يخشو نساوين خوتك يتشمتو فيك راك تبينليهم انك مضايقه بالعكس
هزت رانيا راسها بالمواقفه وبعدين امشت، بدير زي ما قلتلها أمـها ولن طلعت وامها تشوفلها بحزن وفي نفسها تقول "بنيتي صغيره وما تستاهل اللي صارلها"
_______________
وفي مكـان تاني وفي وسط المدينه في حوش كبير ملمتمين عيله بصغارهم وحس الصغويره اللي يعطي للمكان طاقه إيجابيه..
فـتحت روند البلكونه وهيا تشوف لي صغار حمواتها وسلافها اللي يلعبو ودعت من قلبها لي ربي انه ربي يرزقها زيهم.. ابتسمت بلطف على منضرهم وهما يلعبوا وسكرت البلكونه وخشت اتجهت بدورها لي دار النوم وقالت وملامح وجها مصدومه..
روند: فراس! قاعد راقد جمعه نهار حرف
وشغلت الضو..
فراس فتح عيونه وهوا مزعوج من الضي: روند صكري الهم خير ما نوضلك شن يحزك مني بعدين
روند ضحكت: نوض نوض وقت على صلاة الجمعه ره حددتلك حوايجك تلقاهم في دار الحديد
فراس: حسبي الله..وناض بتعب وهوا يحك في عيونه متجه للحمام
ودقايق حـتى طلع وهوا لابس العربي متأنق ومفتلك ع الاخير يلبس في ساعته ويتكلم
فراس: توا بالله عليك الساعه 12 كيف جت وتقوليلي وقت ع الجمعه فراس
ضحكت روند عليه وهوا يقلد في صوتها: ماهو نعرفك ماتباش تنوض من بكري خواتك جايات ونساوين خوتك نازلين غر احني
فراس: هوا هذا انتم النساوين ديما تنافسو في بعض وين الفطور..
حطت الصفره ع الباب وجابت الكرسي وقعمزت
روند: جيب الكرسي من غادي وتعالى
خدي فراس الكرسي وقعمز جنبها وبدو ياكلوو وهما يهدرزو.. ومره يتغزل في مرته مره يضحكو ومره يسكتو..
______________
في حوش العيله شاهي العاله واتي والغدي بازين فايحه طبيخته حطو الغدي وشافت الحاجه فوزيه لي بنتها وهيا تحط في الصفره وقالت بحزم
فوزيه: ماتقوليليش وين مرت خوك مانزلتش..
اساور: وين نندري يمه تو دوره تلقيهم نازلين
ع خشت روند سلمت على خالتها بحكم انها اخت امها ف تقوليله ياخالتي
فوزيه: عطلتو في النزول نشغلت عليكم
روند: فراس ياخالتي تعرفيه ماينوض الا بالسيف عنده يوم الجمعه عطله وكان يلقى ماينوضش
فوزيه: وينه هوا خيره مجانيش
روند: خش للمربوعه طول
فوزيه: سلم بنتي قوليلهم يعجلو بالغدي عمك وسلافك مايحبوش يراجو
روند: حاضر هي
فوزيه بابتسامه: حضرلك الخير
